Isiyaasi 56 - Kafa Linguistics Project

Aagetoo Bullich Tunemmi Wodoo

¹ Doono Yeeri ishichiye: “Ittoshin ta shiwe wodiyemmi aabo katinnito bi tunetoyich, dayinnetoon quyebote; tate mooyon tuniibote.

² Ebin tuniibeeto, kupphiiꞌinoo yechiibeeto, shambetoon eeꞌiyaanoon oogiibeeto, gondo amoonolla shuunoochee bi kishoon quyeebeeti asho, diireetone.

³ “Doono Yeeri ta waan katinniti dallaawoo ‘Doono Yeeri bi ashoyee taan bariyemmone’ gettaaye; guruushoo ‘Ta shuuꞌi mixo taane’ gettaaye” iye.

⁴ Doono Yeeri ishichiye: “Ta shambetoon oogiibeeti, taan emirikkiibeeti mooyon tuniibeeti, ta wogoonoo ceechiibeeti guruusheenaꞌoyich,

⁵ ta kexonaa ta uxeree daggoonoochee anaami bushiishoonaa maache bushiishoonoyee beshe shalligeyoonaa shigoonon boonoshich immemmo taane; bulli aabooch batteyaani shigoon boonoshich immemmo taane” iye.

⁶ Biich maddoyich Doono Yeer waan katinniti, Doono Yeerichi shigoon shunniti, biich maddeebeeti, shambetoon eeꞌiyaanoon oogiibeeti, bi wogoonoo quyeebeeti bare showee asheenaꞌoyich Doono Yeeri ishichiye:

⁷ “Yaafeeti ta guudooch boonoshin deebemmo taane; ta corootee kexoochaa boonoshin emirikkemmo taane; ta deejjee gudee toommoochaa boonoshi giddiibeeti micciibeeti deejjoonaa bare deejjoonon deqqemmo taane; ebiyoo ta kexo asheenaꞌo bullich corootee kexo getteyemmo bi tunetoyichiye” iye.

⁸ Shaceti Israꞌeeleenaꞌon kiciibeeti Nuggishoo Doono Yeeri ishichiye: “Kiceetinaꞌoyee bareenaꞌon ittoshi waan kicemmo taane” iye.

Israꞌeelee Ukkireenaꞌo Kaareyoo

⁹ Kubbi cooxinaꞌote, kubbooch beeti cooxinaꞌote, bulli waaree mamote.

¹⁰ Israꞌeelee qayechinaꞌo aaf doogeenaꞌone; boonoshi bullich ariyoo aalloone; buhaani miime kunaanoomminaꞌone; tokketeechii gummiyeete; tokketoonoo shunniyeete.

¹¹ Boonoshiyoo bi maataa miyani, woddelle kunaanoomminaꞌone; shalligaalli qiddeenaꞌone; boonoshi kaatti kaatta wottetinaꞌone; bulliyona boonoshi gaacoon qaawiyeete.

¹² Boonoshiyoo, “Ittoshi waataa woyinee uyoon qaawi uyone; kashi uyoonoo uyi miyone; yaachoo hanaachiyoommon tunemmone; halla beshoonoo tunemmone” iyeete.