Isiyaasi 66 - Kafa Linguistics Project

Aageteenaꞌo Toommooch Yeeri Nallemmo Tuno

¹ Doono Yeeri ishichiye: “Shimaayoo ta taatee qeenone; showoo ta baatoo neexxemmi xaaꞌoone; ishigaata taach ittoshi haggemmi kexo am shaahoone? Ta kashemmi xaaꞌochi amoommone?

² Ebi bulli mooyon hallito taane; ebich ebi bulli mooyo taachone. Tunebaani ta ciinnaabeeto, boonoshi mullo tiishetinaꞌo waan, qelloon giishiyee ayaanechinaꞌonaa ta qaaroon oogii beetinaꞌona waaniye.

³ “Taach gattoon guuriibeeto ashoon guurii beetoommone; bagee baaddoon deejjiibeeto kunaanee qettoon qimii beetoommone; maayi buuroon giddiibeeto gudichi damoon giddii beetoommone; shalligichee ixaanoon shookkiibeeto shahalloon galletee beetoommone. Eboshi boonoshi hajjee gommon kaacona boonoshi eeꞌe mooyona emiriyeete.

⁴ Ta ceegaa koniyoona wochoo bi qajjitoyich, ta yibbaatetaa elloon boonoshi qajjitoyich, ta aafoochaa gonde mooyon boonoshi tuniitoyich, ta emiraanee mooyon boonoshi shunnitoyich, iritoo boonoshi toommooch shaggemmoyich tuniyemmo taane; boonoshi shattiti mooyon boonoshi toommooch deebemmo taane” iye.

⁵ Doono Yeerichi qaaroon shattii beetinaꞌote, bi qaaroon waayebote: “Ittoshin shixxiibeeti, ta shigoyich ittoshin yookkiibeeti ittoshi maneenaꞌo ‘Ittoshi emiroon no beeggemmoyich, eke Doono Yeeri bi oogoon bekkiibe’ itinaꞌone; tunebaani yeellemminaꞌo boonoshi qelloona boonoshine.

⁶ Katemoochaa cookee beeton waayebote. Yaafee kexoochaa cookee beeton waayebote. Ebiyoo Doono Yeeri boonoshi shuunetoommon bi etteenaꞌo toommooch bi shuunetoyich waayeebeeti qaaroone.

⁷ “Tsiyooni maaxoo maataan beetaa shiichaꞌa bushoon shiyahane; maaxoo biin shoodoyee shiichaꞌa anaami bushoon shiyahane.

⁸ Ebiyoommi mooyon konine waayeto? Ebiyoommi mooyon konine beeggito? Ikke showoo ikke qemona, ikke aagetoo qillifee yexooch shiijjoon hakkehe? Tsiyooni maaxoo biin maammona bekkech anaami bushiishoon shiyetine.

⁹ Shiijj bedditon bi shiijjeyaachemmoyich tuniyehote?” iye Doono Yeeri. “Bi shiijjemmoyich tuniyaabeeti ta, shiyi maacoon hiccehote?” iye ne Nuggishoo.

¹⁰ Yerusaalemin shunnii beetinaꞌote, ittoshi bulli biinna tookki emiri wucwucote. Biich eeppitinaꞌote, ittoshi bulli biinna tookki oogichi emiribote.

¹¹ Ebiyoo goggiibeeti bi xanoochee xamiree ittoshi michemmoyich, beshaa beshe bi gaannoochee gaawichi uyiree, ittoshi emiremmoyichiye.

¹² Doono Yeeri ishichiye: “Diggoon woce aacochoommon biich woddiyemmo taane; aageteenaꞌo gaannoonoo ceeni aacochoommon bi waan wochemmo taane; aroochee xammemmo ittoshine; bi sheenooch tiqqeyemmo ittoshine; bi doshee toommoochaa capphemmo ittoshine.

¹³ Indee bi bushoon bi goggiyoommon ittoshin goggiyemmo taane; Yerusaalemaa goggemmo ittoshine.

¹⁴ Ebin ittoshi beegiyooba ittoshi mullo emiremmone; ittoshi shaawusho mocoochoommon nollemmone; Doono Yeerichi kishoo bi guuninaꞌona tookkii tuno arichemmone; bi kaaro bi etteenaꞌo toommooch tunemmone.

¹⁵ “Ebiyoche, Doono Yeeri qaaqqoona woyemmone; bi gaarinaꞌoo yubee yongoomminaꞌone; bi ippoon kupphe bi kaaroona, bi noggoonoo aaxxeebeeti qaaqqoona bekkiyemmone.

¹⁶ Meeno taheto bulli toommooch Doono Yeeri qaaqqoona, goraadoonoo nallemmone; Doono Yeeri meeti asheenaꞌon wuxemmone” itone.

¹⁷ Doono Yeeri ishichiye: “Boonoshi daggoochee ikkoon dabbii bechee michi xaaꞌooch hamoyich, boonoshi qelloon barii, yaafii beetinaꞌo, gudichi meenon, tiyaariibeeti mooyonaa iiccoonon maa beetinaꞌo ikkittinoona aallemminaꞌone.

¹⁸ Boonoshi shuunoonaa boonoshi gaboonon ta ariyaa beetoyich, aageteenaꞌonaa baribare noonoona yibbaateebeeti asheenaꞌonon kicoyich woyemmo taane; boonoshiyoo waaree ta oogoon beeggemminaꞌone;

¹⁹ boonoshi daggooch malletoon geddemmo taane; boonoshi daggoochee muriccitinaꞌon, ta mooyon waayeyaani, ta oogoon beegaani, aageteenaꞌo waan, Tarishesh, Fuux, shangoon awureebeeti Luudi asheenaꞌo waan, Tubaal, Yawaan, wohooch beeti buure showoochoo daachiyemmo taane; boonoshiyoo aageteenaꞌo daggooch ta oogoon awaajjemminaꞌone.

²⁰ Doono Yeerich giddeebeeti buuroochoommon, ittoshi maneenaꞌon aagetoo bulliichee, haresheenaꞌona, baribare gaarinaꞌona, bicereenaꞌona, gaaleenaꞌona, yaafeeti ta guudo Yerusaalem deebemminaꞌone. Ebiyoo Israꞌeeleenaꞌo maayi buuroon xalle qiicoona Doono Yeeri taach yaafee kexooch boonoshi deeboommoniye” iye Doono Yeeri.

²¹ “Boonoshi daggoochee ikkikkeenaꞌon, qeesheenaꞌonaa Leweenaꞌonon tuniyemmo taane” iye Doono Yeeri.

²² “Ta hallemmi andire showoonaa andire shimaayoona ta aafooch manjiree beeyemmo bi tunoommon, ittoshi yaroonaa ittoshi shigoona manjiree beeyemmone.

²³ Agenee keyoochee agenee keyooch, shambetoochee shambetooch, asho bulli taach goyinnoyich ta aafooch woyemmone” iye Doono Yeeri.

²⁴ “Keyi hamibee ta toommooch hukkoon shuuneti asheenaꞌochi dubenoon beeggemminaꞌone; boonoshi hipperoo qitaachemmone; boonoshi qaaqqoo tahaachemmone; meeno taheto bullina ciigeyemmone” iye.