Isiyaasi 6 - Kafa Linguistics Project

Keemecho Tunoyich Isiyaasi Ceekko

¹ Taatoo Uziyaahi qititi natooba, Doono Yeeri genjoonaa kaama hashekkimoona tuneti taatee qeenooch koteꞌi beeton beeggeho; bi qoreddee caappoo yaafee kexon ceennitone.

² Surafeeleenaꞌoo biyee tookk neexetinaꞌone; boonoshi ikkikkoyich shiritti shiritte qoshoo beetone. Gutte qoshoona boonoshi aafoon qerii beeheete; gutte qoshoona boonoshi baatoon qerii beeheete; gutte qoshoonoo yoobbii beeheete.

³ Boonoshinaa boonoshina ceegeebee, “Beshe Mawe Doono Yeeri yaafoo, yaafoo, yaafoone; bi oogee yiiroo showoo bulliich ceennitone” ii beeheete.

⁴ Boonoshi cookee qaaroochee tiyitona yaafee kexo bi kotoochaa shuuriye; cufoo arooch ceenniye.

⁵ Tawoo, “Ta noonoo eeꞌeti asho taane; ta beetoo, boonoshi noonoo eeꞌeti asheenaꞌo daggoochiye. Taatoo, Beshe Mawe Doono Yeerin ta aafoona ta beeggetoyich, aalleto taane; taach woowo!” iyo.

⁶ Aroochee surafeeleenaꞌoochee ikkoo, deejjee gudooch beeti qaaqqee bunoochee gucetoona yechiꞌi yoobbiibee ta waan waahe.

⁷ Ta noonoon ebi qaaqqoona tuppheꞌi, “Ebiyoche, ebi ne noonoon bi tupphetoyich, ne xuꞌo ne waanee wokkitone; ne axaaxoo maareetone” iye.

⁸ Aroochee Doonochi qaaro, “Konin wochebote? Konine nooch hammemmo?” ii bi beetaa waayeho. Tawoo “Taan wochebe; ta hammemmo taane” iyo.

⁹ Biyoo taach ishichiye; “Ishigaata, hamiree ebi asheenaꞌoyich ishichibe: ‘Waayoon waayeebeeto ittoshine; tunebaani shalligaachote; ciinon ciinniibeeto ittoshine; tunebaani beegaachote’ gete.

¹⁰ Boonoshi aafoona boonoshi ciinaachemmoyich, boonoshi waamona boonoshi waayeyaachemmoyich, boonoshi mulloona boonoshi shalligaachemmoyich, ta waan wotteree boonoshi wodaachemmoyich, ebi asheenaꞌo mulloon muumiibe; boonoshi waamon ulliibe; boonoshi aafoon kaafe” iye.

¹¹ Tawoo “Ta Doonocho, ebi tunemmo aati wottooniye?” iyo. Biyoo taach wochiꞌi ishichiye; “Katemeenaꞌo beeyemmon mucceꞌi happeemmi wottoon, kexinaꞌo ashaalli onoon tunemmi wottoon, showee ciroona shokko echemmi wottooniye.

¹² Doono Yeeri ta, asheenaꞌon wohi showooch ta daachiitaa showoo ciroona shokko echemmone.

¹³ Aashire ashoochee ikkoo bi eche gaatoona, geellee mixo woyee meellee mixo kuxaa aalloommon aallemmone; bi xugo yaafeeti yaroon tunemmone” iye.