Isiyaasi 55 - Kafa Linguistics Project

Shachewetinaꞌo Ceekko

¹ “Shachewetinaꞌote, ittoshi bulli aacooch wobote; ittoshi kememmi gijjaalleenaꞌote, waaree keme mamote. Woyinoonaa ejjoonon gijjaalloon, gatiyaalloon kemebote.

² Maayo tuneyaani mooyoyich ittoshi gijjoon ittoshi shacciibeeto amoyichiye? Michiyaani mooyoyich ittoshi giidoon ittoshi ciichiibeeto amoyichiye? Ta waanee waayebote, waayebote! Gaawe mooyon mamote; awuyon mamona emiribote.

³ Ittoshi waamon gaꞌiiree ta waan wobote; kashoona ittoshi beeyemmoyich waayebote. Daawitich ta giyeti manje shunoona, bulli yemeenee wogoon ittoshina tookki giyemmo taane.

⁴ Biin aageteenaꞌoyich miixoo, wulloonaa iraashoonon tuniito taane.

⁵ Israꞌeelee Yaafoo, ne Nuggishoo Doono Yeeri ta, neen ta oogiitoyich, ne ariyaani aageteenaꞌon ceeggemmo neene; neen ariyaani aageteenaꞌo ne waan wocibee woyemminaꞌone” iye.

⁶ Bi danee beehooba Doono Yeerin qaawibote; bi katinnii beehooboo biin ceegote.

⁷ Gonde asho bi gommon, axaaxecho bi gaboon qaye; no Nuggishoochi ariqqo woddoo bi tunetoyich, biinoo bi maaremmoyich Doono Yeer waan wottebe.

⁸ Doono Yeeri ishichiye: “Ta gaboo ittoshi gaboommo, ta gommoo ittoshi gommoommo toonoone.

⁹ Shimaayoo showoyee damba bi wohoommon ta gommo ittoshi gommoyee, ta gaboo ittoshi gaboyee oogeton wohone.

¹⁰ Amiyonaa baderoona shimaayoochee dihiꞌi, showoon shuxiyoona maayo aafemmoyich bi tuniyoommon, wotta shookkechoyich yaroon, maa beetoyich maayoon imaanoon, shimaayooch wotteyaano bi tunoommon,

¹¹ ta noonoochee kechiibeeti qaaroo ebiyoommone; shokkoon ta waan wotteyaachemmone; ta gaboon tuniyemmone; ta wochoonoo ceechemmone.

¹² Ittoshiyoo emiroona kechemmo ittoshine; diggoona deenneyemmo ittoshine. Guudinaꞌonaa geppeenaꞌona emiri xuuphi shoddemminaꞌone; kubbi mixinaꞌo bulli koppemminaꞌone.

¹³ Angichi keroon ciidee mixo, guccini keroon hadaasee mixo, collemmone; ebiyoo Doono Yeeri ta shalligeyemmo tunemmone; bulli aabooch aalleyaani malletoo tunemmone” iye.