Isiyaasi 58 - Kafa Linguistics Project

Ibere Coomoo

¹ Doono Yeeri ishichiye: “Ne qaaroon qoophaanoon oogiiree cookibe; ne qaaroo shametoochoommon sharaalliibe; ta asheenaꞌoyich boonoshi xuꞌoon, Yaaqobichi yareenaꞌoyich boonoshi axaaxoon gete.

² Qemi qemona taan qaawiyeete; ta gommon ariyoonoo emiriyeete; tate mooyon tuniibeeti, boonoshi Nuggishoochi getoon qayaani asheenaꞌochoommon, dayinnetoon ta waanee qolleheete; ta waan katinonoo emiriyeete” iye.

³ Asheenaꞌo, “Ne ciinaanich amoyich coomiyone? Mooch ne haddaanich amoyich no qelloon giishiihone?” iyeete. Doono Yeeriyoo ishichiye: “Ittoshi coomii beehooba ittoshi mullee daaggoon tuniihote; ittoshi shuunechinaꞌon duꞌiihote.

⁴ Ittoshi coomiibeeto kaaroyich, koyoonaa hakka guutoon guriphonoyichiye. And ebi ittoshi coomii beetoommon coomibee, ittoshi qaaro damba bi waayeyemmoyich quyeyaahote.

⁵ Ta qaawaabeeti coomoo ebine? Asho bi qelloon bi giishiyemmo ebiyooba baachiye? Qiximmoochoommon bi yittemmoyich, dookoon tahe, tulloon bi toommooch bi shakkemmoyichiye? Coomoo ne iyaabeeto ebiniye? Doono Yeeri taan emirikkiibeeti aabo ebine?

⁶ “Ta qaawaabeeti coomoo, xuꞌoona cuchetinaꞌon ittoshi biichemmoyich, waanjeexi shachoon ittoshi kuxxemmoyich, neexaa hajjeetinaꞌon biishi ittoshi gawukkemmoyich, waanjoo bullin ittoshi tiichemmoyich toone?

⁷ Ittoshi maayoon shaacetinaꞌona tookki ittoshi qoodeyemmoyich, kechaalli girechinaꞌon ittoshi kexooch ittoshi deebemmoyich, tubbeton ittoshi beegiyooba ittoshi tajjemmoyich, ittoshi meechi xibeenaꞌoyich ittoshi aasheyaachemmoyich toone?

⁸ “Ebin ittoshi tuniigaata, ittoshi bekko haree aaboochoommon kechemmone; ittoshi wodoo kaate shaggemmone; ittoshi cadiqo ittoshi aafooch shiichemmone; Doono Yeerichi oogo ittoshi gubbaa tuneree ittoshin quyemmone.

⁹ Aroochee ittoshi ceegaa, Doono Yeeri ta eekkemmo taane; cookemmo ittoshine; tawoo ‘Hini tawoche’ gettemmo taane. Ittoshiyoo xuꞌee waanjoon ittoshi wokkiigaata, ashoon kishoona koyonaa gonde yibbaatoonon ittoshi qayigaata,

¹⁰ shaacetinaꞌoyich ittoshi maayoochee ittoshi qoodigaata, duꞌetinaꞌochi qaatoon ittoshi ceechigaata, ittoshi bekko manderoochaa aaxxemmone; ittoshi manderoo areddee aaboommon tunemmone.

¹¹ Doono Yeeri ta, ittoshin bulli aaboon yaabemmo taane; shuuꞌi showoochaa ittoshi qaatoon ceechemmo taane; ittoshi shaawushoon kupphiyemmo taane; aaco ucheeti bechee xaaꞌoommon, tahii ariyaani aachi xuuphoommon tunemmo ittoshine.

¹² Ittoshi shiijjereenaꞌo wonna happeeti buriceenaꞌon wochinnoon boonoshi xaaꞌooch shuunemminaꞌone; ittoshiyoo ‘Tiisheti uxereenaꞌon, gommechi beemi xaaꞌeenaꞌonoo wochii shuunechinaꞌo’ getteyemmo ittoshine” iye.

Shambetoon Oogiyoona Daneebeeti Gaaco

¹³ Doono Yeeri ishichiye: “Shambetee doyoon shaaddoochee ittoshi baatoon ittoshi wochigaata, yaafeeti aabooba ittoshin emirikkii beeton tuniyoochee ittoshi wottegaata, shambetoon emirikkito, Doono Yeerich yaafeeti aaboon oogoo ittoshi getigaata, ittoshi kaatta hamon qajjiꞌi ittoshi oogiigaata, ittoshin emirikkii beeton qaawoo ittoshi qayigaata, duube yibbaatoon ittoshi qayigaata,

¹⁴ Doono Yeeri taanna emiremmo ittoshine; showee toommeexi qaalle xaaꞌooch ittoshi beeyemmoyich tuniyemmo taane; ittoshi qaabbechi Yaaqobichi iristoochee daneebeeti mooyona ittoshi michemmoyich tuniyemmo taane; ebin getteto Doono Yeeri taane” iye.