Iyoobi 11 - Kafa Linguistics Project

¹ Aroochee Namaatee asho Soofaari ishichiye:

² “Ebi shaahe wodde yibbaatoo cikkaa qachemmone? Noonechi asho tuno, ashoon xalliyemmone?

³ Cuchaalli ne yibbaatoo asho cikki qajjemmon tuniyehe? Cooqiree ne yibbaatoyich, neen yeelliyemmo aallehe?

⁴ Newoo, ‘Ta yibbaatoo tatoone; Yeeri aafoochaa xalloo taane’ iyine.

⁵ Abo Yeeri neech yibbaateshoo geta! Bi noonoon gaxxiree neechoo yibbaateba!

⁶ Shalligoo meeti boochecho bi tunetoyich, shalligee maaci mooyon neech getishoo geta! Ebich Yeeri neen bi sheerito, ne axaaxoyich ne sheereya bedoon tunee bi qayon, ariibe.

⁷ “Yeerichi maacee mooyon maqqiꞌi ariyoon hakkenne? Beshe Hakkechi Yeerichi moochi ciiroon ariyoon hakkenne?

⁸ Shimaayoyee beshe wohone; illa amoon halloo hakkenne? Dechi bi ducho, Siꞌooloyee wohone; ne amoon ariinne?

⁹ Showoyee beshe genjoone; baharoyee beshe gaminoone.

¹⁰ “Yeeri waa neen cuchiꞌi, nallee gabberooch bi giddiigaata, biin bajjemmo konine?

¹¹ Bi dachechi asheenaꞌon arii beetone; xuꞌoon bi beegigaata, cikkii ciinaanoone;

¹² kubbi kuro asho tuneꞌi shiijjoon hakkee bi qayoommon, mullaalli asho shalligecho tunoon hakkaache.

¹³ “Ne mulloon kaamoo ne tuniigaata, ne kishoon bi waan wochaꞌa ne corootigaata,

¹⁴ xuꞌoon ne kishoochee ne wokkiigaata, axaaxoo ne kexooch bi beetaachemmoyich ne tuniigaata,

¹⁵ ebiyooba yeelleyaanoon kaama qaallemmo neene; shataanoon manjiree neexemmo neene.

¹⁶ Ne xuuxoon battemmo neene; ebin ne shalligemmo beshee hammiti aacon ne shalligoommon tunemmone.

¹⁷ Aabo daggehaa aaxxeebeeti aaboyee beshoon, ne beemo aaxxe bekkemmone; neech manderoo tuneti mooyo, haree bekkoommon bekkemmone.

¹⁸ Amoonolla shataanoon gibeneeti beemon beeyemmo neene; Yeeri neen quyetaa keqqaalloon kashemmo neene.

¹⁹ Konichona shataanoon tokkete kashemmo neene; meeti asheenaꞌo qollooch ne waan woyemminaꞌone.

²⁰ Tunebaani gondeenaꞌo aafo yaamemmone; murici boonoshi wodemmi gommon muccemminaꞌone; boonoshich beeti gibeno qitoo baachiye” iye.