Isiyaasi 57 - Kafa Linguistics Project

Israꞌeeleenaꞌo Shahalloyich Goyinno

¹ Cadiqeenaꞌo qitiyeete; deꞌe asheenaꞌo aalleheete; ebi konichi mulloocholla giyaache; koniyoona ebin gabaache; gonde mooyoochee boonoshi wodemmoyich boonoshi daammeyoon koniyoona shalligaache.

² Boonoshi shaaddo kaamoo tuneti asheenaꞌo qiti, diggee xaaꞌoon daneree kashemminaꞌone.

³ “Hini qaaxechichi bushiisheenaꞌote, hini shunimaayoonaa yahechinochi yareenaꞌote, hach giddebote.

⁴ Halla ittoshi cooqqiriibeeto koni toommoochiye? Noonoon wochii, heciyoonoo kaaccii ittoshi beeto koni toommoochiye? Ittoshi, hukkechinaꞌonaa dachechinaꞌonochi bushiishoo toono ittoshine?

⁵ Meellee mixinaꞌo daggoochaa, waajjechi michi baatoo bullinoochaa shunee mami qaatoona shallaaneebeeto ittoshine. Bamboochaa, xaqqee goggini daggoochaa ittoshi bushiishoon deejjiibeeto ittoshine.

⁶ Ittoshi nuggisheenaꞌo bambeexi naalle xaqqeenaꞌone; areenaꞌo ittoshich ixeenaꞌone; boonoshich uyee buuroon ukkiyote; maayi buuroonoo deebiyote; ishigaata ta ebi mooyoyich kaareyaachehote?

⁷ Oogoonaa genjoona tuneti guudooch beeroon heccehine; deejjee deejjoyichoo arooch kechehine.

⁸ Shaaqqoonaa qoomoonochi gubbooch ne misiloon kotiihine; taan qajjaachaa ne qeenon gaxxihine; arooch kechaanoo gamichaa gaxxihine; boonoshina tookkaa gatiyoon yibbaatehine; ne beeggeti xaaꞌoo bulliichaa boonoshi beeroo bullin shunnehine.

⁹ Zayitoon, wodde shittoonoo yechaꞌa Molook waan hammehine; ne wocheyechinaꞌon wohooch, maash beddaahaa daachiihine.

¹⁰ Ne gommi genjoochee tiyitona maraatehine; tunebaani ‘Ebi gaacaalloone’ getaane neene; ne giidoo kupphehani nireyaanoone.

¹¹ “Taan shalligoon, ta mooyonoo gaboon qajjiꞌi ittoshi koottito konin shattii keqqiꞌiniye? Taach shato ittoshi qajjito wodde yemeenoon cikkaa ta qajjetoyich toone?

¹² Cadiqe ne shuunoo gettee beeton gaxxi bekkiyemmo taane; tunebaani neech gaacaachemminaꞌone.

¹³ Ne cookiyooba ne kiciti, shahalleenaꞌo neen wodiibeete; yongo boonoshin daammemmone; kashee hiinno boonoshin aalliyemmone. Ta shoobooch giyito showoon hajjemmone; yaafeeti ta guudonoo woraashemmone” iye.

Gaachoonaa Wodiyoonoyich Gibenikkeeti Gibeno

¹⁴ Ishicheyemmone: “Tachibote, tachibote! Gommon tachibote! Tephemmi mooyo bullin ta asheenaꞌochi gommoochee wokkiibote” getteyemmone.

¹⁵ Beshoo, beshaa beshe oogoo, bulli yemeenoon beeyecho, bi shigo Yaafoo tuneto ishichii beetone: “Damba wohonaa yaafoona tuneti xaaꞌooch beehoye; tunebaani wotta boonoshi qelloon giishiitinaꞌonaa boonoshi mullo tiishetinaꞌona tookkaa beehoye. Ebiyoo boonoshi qelloon giishiitinaꞌon, boonoshi mullo tiishetinaꞌonoo kupphiyoyichiye.

¹⁶ Ashi ayaanoonaa ta halliti kashoona dooyaachemmoyich, bulli aaboon ittibateyaache; wochi wochi kaareyaache.

¹⁷ Gonde bi woddellittinoyich biin kaarehoye; biin naxaꞌa, kaaroona ta aafoon bi waanee badd wochiyoye; tunebaani gubb wotteꞌi bi gaba hammiye.

¹⁸ Bi gommon beeggeto taane; tunebaani biin wodiyemmo taane; biin yaabemmo taane; biinnaa biich eeppii beetinaꞌonon goggiyemmo taane.

¹⁹ Boonoshi noonoochee galletoon aafiyemmo taane; wohonaa katinoonooch beetinaꞌoyich diggoo tunebe; boonoshin wodiyemmo taane” iye Doono Yeeri.

²⁰ “Tunebaani gondeenaꞌo diiddeꞌeebeeti baharoomminaꞌone; aacoo guudoonaa dengoonon shaaggii damba kichiyalli tooꞌaache.

²¹ Gondeenaꞌoyich diggoo aalloone” iye ta Nuggishoo Yeeri.