Iyoobi 15 - Kafa Linguistics Project

Iyoobinaa Bi Nuucheenaꞌonochi Guttinnee Yibbaatoo

¹ Aroochee Temaanee asho Elifaazi ishichiye:

² “Shalligechi asho ebiyoommi gaacaalli yibbaatoon yibbaatehe? Gaacaalli mooyon bi maacooch kotiyehe?

³ Amoonolla tuniyoon hakkaani, gaacaalli yibbaatoon yibbaatehe?

⁴ Ne, Yeerin shaton qajjeto neene; Yeer waan asho corootemmi gommon hicceto neene.

⁵ Ne yibbaatoo, xuꞌecho ne tunoon, arichii beetone; maroona yibbaataabeeto neene.

⁶ Ne toommooch nalliibeeto, ne hajjee noonoani, ta toono taane; ne hajjee yibbaatoo ne toommooch miixee beetone.

⁷ “Ne, ashoyee shiichaꞌaniye ne shiijjeto? Geppeenaꞌo halleyoyee shiichaꞌaniye ne shiijjeto?

⁸ Yeerichi iiteenaꞌo daggooch danaꞌa mooyon elletine? Ashi ariyoo beeto ne waan baach, neech shaahii beete?

⁹ Ne ariyaabeeti, no ariyaani mooyo amoone? Ne baach shalligaabeeti, nooch aacheeti mooyo amoone?

¹⁰ Ne aabbiyee qaabbiti geeneenaꞌo, bukkechinaꞌo noonna tookkii beetinaꞌone.

¹¹ Yeerichi goggiyoo, shiimoona neech getteeti qaaro, neech bedaache?

¹² Ne mullee gaboona baach ne hammaabeeto, amoyichiye? Noon ne sheexxaabeeto amoyichiye?

¹³ Yeeri toommooch kaaraꞌa, ebiyoommi gonde mooyon ne noonoochee kichihine.

¹⁴ “Asho xalloo tunoon hakkehe? Maachee maacoochee shiijjeto, cadiqo tunoon hakkehe?

¹⁵ Yeeri bi maraakeenaꞌonolla gibeneyaanoone; shimaayeenaꞌolla bi aafoochaa xalleenaꞌo tooneenaꞌone;

¹⁶ ishigaata, axaaxoon aaco uyoommon uchiibeeti, tiyaariiti, eeꞌeti asho, aabichiree gibeneeyehe!

¹⁷ “Eke ellebe; neech kaachi gettemmo taane; ta beeggeton neech arichiyemmo taane.

¹⁸ Boonoshi qaabbechinaꞌo aachaanoon boonoshich getaa, shalligechinaꞌo gettiton, neech gettemmo taane.

¹⁹ Showoo boonoshich baach ichetone; bare showee asheenaꞌo boonoshi daggooch giyaaneenaꞌone.

²⁰ Gonde asho bi yemeeno bullin qaakkemmone; ashoon xuqqiibeeto, bulli aaboon xuuxemmone.

²¹ Keqqichiibeeti qaaroon bi waamona waayemmone; diggoone bi geti beetaa, bokkoo bi toommooch woyemmone.

²² Manderoochee bi kechemmi gommo biich bekkeyaanoone; biin quyeebeeto goraado baachiye.

²³ ‘Maayo aaye?’ getibee aakkaa aakkemmone; manderee aabo biich shaggito bi tunoon, ariyemmone.

²⁴ Duꞌoonaa xuuxoona biin keqqichemmone; koyoyich qanniti taatoochoommon bi toommooch sharemmone.

²⁵ Ebiyoo Yeeri toommooch bi kishoon bi qahitoyich, Beshe Hakkechi Yeeri toommooch aafoon bi kupphetoyichiye.

²⁶ Gamini kupphe gaachoon yechiꞌi, bi waan woccii bi waatoyichiye.

²⁷ “Aangii nuuriꞌi, bi shimetooch meeno xuuggitone;

²⁸ bi beeyi xaaꞌoo, tiisheti katemeenaꞌooch, happee guteya qanniti, asho beetaani duppeti, kexinaꞌoochiye.

²⁹ Gaannecho tuneree meeti aaboon beetaachemmone; bi gaannoo kaateree aallemmone; gaminiree showee toommoochoo koteyaachemmone.

³⁰ Manderoochee muricon hakkaachemmone; bi atoon qaaqqee aaxxo michii aalliiti, bi bungoon yongo holliiti mixoommon tunemmone.

³¹ Bi qelloon dawushibee gaacaalli mooyon gibenaaye; ebi gaacaalli mooyoochee bi danemmo amolla aalloone.

³² Biyoo, bi gooroo shagaan beetaa shoolliibeeti, atee waajjeyaani michi qaakkoommone.

³³ Bi aafo gaangaan beechii shekireebeeti woyinoommo, bi bungoo shekireebeeti zayitee mixoommon, tunemmone.

³⁴ Yeerich qeyaani ashi shiijjeroo dooggemmone; xuccoon maabeeti ashi kexoo miccemmone.

³⁵ Ebiyoommi asheenaꞌo gondoon gabii, duꞌoon deebiibeeti asheenaꞌone; boonoshi mullooch maroo ceennitone” iye.