Isiyaasi 7 - Kafa Linguistics Project

Taatoo Akaazich Waati Wocho

¹ Uziyaahi bushoochi bushoo, Yotaamichi bushoo Akaazi Yihudee taatoo tuneꞌi beehooba, Sooriyee taatoo Resininaa Israꞌeelee taatoo Remaliyichi bushoo Feqaahina Yerusaalemin kocha kechiyeete; tunebaani kochii yeshon hakkaaneenaꞌone.

² Daawitichi yareenaꞌoyich, “Sooriyeenaꞌonaa Efreemichi yareenaꞌona guuphitinaꞌone” getaa getteehe. Ebich Akaazinaa bi asheenaꞌonochi mullo keqqoona, yongo shuurikkiibeeti kubbi mixon shaahiye.

³ Doono Yeeriyoo Isiyaasich ishichiye: “Neennaa ne bushoo Sheꞌaar Yashuubina Akaazina danoyich qoredda machechochi budo waan daammiibeeti gommooch, damba qachi kote aachi bobbee gocooch keyote.

⁴ Taatoo Akaazichoo ishichiree gete: ‘Neen ariibe; cikkibe; shattaahine. Ebi micciꞌi cufiibeeti gutte michi xugoomminaꞌo tuneti Sooriyee taatoo Resininaa Remaliyichi bushoonoyich ne mullo keqqaaye.

⁵ Sooriyeenaꞌo, Efreeminaa Remaliyichi bushoona tookkii neen koyoyich ishichiꞌi koceetinaꞌone.

⁶ “Damba keyiree, Yihudin koyi xuuxiiree yeshone. Xabeelichi bushoonoo arooch taatiibone” itinaꞌone.

⁷ Ebich Nuggishoo Doono Yeeri ishichiye: Ebi boonoshi koceeti mooyo ciroona tuneyaachemmone.

⁸ Sooriyeenaꞌochi shimbo Damaasiqine; Damaasiqi shimbo Resinine; Efreemiyoo shichaa uuche nati daggooch tiishemmone; ebiyee bekk aagetee showoo tuneyaachemmone.

⁹ Efreemi shimbo Shamaarine; Shamaarichi shimbo Remaliyichi bushoone. Illa taan gibenoona kuppho ittoshi qayigaata, ciroona manjiree neexeyaachemmo ittoshine’ gete” iye.

¹⁰ Wochinnoon Doono Yeeri Akaazich ishichiye:

¹¹ “Desh oppee hoonoochee woyee damba shimaayoochee malletoon ne Nuggishoo Doono Yeeri taan echebe” iye.

¹² Tunebaani Akaazi “Ta echeyaache; Doono Yeerinoo phireyaache” iye.

¹³ Isiyaasiyoo ishichiye: “Daawitichi yareenaꞌote, waayebote. Ashoon ittoshi taahiito giishetaa wotta ta Nuggishoon taahiiya iyote?

¹⁴ Ebich Doono Yeeri bi qelloona malletoon ittoshich immemmone. Ebiyoche gidiidee yeqqefemmine; anaami bushoonoo shiyemmine; bi shigoonoo Amanuꞌeeli getiree shigiyemmine.

¹⁵ Gondoon shixo, deꞌoon shuno bi hakkiyooba ejjoonaa eeyonon maayemmone.

¹⁶ Tunebaani nallefoo gondoon shixo, deꞌoon shuno bi hakkoyee shiichiree ne shatteti gutte taateenaꞌo showoo ashaallo tunemmone.

¹⁷ Efreemi Yihudiyee bi bariti aaboochee tiijjiꞌi ebiyee aaf tunee ariyaani gonde yemeenoon, Doono Yeeri neennaa ne asheenaꞌonochi toommooch, ne nihoochi yareenaꞌo toommoochoo deebemmone; ebiyoo Asooree taatoo womone” iye.

¹⁸ Aroobee yemeenooch Doono Yeeri Abbaayi aachi gashoochee Gibitseenaꞌon yaammochoommon, Asooreenaꞌonoo boonoshi showoochee maxochoommon shennoona ceeggemmone.

¹⁹ Boonoshiyoo waaree baraheexi bambooch, xaqqee gogginooch, angichi tushoo bulliich, miinji gaddo bulliichoo buundemminaꞌone.

²⁰ Aroobee yemeenooch Doono Yeeri aacoyee beqachee bi kiraayiti appoona, ebiyoo Asooree taatoona, ittoshi qelli eexonaa ittoshi baateexi eexonon, ittoshi ishaanoonoo caggemmone.

²¹ Aroobee yemeenooch ikke ashich ikke gidereenaa gutte bagoona baach echemmone.

²² Eboshi wodde ejjoon boonoshi immii beetoyich, asho ejjoon maayemmone; are showooch echeto bulliyoo ejjoonaa eeyonon maayemmone.

²³ Aroobee yemeenooch hume sheqeelee birewa bede, hume woyinee qomboo beeti budon guccinonaa angixona bullemmone.

²⁴ Showoo bullin guccinonaa angixona bulletoyich, asho cooxon wuxoyich, maꞌoonaa shangoonon yeshiree arooch hammemmone.

²⁵ Guccinonaa angixonon shatiree, kootteroona gocheebee echeti geppeenaꞌo bulliich koniyoona hamaachemmone; miimonaa bageenaꞌonochi kuppee budon tunemmone.