Isiyaasi 62 - Kafa Linguistics Project

¹ Bi cadiqittino haree bekkoochoommon, bi wodoo gippee aaxxoochoommon, bi bekkammi wottoon, Tsiyoonichon cikkaache; Yerusaalemichonoo kasheyaache.

² Aageteenaꞌo ne cadiqoon, taateenaꞌo bulli ne oogoon, beeggemminaꞌone; Doono Yeeri neen shigiyemmi, andire shigoona ceekkemmi neene.

³ Newoo, Doono Yeerichi kishooch beeti gaawe gubbichoommon, ne Nuggishoo kishooch beeti taatee ukoommon, tunemmi neene.

⁴ Illa ebiyee bekk Duppeti getaa ceekkeyaachemmi neene; ne showoo Shokkaachoo Echeto getteyaachemmone; tunebaani Ta Emiroo Arooch Beeti getteyemmi neene; ne showee kenechi tunemmine; Doono Yeeri neenna bi emiritoyich, ne showeyoo Kenechi getteyemmine.

⁵ Gurimaashoo gidiideen shaaggiꞌi bi daamoommon, ne bushiisheenaꞌo ne showoon hajjemminaꞌone; woꞌee keno woꞌeena bi emiroommon ne Nuggishoo neenna emiremmone.

⁶ Yerusaaleme, qayechinaꞌon ne uxereenaꞌooch kotiito taane; boonoshiyoo xumoonaa areddoonon ciroona cikkaachemminaꞌone; Doono Yeer waan cookii beetinaꞌote, ciroona kasheyaahote.

⁷ Yerusaalemin bi manjii neechimmi wottoon, showoo bulliich galleteeti bi tuniimmi wottoon, biin kashiyaahote.

⁸ Doono Yeeri bi qanne kishoona, giidechi bi mochoonoo ishichiꞌi wogehe: “Ne maayoon ne etteenaꞌo maayemmoyich ciroona wochinnoon tuniyaachemmo taane; ne aajjeti woyinee uyoonoo shiqqeenaꞌo ciroona wochinnoon uyaachemminaꞌone.

⁹ Tunebaani qeccitinaꞌo aroon maaree, Doono Yeeri taan galletemminaꞌone; kicitinaꞌo aroon ta yaafee kechi addibaaboochaa uchemminaꞌone” iye.

¹⁰ Beshebote; kelloo waan beshebote; asheenaꞌoyich gommon qanniibote; shuunebote; gamini gommon shuunebote; xaqqeenaꞌon bayote; asheenaꞌo beeggemmoyich malletoon kaama tiijjibote.

¹¹ Doono Yeeri showee toommo bulliich ishichiꞌi awaajjitone; “ ‘Ittoshin Wodiyecho waa beetone; bi wojjoo bi kishoochiye; bi qoccemmi gatiyoo bi aafooch beetone’ getiree, Tsiyooni maache busheyich getote” iye.

¹² Boonoshiyoo, Yaafeeti Asheenaꞌo, Doono Yeeri Biisheti Asheenaꞌo, getaa ceekkemminaꞌone; newoo, Qaaweyaabeeti, Duppeyaani Katemee, getaa ceekkemmi neene.