Iyoobi 13 - Kafa Linguistics Project

¹ “Illa ebiyoche, eboshi bullin ta aafoona beeggeto taane; ta waamonoo waayaꞌa shalligito taane.

² Ittoshi arii beeton, tawoo ariyaabeeto taane; ittoshiyee amoonolla shappaano taane.

³ Tunetaa, ta yibbaatoo Beshe Hakkechi Yeerina tookkiiniye; Yeerina tookki ittibateeya qaawaabeeto taane.

⁴ Tunebaani ittoshi iberoon kootoona qerito ittoshine; ittoshi bulli wodiyoon hakkaani aakumo ittoshine.

⁵ Cikkii ittoshi qajjito gaata, shalligechinaꞌone getteeyesho ittoshine.

⁶ Illa and, ta gettaabeeti mooyon waayebote; ta taggoonoo cikki elle waayebote.

⁷ Kootoon ittoshi koottiibeeto Yeericha iiniye? Dachee yibbaatoon ittoshi yibbaateebeeto biicha iiniye?

⁸ Yeer waan gaꞌiiree nalliyane ittoshi ii beeto? Biich shaxoo neexeyaniye ittoshi ii beeto?

⁹ Yeeri ittoshin manjii bi ciinnimmo gaata, ittoshi waanee gaawe mooyo daneshe? Ashoon dawushoommon Yeerin dawushoon hakkehote?

¹⁰ Aashoona ashi aafoon ciinniꞌi ittoshi nallitaanona, iberoon, bi ittoshin kaaremmone.

¹¹ Bi oogee yiiroo ittoshin keqqichaache? Biin shatona ittoshi tingo qeweyaache?

¹² Ittoshi tochiibeeti tocheenaꞌo tulloommi gaacaalleenaꞌone; ittoshi yibbaatoo manjaano, nuuqqee qiico buricoommon buricee beetone.

¹³ “Eke ittoshi cikkiichaa ta yibbaatebona; ta toommooch shaggemo amolla shage.

¹⁴ Qitoon shataachemmo taane; ta kasheenoo aaxxiyaachemmo taane.

¹⁵ Yeeri bi qaawigaata taan wuxibe; illa echesho amoone; tunebaani ta mooyon bi aafoochaa taggemmo taane.

¹⁶ Yeerich qeyaani asho bi aafooch shagaachemmo bi tunetoyich, ebi aafee kuppho taach wodoon tunemmone.

¹⁷ Ta qaaroon manjiiree ellebote; ta gettaa beetonoo manjiiree shalligibote.

¹⁸ Ebiyoche, ta taggoon qanniito taane; taach nalleyemmo bi tunoon ariyaabeeto taane.

¹⁹ Taanna taggemmo konine? Gondeto ta tunegaata, qaareyaanoon cikkibee qitibone.

²⁰ Yeero, ebi gutte mooyon baach taach ne tuniigaata, ne aafooch giddemmo taane.

²¹ Ne kishoon ta waanee wokkiibe; ne oogee yiiroo taan keqqichaaye.

²² Yeero, shiichiree ne yibbaatetaa, ta neech wochibona; woyee ta yibbaatetaa, ne taach wochibe.

²³ Am shaahe axaaxoonaa xuꞌoononiye ta shuuneto? Eke ta axaaxoonaa ta muricoonon taach arichiibe.

²⁴ Ne aafoon ta waanee badd ne wochito, ettoon tuniyaꞌa taan ne ciinneto, amoyichiye?

²⁵ Kokeshoommi taan ne shatiyaabeeto, amoyichiye? Hini maaxxoommi taan yookkaa ne dabbaabeeto, amoyichiye?

²⁶ Caammiti mooyon ta toommooch koorihine; gurimaashaabee ta xuqqeti xuꞌo, taan bi yechemmoyich tuniihine.

²⁷ Ta baatoon giindaꞌa cuchehine; shaꞌe ta wotteyaachemmoyich, taan quyehine; ta hilloon hillehine.

²⁸ “Ebiichee tiyitona baanniti mixo buricoommon buricoye; pilo maati qoreddoon shaahihoye.