Iyoobi 14 - Kafa Linguistics Project

¹ “Maachee maacoochee shiijjeti ashi eeno, qaminonaa xuuxoona ceennitonane.

² Mocee bungoochoommon kechiꞌi bekkech shuuqqiye; yiirittoochoommon yagaanoon beshee aallehe.

³ Ebiyoommi taan manjiyaa ciinnaꞌa, ta toommooch nalliya, nallee gabberooch taan giddiinne?

⁴ Eeꞌoochee xalle mooyon danoon hakkemmo konine? Koniyoona aalloone.

⁵ Asho beeyemmi aabo shiichiꞌi maachetone; bi beeyemmi ageneenaꞌo ne waanaa haddeetinaꞌone; biich ne daareti yemeenoon beshemmo aalloone.

⁶ Gichecho shuunoon ciichiꞌi bi kashoommon, bi kashemmi wottoon, qayi ne aafoon bi waanee badd wochibe.

⁷ “Kucheti michi xugoyichona gibeno beetone; wochinnoon wodoonaa atoonon hakkiye.

⁸ Bi cammo showee daggoochaa geenetaanona, bi xugo shuuqqitaanona,

⁹ aachi cingeena wochinnoon atemmone; maayi colloochoommon atoon kichemmone.

¹⁰ Tunebaani asho qitiꞌi giidaalloon tunehe; bi kasho kechitoyee damba illa daneyaache.

¹¹ Kote aaco shuuqqii aalloommon, woce aaco tahii kuxoommon,

¹² ebiyoommon asho qitiichii wochinnoon tiyaache; shimaayoo bi xaaꞌoochee aallemmi wottoon, qititi asho bi xaaꞌoochiye bi beeyemmo; bi qeyitoochee tiyaachemmone.

¹³ “Maash taan aachishoo geta! Ne kaaro beshemmi wottoon taan aachishoo geta! Aaboon taajjeree wochinnoon taan shalligishoo geta!

¹⁴ Asho bi qititoyee gubb, tiyiree kashoona beemon hakkehe? Ta kashemmi aabo waammi wottoon, ginee koyeexi beemoommon tuneti ta yemeenoon, haaꞌii beeyemmo taane;

¹⁵ Arooba taan ne ceegaa, eekkemmo taane; ne kishee shuunoo tuneti taan beegga sharaatemmo neene.

¹⁶ Ta shaaddoon quyemmo neene; ta axaaxoonoo hilla dabbaachemmo neene.

¹⁷ Ta axaaxoon maariree, ta waanee wokkiyemmo neene; ta gondoonoo qeremmo neene.

¹⁸ “Tunebaani guudo boriheꞌi dihoommon, xaqqee guudo bi kote xaaꞌoochee tiyii aalloommon,

¹⁹ woce aaco xaqqoon gooshiꞌi bi gimoommon, ambamboo showoon machii bi daamoommon, ebiyoommon ashi gibenoon aalliihine.

²⁰ Bi toommooch ne giidoon bekkiyaꞌa biin aalliihine; bi halloon shaddaꞌa biin goochiihine.

²¹ Bi bushiisheenaꞌo oogoon danoon ariyaache; boonoshi giishoonoo beegaache.

²² Bi qaaqqoyee besh amoonolla ariyaache; bi qellich baach eeppiye” iye.