Isiyaasi 9 - Kafa Linguistics Project

Diggee Taatoo Woyemmo Tuno

¹ Tunebaani xuuxeebee echetinaꞌoyich illa mandereyaachemmone. Yeeri, wonna Zebuloonee showoonaa Nifitaalee showoonon giishiitone; tunebaani woyemmi yemeenooch Yoordaanoosi aachee beqach, baharee gommi gaꞌooch beeti, aageteenaꞌocho tuneti Galiilin oogiyemmone.

² Manderoona shaꞌeebeeti asho oogeti bekkoon beeggiye; qitee yiirechi showooch kotetinaꞌoyichoo, bekko bekkehe.

³ Ne aageteenaꞌo meettemmoyich tuniito neene; emiroonoo boonoshich daakkihine. Asho maayoon bi qeciyooba, kecoonoo bi qoodehooba, bi emiroommon, ne aafoochaa emiremminaꞌone.

⁴ Miidiyameenaꞌo koyaa wottehooba bi tunetoommon, boonoshin maggeti waanjoon, boonoshi gogooch kindiibeeti gumboon, boonoshin xuuxiyechochi yaaboon, tiicheto neene.

⁵ Neexxiibeeti, ginee naayinaꞌochi caammoo bulli, damoona muureeti qoreddoo bulli, qaaqqooch miccemmone; gokkeshoo gettemmone.

⁶ Gaggeroo nooch shiijjetone; anaami bushoo nooch ichetone; taatittino bi kishooch tunemmone. Bi shigoo Worganikkiti Ciiccecho, Beshe Hakkechi Nuggishoo, Bulli Yemeenee Nihoo, Diggee Ukkiroo, getteyemmone.

⁷ Bi taatittinoyich daaro, bi diggoyichoo ciiro aalloone. Andee tiijjiree bulli yemeenooch beddaahaa, bi taatittinoon dayinnetoonaa cadiqoona, deggii neechoyich, manjiiyoyichoo, Daawitichi taatee qeenooch kotemmone; Beshe Mawe Doono Yeerichi qanaato ebin tuniyemmone.

Doono Yeeri Israꞌeeleenaꞌon Sheeremmo Tuno

⁸ Doono Yeeri Yaaqobi toommooch bi qaaroon deejjiye; Israꞌeeli toommoochoo dihiye.

⁹ Israꞌeelee asheenaꞌo bullinaa Shamaara beetinaꞌo bullina ebin ariyemminaꞌone; geecechinaꞌonaa babbereenaꞌona boonoshi tunetoyich ishichemminaꞌone:

¹⁰ “Xuuboona hakketi kexinaꞌo shekiretinaꞌone; tunebaani no, xareeti xaqqoona wochi haggemmo noone; caaree mixinaꞌo kuxaa ciiretinaꞌone; tunebaani no, yigee mixon keremmo noone” gettemminaꞌone.

¹¹ Ebich Doono Yeeri shixechinaꞌon boonoshi toommooch tiijjiye; boonoshi etteenaꞌonoo boonoshi toommooch tiijjiye.

¹² Aabi-keyo waanee Sooriyeenaꞌon, aabi-gimo waanee Filsixeemeenaꞌon bi deejjaa Israꞌeeleenaꞌon qooxxiyeete; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.

¹³ Tunebaani asheenaꞌo boonoshin sheerito waan boonoshi aafoon wochaaneenaꞌone; Beshe Mawe Doono Yeerinoo qaawaaneenaꞌone.

¹⁴ Ebich Doono Yeeri qelloonaa ceeroonon, yeebbee waamonaa kohoonon Israꞌeeleenaꞌo waanee ikke areddoon kuxxemmone.

¹⁵ Qelleenaꞌo geeneenaꞌonaa moogeeti asheenaꞌona tunemmona ceereenaꞌo kootoon dojjiibeeti keemechinaꞌone.

¹⁶ Hini maccoon yaabii beetinaꞌo murice gommona yaabitinaꞌone; yaabeebeeti maccoo gommoochee kechiꞌi yallyallimitone.

¹⁷ Ebich Doono Yeeri gurimaasheenaꞌona emiraachemmone; nihaalli bushiisheenaꞌonaa kenaalli maacheenaꞌonoyichoo ariqqeyaachemmone; bulliyona Yeerich qeyaaneenaꞌonaa gonde shuunechinaꞌonane; boonoshi bulli noonoochee gonde yibbaatoo kechiye; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.

¹⁸ Gonde shuunoo, guccinonaa angixonon michiibeeti qaaqqoommone; manje shaaroo micaa tuqii kaama kechiibeeti cufoommone.

¹⁹ Beshe Mawe Doono Yeeri kaaroona showoo miccemmone; ashoo qaaqqooch shookkeebeeti mixoommon tunemmone; koniyoona bi manoyich aaxxiyaachemmone.

²⁰ Qanni waanaa maaheete; tunebaani andoo shaacechinaꞌone; yoochi waanaanoo qooxxiyeete; tunebaani miyaacheete; asho bi ikkikkoona bi xiboochi meenon maayemmone.

²¹ Minaasi Efreemin, Efreemiyoo Minaasin maayemmone; Yihudi toommoochoo ikkittinoona tiyemminaꞌone; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.