Isiyaasi 60 - Kafa Linguistics Project

Yerusaalemichi Gubbi Oogo

¹ “Yerusaaleme, ne bekko waatoyich tiyi ceechibe; Doono Yeerichi oogee yiiroo ne toommooch aaxxemmone.

² Ebiyoche, manderoo showoon, dunne manderoo asheenaꞌon guuppemmone; tunebaani Doono Yeeri ne toommooch bekkemmone; bi oogee yiiroo ne toommoochaa bekkemmone.

³ Aageteenaꞌo ne bekkooch, taateenaꞌo ne haree gaargaarooch woyemminaꞌone.

⁴ “Ne aafoon kaachiree, ne guudoona ciine; eboshi bulli ikkittinoona kiceeree ne waan woyemminaꞌone; ne anaami bushiisheenaꞌo wohoochee woyemminaꞌone; ne maache bushiisheenaꞌo tiqqetaa woyemminaꞌone.

⁵ Ebin beegiree emiroona wucwuccemmi neene; ne mulloo oogichi emiremmone; ebiyoo bahareexi gaanno ne waan wottemmo bi tunetoyich, aageteenaꞌo gaanno ne waan woyemmo bi tunetoyichiye.

⁶ Miidiyaminaa Efaahinoochee waati, bushe dofee gaaleenaꞌo ne showooch ceennemminaꞌone; bulliyona Sheebee woyemminaꞌone; aachoonaa ixaanoonon deebemminaꞌone; Doono Yeerichi galletoon awaajjemminaꞌone.

⁷ Qedaaree bageenaꞌo ne waan kiceyemminaꞌone; Nebayootee bagee baaddeenaꞌo deejjoyich neech gaaccemminaꞌone; ta deejjee gudooch giddoyich bedditinaꞌo tunemminaꞌone; oogechi ta yaafee kexon oogiyemmo taane.

⁸ “Boonoshi kexooch wotteebeeti uggeenaꞌochoommon, quboochoommonoo, yoobbiibee waabeeti eboshi konoshine?

⁹ Tarisheshinaa woheexi buure showee gashoonoochee tiyii ne asheenaꞌon deebiibeeti markabeenaꞌone. Aageteenaꞌo bulli bi asheenaꞌon oogiyemmoyich tuniiti, Israꞌeeleenaꞌochi Yaafoo tuneti Doono Yeerichi shigoon oogiya, birewoonaa aachoonon neech deebii beetinaꞌone.

¹⁰ “Dallaaweenaꞌo ne uxeroon wochi uxeremminaꞌone; boonoshi taateenaꞌo neech maddemminaꞌone. Ta kaaroona neen yexxeto taane; tunebaani and neech ariqqemmo taane.

¹¹ Asheenaꞌo aageteenaꞌochi gaannoon, yixiibeeti boonoshi taateenaꞌona tookki deebemminaꞌo boonoshi tunetoyich, ne kelleenaꞌo xumoonaa areddoonon, bulli aabooch hicheyaachemminaꞌone.

¹² Neech maddeyaani aageteenaꞌonaa taatee showeenaꞌona aallemminaꞌone; ciroona hidaa aallemminaꞌone.

¹³ “Ta yaafee kechi xaaꞌoon macecikkoyich, Libanoosichi oogee yiiroo tuneti yigoo, naddee mixonaa ciidoona, ne waan woyemmone; ta baatoo neexxiti xaaꞌoon oogiyemmo taane.

¹⁴ Neen neexxii hajjitinaꞌochi yareenaꞌo yiti goyinnebee, ne waan woyemminaꞌone; neen hoxetinaꞌo bulli ne baatooch goyinnemminaꞌone; neenoo ‘Doono Yeerichi katemee, Israꞌeelee Yaafoochi tuneti, Tsiyoone’ geti ceeggemminaꞌone.

¹⁵ “Ebiyee aaf duppeti, shicheti, koniyoona aroona besheyaane, ne tunetaanoona, ta bulli yemeenoon yebeneeti, bushaa bushich emiree, neen tuniyemmo taane.

¹⁶ Bushiishoo xanon xamoommon, aageteenaꞌonaa taateenaꞌonochi gaannoon xammemmi neene; Doono Yeeri ta, Yaaqobi goyinneebeeti Giidechi Nuggishoo, neen Wodiyechonaa neen Biishechona ta tunoon ariyemmi neene.

¹⁷ Tawoo gooshee keroon aachoon, xuuree keroon birewoon, michi keroon gooshoon, xaqqee keroon xuuroon, deebemmo taane. Diggoon ne ukkiroo, cadiqoonoo ne iraashoo, tuniyemmo taane.

¹⁸ Ebiyee bekk ne showoochee xukko, ne showee danoochee happeyoonaa aalloona, waayeyaachemmone; ne uxereenaꞌon wodeenaꞌo, ne kelleenaꞌonoo galleteenaꞌo, geti ceeggemmi neene.

¹⁹ Ebiyee bekk areddoon neech bekkoon tunemmi aabe tooneene; xumoonoo neech ceechoon tunemmi agene tooneene; Doono Yeeri bulli yemeenee ceechoon neech tunemmone; ne Nuggishoo neech oogee yiiroon tunemmone.

²⁰ Ne aabe giyaachemmine; ne agene tahaachemmine; Doono Yeeri bulli yemeenoon ne ceechoo tunemmo bi tunetoyich, ne eeppi yemeeno ciiremmone.

²¹ Ne asheenaꞌo bulli cadiqeenaꞌo tunemminaꞌone; showoon bulli yemeenooch woraashemminaꞌone; boonoshiyoo, ta oogo bekkemmoyich ta shuuneti ta kishee shuuneenaꞌo, ta bechiti becheenaꞌone.

²² Giisheche ittoshi asheenaꞌo humoon, meetaani asheenaꞌoo giidechi aagetoon, tunemminaꞌone. Ta, Doono Yeeri taane; bi aabooba ebin kaate tuniyemmo taane” iye.