Iyoobi 12 - Kafa Linguistics Project

¹ Iyoobiyoo ishichiꞌi wochiye:

² “Eeha, gettii waayiibeeti asho ittoshine getone; ittoshi qitigaata shalligechi bare asho daneyaachemmone getone.

³ Tunebaani, ittoshichoommi shalligoo taachoo beetone; ittoshiyee amoonolla shappaache; ebi mooyon ariyaano konine?

⁴ “Yeeri ta qolloon waayeti ta, ta nuucheenaꞌona cooneeto taane; kaamoonaa cadiqoona tuneti taan, cooneheete.

⁵ Bi toommooch amolla shagaani ashich, ashi duꞌo biich am bedaanoone; bi tingo qeweti ashoon yexxii dichiyote.

⁶ Bokkeenaꞌo kexo diggoo tunehe; Yeerin ippiibeeti asheenaꞌoo keqqaalleenaꞌone; boonoshiyoo nuggishoon tuniiꞌi, boonoshi giidoon gibenee beetinaꞌone.

⁷ “Eke gijjeenaꞌon echebe; neech dojjemminaꞌone. Shimaajji gaceenaꞌon echebe; neech gettemminaꞌone.

⁸ Neech bi dojjemmoyich showoyich gete; baharee daggeexi haasheenaꞌo neech gettemminaꞌone.

⁹ Doono Yeerichi kishoo boonoshin shuunoon, eboshichi daggoochee ariyaano beeta?

¹⁰ Kashecho bullichi kasho, asho bullichi kashee hiinno, bi kishoochiye.

¹¹ Heciyoo maayoon nappheꞌi ariyoommon, waamo yibbaatoon barbariiꞌi ariyaache?

¹² Shalligoo beeto geene ashi waan toone? Goomo beeto yagiti ashi waan toone?

¹³ “Shalligoonaa giidoona Yeerichone; ciicoonaa goomona biichone.

¹⁴ Yeeri happiton koniyoona hagon hakkaache; bi cuchii hicciton koniyoona qechii kichoon hakkaache.

¹⁵ Amiyon bi bayigaata, showoo shuuqqiye; amiyon dichiꞌi, ambamboona showoon yexxiye.

¹⁶ Yeeri giidechonaa kochii wochechonane; muriccii beetonaa muriciyechona, bi kishoochiye boonoshi beeto.

¹⁷ Mikkirechinaꞌo toommoochee shalligoon tiijjiye; woraaferasheenaꞌonoo geyechinaꞌon tuniihe.

¹⁸ Yeeri taateenaꞌochi taatittinoon shoottiye; qoreddoon marixxiibeeti guuninaꞌon tuniihe.

¹⁹ Qeesheenaꞌo toommoochee shalligoon tiijjiye; ukkireenaꞌochi ukkirittinoon shoottiye.

²⁰ Gibeneeti asheenaꞌochi noonoon hicciye; geeneenaꞌo waanee goommii deꞌon aalliihe.

²¹ Showoon qeejjii beetinaꞌon giishiihe; giidechinaꞌochi shimetoon niriihe.

²² Manderoo qeriti hooneenaꞌon gaxxiye; dunne manderoonoo bekkoona shaddiye.

²³ Aageteenaꞌon giidechinaꞌonaa arichetinaꞌonon tuniihe; aroochee boonoshin aalliihe; shacciinoo iye.

²⁴ Showee toommooch beeti asheenaꞌochi ukkireenaꞌon mullaalleenaꞌo tuniihe; beshe kaattoo aalli boochoona boonoshi yallyallimemmoyich tuniihe.

²⁵ Bekko aalli manderoona shafebee boonoshi hammemmoyich, masheti ashochoommon boonoshi tattellemmoyich, tuniihe.