Isiyaasi 59 - Kafa Linguistics Project

Asheenaꞌochi Axaaxoyich Keemecho Kaaro

¹ Doono Yeerichi mochoo wodiyoon mawiyaanoone; bi waamo waayoyich ulleyaanoone.

² Tunebaani ittoshi xuꞌo ittoshinaa ittoshi Nuggishoonochi daggooch barbarittinoon gedditone; ittoshi axaaxoo bi aafoon ittoshi waanee bi wochemmoyich tuniitone; ebich ittoshi qolloon waayeyaache.

³ Ittoshi kisheenaꞌo damoona, ittoshi yaphereenaꞌoo axaaxoona wooretinaꞌone; ittoshi noonoo kootoon, ittoshi heciyoo gonde mooyon yibbaatetone.

⁴ Dayinnetoon qaawiibeeto, nallee gabberooch iberittinoona hammiibeeto aalloone; gaacaalli mooyon gibenetinaꞌone; kootoon yibbaateheete; gondoon yeqqefeꞌi axaaxoon shiyiheete.

⁵ Dingeree gabexoon qoppiyeete; dooyidabbee woshiqoon yokkeheete; ebi gabexoon maammo qitemmone; aroochee ikkoon qofigaata dingero kechemmone.

⁶ Dooyidabbee woshiqoo tahoyich gaacaache; ebi are tahoona koniyoona bi qeddoon qeraache; boonoshi shuunoo gonde shuunoone; boonoshi kishoochoo hukkee shuunoo ceennitone.

⁷ Boonoshi baatoo gondooch wocciye; xalle damoon ukkoyich afaafineheete; boonoshi gaboo gonde gaboone; aalliyoonaa happoona boonoshi gommooch beetone.

⁸ Diggee gommon ariyaaneenaꞌone; boonoshi gommooch dayinneto aalloone; boonoshi boochoon xummiitinaꞌone; aroona hammiibeeto koniyoona diggoon daneyaache.

Asheenaꞌo Boonoshi Axaaxoon Aannoo

⁹ Asheenaꞌo ishichiyeete: “Dayinneto no waanee wokkitone; cadiqee shuunoo no waan shagaache; bekkoon qaawiyone; tunebaani manderoo tunehe; aabee kooyon quyehone; tunebaani manderoona shaꞌehone.

¹⁰ Aaf doogoochoommon xaqqee uxeree daggoochaa gaawgaawimiyone; aafaalleenaꞌochoommon gaawgaawimiyone; manderooch beetochoommon areddee aaboona tepheehone; giidechi asheenaꞌo aafoochaa qite asheenaꞌoommon tunehone.

¹¹ Diiboochoommon cookiyone; eeppaabeeti uggechoommon qaaddehone; dayinnetoon qaawiyone; tunebaani daneyaano noone; wodoon qaawiyone; tunebaani no waanee wokkiye.

¹² “No xuꞌo ne aafooch woddoone; no axaaxoo no toommooch miixee beetone; no xuꞌo noonna tookkii bi beetoyich, no axaaxoon ariyaabeeto noone.

¹³ Doono Yeeri toommooch hukkoon tiijjito noone; biin nookketo noone; no Nuggishoon dabboochee gubb wotteto noone; xuꞌoonaa gondoonon yibbaateto noone; no mullooch koteti kootoon yibbaateto noone.

¹⁴ Dayinneto gubb wottetone; cadiqoo wokkii neexetone; iberoo addibaaboochaa tepheetone; kaamoo gimon hakkaanoone.

¹⁵ Iberoo aalletone; gondoochee wokkimmo, bareenaꞌochi kuppee budo tunemmone” iyeete. Doono Yeeri ebin beeggiye; dayinneto aalletoyich ayiniye.

¹⁶ Ebi xukketinaꞌon gaachemmi asho ikkolla aallo tunoon beeggiꞌi worganehe; bi hajjee mochoo wudoon deebiye; bi cadiqoo biin deggii yechiye.

¹⁷ Cadiqoon getee ginee tahoochoommon tahemmone; bi shimboochoo wodiyoon xuuree ukoochoommon ukemmone; nichee kichoon tahoochoommon tahemmone; qanaatoon xappee qoreddoochoommon xappemmone.

¹⁸ Boonoshi shuuni shuunoommon boonoshich qoccemmone; bi etteenaꞌo toommooch naxoon, bi shixechinaꞌo toommoochoo kaaroon kindiyemmone; baharee gasheexi buure showeexinaꞌoyichoo boonoshi shuunetoommon shuunemmone.

¹⁹ Doono Yeeri, yuboo gasheebeeti ambamboochoommon woyemmo bi tunetoyich, aabi-gimo waan beetinaꞌo Doono Yeeri shigoon, aabi-keyo waan beetinaꞌoo bi oogee yiiroon shattemminaꞌone.

²⁰ “Biishecho Tsiyoon, boonoshi axaaxoochee wotteti Yaaqobi yareenaꞌo waan woyemmone” iye Doono Yeeri.

²¹ Doono Yeeri ishichiye: “Boonoshina tookki ta giyemmi wogo ebine: Ne toommooch ta kotiiti ta Ayaano, ne noonooch ta kotiiti qaaro, hanaachee tiijji bulli yemeenooch beddaahaa ne noonoochee, ne bushiisheenaꞌo noonoochee, ne bushaa bushiisheenaꞌo noonoochee baraachemmone” iye Doono Yeeri.