Iyoobi 10 - Kafa Linguistics Project

¹ “Beemo taan shixxiitone; ebich, xalla kichiree Yeerina taggemmo taane; am shaahoon ta kashe caammeto gaata, biich gettemmo taane.

² Tawoo Yeerich ishichemmo taane; ‘Taanna ne taggaabeeti naboon taach getani, ta toommooch nalliyaahine.

³ Taan ne xuuxiyoo, ne kishee shuunoo tuneti taan ne hoxo, gonde asheenaꞌochi gaboon ne dego, tatoone?

⁴ Ne aafo ashi aafoommone? Ashi ciinoommoniye ne ciinnaabeeto?

⁵ Ne yemeeno meeno taheti ashi yemeenoommone? Ne eeno ashi eenoommone?

⁶ Ta muricoon ne qaawaabeeto, ta gondoonoo ne boshaabeeto, amoyichiye?

⁷ Gondo ta toommooch aallo bi tunoon, ne kishoochee taan wodiyemmo koniyoona aallo bi tunoonoo, ariyaabeeto neene.

⁸ “ ‘Taan hallii, shuunetinaꞌo ne hajjee kisheenaꞌone; illa and wottaꞌa taan aalliinne?

⁹ Nuuqqee qiicoochoommon taan ne shuunoon batteyaahine; and taan wochiree buttoon tuniyane ne iyaabeeto?

¹⁰ Ejjoochoommon ta indee maacooch taan ukkihine; gurimoochoommon ta guremmoyich tuniihine;

¹¹ ta ashittinoon shaawushoonaa maqqoona shuunehine; ta shaawushoonoo meenonaa gooqqoona qerihine.

¹² Kashoon immaa, kuxeyaani ne shunoon taach bekkiihine; ta kasheenoo gaawichaꞌa quyehine.

¹³ “ ‘Tunebaani, mooyon ne mullooch yechehine; ne gaboo ebi bi tunoon ariito taane.

¹⁴ Ebiyoo, axaaxoo ta shuunoon beegga qiiddaabeeto ne tunoone. Ebich ta axaaxoon maaremmon qajjehine.

¹⁵ Gondeto ta tunegaata, taach woowo! Cadiqo ta tunetaa kaama qaallaache; ebiyoo yeelleto ta tunetoyich, xuuxoonoo beeggeto ta tunetoyichiye.

¹⁶ Ta qelloon kaama ta yeephigaata, daaheroo yookkii yeshoommon, taan yookkaa yechehine; shattiiti ne giidoon wochinnoon ta toommooch bekkiihine.

¹⁷ Baribare miixeenaꞌon ta toommooch deebehine; ne kaaroo ta toommooch beshii beshii waahe; ginee naayon kaalli kaalloona ta toommooch deejjihine.

¹⁸ “ ‘Ta indee maacoochee ta kechemmoyich aakkiya tuniinne? Abo ashi aafo taan beegaan beetaa qitishoo getota!

¹⁹ Halleyaanoon echeshoo getota! Ta indee maacoochee maash taan daamishoo geteeta!

²⁰ Ta beemi yemeeno ciir beddito toone? Eke ne qayaa giishechoon kashebona.

²¹ Wotteyaanooch ta hamoyee shiichiree, manderoo tuneti, qitoo yiibbiꞌi beeti showooch,

²² manderoonaa dulloona beeti showooch, dunne manderoo tuneti, bekko aalli showooch, hamaan beechi, ne qayaa kashebona’ gettemmo taane” iye.