Isiyaasi 54 - Kafa Linguistics Project

Yerusaalemich Gubb Tunemmi Oogo

¹ “Hini shiyaani xaafeene, shoddebe! Haane maaxoo manjaa ariyaaneene, ne qaaroon oogichiree ililibe! Kenechi ureechi bushiishoyee beshoon, kenaallechi bushiishoo meettitone” iye Doono Yeeri.

² “Ne duukkaanee xaaꞌoon gamichibe; ne maccillaateenaꞌonoo yaggibe. Ciroona quucciyaahine; ne wodereenaꞌon genjiibe; xogeenaꞌonoo manjiibe.

³ Yoochinaa qanninooch ne gidoon gamichemmi neene; ne yareenaꞌo aageteenaꞌon woraashemminaꞌone; happeeti katemeenaꞌoochoo wochinnoon kotemminaꞌone.

⁴ “Yeelleyaachemmi neene, shattaahine; cooneyaachimmi neene, keqqiyaahine. Ne bushittinooba ne toommooch shaggiti yeelloon battemmi neene; xuumittinee naagoon ebiyee bekk gabaachemmi neene.

⁵ Neen halliti Nuggishoo neech kenoon tunemmone; bi shigo Beshe Mawe Doono Yeeri getteehe. Israꞌeelee Yaafoo neen biishe wodiyemmone; biyoo showoo bullichi Nuggishoone.

⁶ Ne, bushaa bi beetaa keno gawukkiti mechechoommon, duppaꞌa ayinoona bi mullo tiisheti maachechoommon, Doono Yeeri wochinnoon neen bi waan ceeggemmone” iye ne Nuggishoo.

⁷ “Giisheche aaboon neen duppeto taane; tunebaani oogeti ariqqoona neen wochi deebemmo taane.

⁸ Oogichii kaaroona giisheche aaboon, ne waanee ta aafoon bara wochito taane; tunebaani bulli yemeenee shunoona neech ariqqemmo taane” iye neen Biishechi Doono Yeeri.

⁹ “Ebi taach Noohi yemeenoommone; Noohi yemeenooba aaco wochinnoon showoon bi yexaachemmoyich, ta wogoommon, neen kaare ta noggeyaachemmoyich wogeto taane.

¹⁰ Guudinaꞌo shuuroon, geppeenaꞌoo qewoon, hakkiyeete; tunebaani ta shoodo ne waanee wohaachemmone; ta giyeti diggee wogo happeyaachemmone” iye neech ariqqechi Doono Yeeri.

¹¹ Doono Yeeri ishichiye: “Hini xuuxeti, yubee yongoonoo wullaawulleti, goggoonoo mawiitine, aaxxe xaqqoona wochinnoon neen shuunemmo taane; sapiiroona ne hecoon heccemmo taane.

¹² Ne guumminaꞌon ageetoona, ne kelleenaꞌon garineetoona, ne uxereenaꞌo bullin aaxxe xaqqoona, shuunemmo taane.

¹³ Ne bushiisheenaꞌo Doono Yeer waanee doyitinaꞌon tunemminaꞌone; ne bushiisheenaꞌochi diggoo woddemmone.

¹⁴ Cadiqittinoona hecceyemmi neene; neexxii hajjoo ne waanee wokkemmone; ebich shataachemmi neene; keqqoo ne waan katinaachemmone.

¹⁵ Koniyoona neen kocha bi waagaata, boonoshin deejjito ta toono taane; ne toommooch tiyii beetinaꞌo bulli, ne naboona dihemminaꞌone.

¹⁶ “Ebiyoche qaaqqee gechoon buushilloona huggiibeeti, ginee qiicoonoo shuuneebeeti qemmon hallito, taane; aalliibeeti ginee naayonoo hallito, taane.

¹⁷ Neen koyoyich shuuneeti ginee qiico shuuneyaachemmone; neen taggeꞌi ne toommooch tiyimmo bullin nallee xaaꞌoochaa xoobiyemmi neene. Doono Yeerichi maddechinaꞌo iristo ebine; ta waanee boonoshi danemmi cadiqoo ebine” iye Doono Yeeri.