Isiyaasi 65 - Kafa Linguistics Project

Yeerichi Dayinnetoonaa Wodiyoona

¹ Doono Yeeri ishichiye: “Taan echeyaaneenaꞌoyich bekkehoye; taan qaawaaneenaꞌoyich danehoye; ta shigoon ceegaani aageteenaꞌoyich ‘Hini tawoche, hini tawoche!’ iyoye.

² Boonoshi mullee daaggoona hammiibeeti, gonde gommona hammiibeeti, hukkechi asheenaꞌoyich, heeyo bullin ta kishoon yaggiyoye.

³ Ebi asheenaꞌo ta ciinnaa beetaa, bechee mixo beetoochaa deejjoona, xuubee toommoochaanoo ixaanoon shoohona bulli aaboon taan ippii beetinaꞌone.

⁴ Maashooch kotee beetinaꞌo, qere xaaꞌooch xumoon beshii beetinaꞌo, gudichi meenon maa beetinaꞌo, boonoshi qiicooch eeꞌe meechi cabboon geddiibeeti asheenaꞌone.

⁵ Boonoshiyoo bareenaꞌon, ‘No, yaafoo no tunetoyich, no waan giddeyaahote’ ii beetinaꞌone. Eboshi ta muddooch cufoomminaꞌone; heeyo bullin aaxxeebeeti qaaqqoomminaꞌone.

⁶ Ebiyoche, ta aafooch kooreetone; cikki qayaachemmo taane; boonoshich qoccemmo taane; boonoshi shuunoommon boonoshich shuunemmo taane” iye.

⁷ Doono Yeeri ishichiye: “Guudinaꞌoochaa ixaanoon boonoshi shookkitoyich, geppeenaꞌoochaa ta shigoon boonoshi giishiitoyich, ebiyee aaf boonoshi shuuneti shuunoyich, boonoshinaa boonoshi qaabbechinaꞌonochi axaaxoyich, boonoshi shuunoommon boonoshich shuunemmo taane” iye.

⁸ Doono Yeeri ishichiye: “Woyinee qomboochee woyino danehooba, ‘Diiroo arooch bi beetoyich aalliyaahote’ bi getteeyoommon, tawoo ta guuninaꞌoyicha getiree boonoshi bullin aalliyaachemmo taane.

⁹ Yaaqob waanee shiijjeroon, Yihudi waanee ta guudinaꞌon woraashemminaꞌon deebemmo taane. Ta kaaccetinaꞌo showoon woraashemminaꞌone. Ta guuninaꞌoo arooch beeyemminaꞌone.

¹⁰ Taan qaawiibeeti ta asheenaꞌoyich, Shaarooni bagee gaddo, Akoori bamboo miiminaꞌo miqqee xaaꞌoo tunemmone.

¹¹ “Tunebaani Doono Yeeri taan qajjiti ittoshin, yaafeeti ta guudon batteti ittoshin, Gaadi getteeti nuggishoyich madoo qanniiti ittoshin, Meni getteeti nuggishoyich bacceeti woyinee xoofoon qanniiti ittoshin,

¹² goraadoyich beshiiree immemmo taane; ittoshi bulliyona guureyoyich yittemmo ittoshine. Ta ceegaa, ittoshich ta yibbaatetaanoo waayo qajjito ittoshine; ta aafooch gonde mooyon tuniihote; taan emirikkaani mooyonoo shunniyote” iye.

¹³ Ebich Nuggishoo Doono Yeeri ishichiye: “Ta guuninaꞌo maayemminaꞌone; tunebaani ittoshi shaacemmo ittoshine; ta guuninaꞌo uchemminaꞌone; tunebaani ittoshi shachewemmo ittoshine; ta guuninaꞌo emiremminaꞌone, tunebaani ittoshi yeellemmo ittoshine;

¹⁴ ta guuninaꞌo mullee emiroochee tiyitona shoddemminaꞌone; tunebaani ittoshi mullee ayinoochee tiyitona cookemmo ittoshine; ittoshi mullo tiishetaa woowo gettemmo ittoshine.

¹⁵ Ittoshi shigoon ta kaaccetinaꞌo waanaa maxxaaroyich tuniyemmo ittoshine; Nuggishoo Doono Yeeri ta, ittoshin wuxemmo taane; tunebaani ta guuninaꞌon bariti shigoona ceeggemmo taane.

¹⁶ Ebich showoochaa diiroon qollaabeeto, ibere Nuggishoochi shigoona ebin tuniyemmone; showoochaa wogeebeeto ibere Nuggishoona wogemmone; ebiyoo wonnee xuuxo batteetonaa ta aafoochee ikitona bi tunetoyichiye” iye.

Andire Showoonaa Shimaayoona

¹⁷ Doono Yeeri ishichiye: “Ebiyoche, andire showoonaa andire shimaayoonon hallemmo taane; ebiyee aafi mooyinaꞌo gabeyaachemminaꞌone; shalligeyaachemminaꞌone.

¹⁸ Tunebaani ebi ta hallitona bulli yemeenooch emiribote; emiroonoo wucwucote. Yerusaalemin emiroyich bi asheenaꞌonoo emiroona wucwucoyich hallito taane.

¹⁹ Tawoo ta qelloona Yerusaaleminaa ta asheenaꞌona oogeton emiremmo taane; ebiyee bekk eefo tuneba bunnee qaaroo aroochee waayeyaachemmone.

²⁰ Ebiyee bekk giisheche aaboon baach beeyemmi gaggeroo woyee eenon miyaani geeno daneyaachemmone; balle nattiti asho bi qitigaata gooraalloon qititooch haddeyemmone; ikke asho ball nataanoon bi qitigaata bi axaaxoyich uppeto tune haddeyemmone.

²¹ Asheenaꞌo kexon hagiree arooch beeyemminaꞌone; woyinoon bechiree bi aafoon maayemminaꞌone.

²² Bareenaꞌo beeyemmoyich kexon hagaachemminaꞌone; bareenaꞌo maayemmoyich bechaachemminaꞌone; michi eeno genjoommon, ta asheenaꞌochi eeno genjemmone; ta kaacceti asheenaꞌo boonoshi kishee shuunoona meeti yemeenoon emiremminaꞌone.

²³ Boonoshinaa boonoshi bushiishoona Doono Yeerina diireetinaꞌo boonoshi tunetoyich, duuboon aayaachemminaꞌone; aallemmi bushiishoon shiyaachemminaꞌone.

²⁴ Taan boonoshi ceegoyee shiichi wochemmo taane; batt yibbaate boonoshi beetaa waayemmo taane.

²⁵ Okeroonaa bagee baaddoona ikkooch tookki maayemminaꞌone; daaheroo gattoochoommon maayi tulloon qaachemmone; butto dingeroyich maayoon tunemmone; yaafeeti ta guudo bulliichaa qaakko woyee aallo boonoshi toommooch shagaachemmone” iye Doono Yeeri.