Iyoobi 1 - Kafa Linguistics Project

Iyoobi Mooyo

¹ Uutsee showooch Iyoobi getteebeeti ikke uro beehe. Biyoo ikke oonaalli kaamoo, Doono Yeerin shattiibeeto, gonde mooyoocheenoo wokkiti uroone.

² Shabaatte anaami bushiishoonaa keejje maache bushiishoonon shiyitone.

³ Biichoo shabaatte hume bago, keejje hume gaalee, uuche balle kashee gattoonaa uuche balle maache kureenaꞌona beetinaꞌone; wotta meeti guuninaꞌo biich beetinaꞌone. Aabi-keyo waan beeti asheenaꞌoyee beshoon oogeti gaannechi uroone.

⁴ Bi anaami bushiisheenaꞌo kaalli kaalloona boonoshi kexi kexooch gifiroon geddii beeheete. Boonoshina tookki boonoshi maa uchemmoyich keejje maache boonoshi maneenaꞌon arooch ataallii beeheete.

⁵ Gifiroo ciiretoyee gubb, Iyoobi maaddoona tiyii boonoshi ikkikkoochi haddoona micciibeeti deejjoon giddiiꞌi boonoshin yaafii beehe. Ebin bi tuniibeeto, “Diqq ta bushiisheenaꞌo axaaxoon shuune beeyemminaꞌone; boonoshi mulloonoo Doono Yeerin naagi beeyemminaꞌone” iꞌi bi gabii beetoyichiye. Biyoo ebin kuxaanoon tunii beehe.

Batti Batt Iyoobi Toommooch Shaggiti Magge Iritoo

⁶ Ikke areddoon maraakeenaꞌo Doono Yeeri aafooch giddehooba, Sheexaanoo boonoshina tookkii giddehe.

⁷ Doono Yeeriyoo Sheexaanoon “Amoocheeniye ne waabeeto?” iꞌi echehe. Sheexaanoo Doono Yeerich wochiꞌi, “Showee toommooch guuddaꞌa okk hach, desh damba shaꞌoocheeniye” iye.

⁸ Doono Yeeriyoo Sheexaanoon, “Ta guuno Iyoobin xiishaa beeggetine? Showee toommooch biinoommi oonaalli kaamoo, Doono Yeeri taan shattiibeeto, gonde mooyoocheenoo wokkiti asho aalloone” iye.

⁹ Aroochee Sheexaanoo Doono Yeerich wochiꞌi ishichiye: “Iyoobi Doono Yeeri neech bi shattiibeeto baad cikkiiniye?

¹⁰ Biinnaa bi kexonochi guudoon, biich beeto bullichi guudoonoo uxereyaano neene? Bi kishoona bi shuuneti mooyon diirito neene. Bi gijjeenaꞌo showee toommooch ceennitinaꞌone.

¹¹ Eke ne kishoon tiijjiree biich beeto bullin aalliibe; biyoo ne aafoochaa, neen naaggemmone” iye.

¹² Doono Yeeriyoo Sheexaanoyich, “Eke tunebe; biich beeto bulli ne kishoochiye. Tunebaani bi achooch baach shaggaahine” iye. Aroochee Sheexaanoo Doono Yeeri aafoochee kechii hammiye.

¹³ Ikke areddoon Iyoobichi anaami bushiisheenaꞌonaa maache bushiisheenaꞌona boonoshi qaabbe manoo kexooch maa woyinee uyoonoo uchii beeheete.

¹⁴ Wocheyecho Iyoob waan waaꞌi ishichiye: “Gatteenaꞌo gochii beetaa, kureenaꞌoo boonoshi gaꞌooch beeti gaddooch beetaa,

¹⁵ Sheebee asheenaꞌo waa kochiꞌi, gijjeenaꞌon boggii daammiyeete. Shuunechinaꞌonoo goraadoona wuxiyeete. Ta ikkeeto baach muriccaꞌa ebin neech getta waahoye” iye.

¹⁶ Ebin gettii bi beetaa, bare wocheyecho waaꞌi ishichiye: “Xeeyo kindiꞌi bageenaꞌonaa qiddeenaꞌonon yechiye; boonoshinoo michii aalliihe. Ta ikkeeto baach muriccaꞌa ebin neech getta waahoye” iye.

¹⁷ Ebin gettii bi beetaa, baroo waaꞌi ishichiye: “Kalidee asheenaꞌo keejje kuxona waa qiddeenaꞌon goraadoona wuxiichii gaaleenaꞌon gashee daammiyeete. Ta ikkeeto baach muriccaꞌa ebin neech getta waahoye” iye.

¹⁸ Ebin gettii bi beetaa baroo waaꞌi ishichiye: “Ne anaami bushiisheenaꞌonaa maache bushiisheenaꞌona boonoshi qaabbe manoo kexooch kiceeꞌi maa, woyinee uyoonoo uchii beeheete.

¹⁹ Arooch boonoshi beetaa giidechi yubee yongo barahoochee waaꞌi kechi awudde gocon yexxiye. Kexoo boonoshi toommooch dihiꞌi, boonoshin wuxiye. Ta ikkeeto baach muriccaꞌa ebin neech getta waahoye” iye.

²⁰ Iyoobiyoo kotoochee tiyiye; bi tahoon keexxiye; bi qelloon cakkehe; showooch baroona guufeꞌinoo goyinnehe.

²¹ Biyoo ishichiye: “Shokkaachoon ta indee maacoochee kecheto taane; shokkaachoon wotteree hammemmo taane. Doono Yeeri immiye; Doono Yeeriyoo tiijjii daammiye; bi shigo galleteebe” iye.

²² Ebi bulli tunetaanoona Iyoobi axaaxoon shuuneyaanoone; Doono Yeerinoo gondiyaanoone.