Isiyaasi 8 - Kafa Linguistics Project

Asooree Gino Woyemmo Tuno

¹ Doono Yeeri taach ishichiye: “Ooge madoon daamiree, ‘Maheer Shalal Hashibaaz’ getiree doyeeti biroona kooribe.

² Tawoo gibeneeti miixeenaꞌo tuneti qeeshoo Uuriyinaa Yeberaakiyi bushoo Zakaariyaasinon ta qellich ceeggemmo taane” iye.

³ Tawoo keemechi waan shaggeho; biyoo xifaꞌa anaami bushoon shiyahan. Aroochee Doono Yeeri taach ishichiye: “Bi shigoon Maheer Shalal Hashibaaz getiree shigiibe.

⁴ Bushoo ‘Taabbo, taande!’ geton bi hakkoyee shiichi, Damaasiqee gaannoonaa Shamaaree kecoonon Asooree taatoo keci daammemmone” iye.

⁵ Doono Yeeriyoo wochinnoon taach ishichiꞌi gettiye:

⁶ “Hini asheenaꞌo nibboona wocciibeeti Salihoomi aacinaꞌon qajjiichii, Resininaa Remaliyichi bushoona boonoshi emiritoyich

⁷ Doono ta, Asooree taatoon giidechi bi ginee naayinaꞌona tookki boonoshi toommooch deebemmo taane; Efiraaxisi aaco ceenniꞌi bi gaagemoon capphii ufoommon, ufebee woyemmone;

⁸ ufebee Yihudee showooch shaggemmone; qooxibeeshoo beshemmone; qettooch beddaahaa beddemmone. Amanuꞌeelo! Yaggeeti bi qosheenaꞌo ne showoon tuggoochee tuggooch beddaahaa qerii beetinaꞌone” iye.

⁹ Aageteenaꞌote, koyooch kiceebote; tunebaani tiishemmo ittoshine. Wohi showooch beetinaꞌote, bulla ellebote; ginee koyoyich qannibote; tunebaani keqqibote. Eeha, ginee koyoyich qannibote; tunebaani keqqibote.

¹⁰ Yeeri noonna tookkii bi tunetoyich, koceebotalli ittoshich kaameyaachemmone; yibbaatebotalli ittoshi yibbaatoo manjaachemmone.

Doono Yeerin Asheenaꞌo Gibenemmoyich Getteyoo

¹¹ Doono Yeeri giidechi bi kishoon ta toommooch geddiꞌi, ebi asheenaꞌochi gommon ta dabbaachemmoyich taach gettiye; ishichiinoo iye:

¹² “Ebi asheenaꞌo koceyoone ii beeti mooyon koceyoo gettaahote; boonoshi shattiibeeti mooyonoo shati keqqiyaahote.

¹³ Tunebaani Beshe Mawe Doono Yeeri ta, yaafoo ta tunoon gabibote; ittoshi shattemmo taan baachiye; ittoshi keqqemmoo taach baachiye.

¹⁴ Tawoo yaafee kexon tunemmo taane; tunebaani Israꞌeelee yareenaꞌoyich tephemmi xaqqoon, yexi dichemmi xaqqee guudon tunemmo taane; Yerusaalemi asheenaꞌoyichoo shaachoonaa olloonon tunemmo taane.

¹⁵ Boonoshiichee meetinaꞌo tepheyemminaꞌone; dihireeshoo tiishemminaꞌone; shaachoonoo yeshaa hammemminaꞌone” iye.

¹⁶ Miixittinoon qodi cuye; sheeroonoo kaafi nashiree, ta dabbeenaꞌoyich imbe.

¹⁷ Bi aafoon Yaaqobichi yareenaꞌo waanee bi wochitaanona, Doono Yeerin quyemmo taane; biinoo gibenemmo taane.

¹⁸ Ebiyoche taannaa Doono Yeeri taach immiti ta bushiisheenaꞌona, Tsiyooni guudi toommeexi Beshe Mawe Doono Yeer waanee Israꞌeeleenaꞌoyich malletoonaa worganikkiti mooyona noone.

¹⁹ Asheenaꞌo ittoshin “Daccdacciibeeti, wottoo shaashikkeebeeti qaaxechinaꞌonaa allaameenaꞌonon echebote” gettemminaꞌone. Asheenaꞌo boonoshi Nuggishoon echi bedaacheete? Kashechochon qitoon echo qaawiyehe?

²⁰ Ittoshi, Doono Yeerichi sheeroonaa miixittinoona hambote; ebi qaaroon geto boonoshi qayigaata, haree bekko boonoshich bekkeyaachemmone.

²¹ Boonoshiyoo xuuxebee, shaacebee showee toommooch yallyallimemminaꞌone; shaacoochee tiyitona ippoona kaama ciinibee boonoshi taatoonaa Nuggishoonon uppemminaꞌone.

²² Aroochee showooch ciiniree xuuxoon, manderoonaa ciitoonon beeggemminaꞌone; dunne manderooch duppeyemminaꞌone.