Isiyaasi 53 - Kafa Linguistics Project

¹ No gettaa beeton koni iberiite? Doono Yeerichi mochoo konich bekkete?

² Ebi maddecho, shuuꞌi showooch cammon awureti, maayi colloochoommon, bi aafooch, dicciye; bi waan no ciinnemmoyich, gaawoo woyee yiiroo biich aalloone; biin no shunnemmoyich, malleto biich aalloone.

³ Biyoo ashoona shixxetonaa hoxeetonane; biiyoonaa xuuxoona biyee baraani ashoone; asho bi waanee aafoon badd wochiti, hoxeeti ashoone; nowoo biin oogiyaano noone.

⁴ Iberoochaa no biiyoon aroo deqqiye; no qaakkeyoonoo bi toommooch tuniihe; tunebaani no, Yeeri yexaa dihitonaa naxeetonon, xuuxetonoo shaahiyaꞌa ciinnehone.

⁵ Tunebaani bi, no xuꞌee naboona kochee mayehe; no axaaxee naboona yiikkeehe; bi naxeetaa no wodoon danehone; bi mayona no wodiyone.

⁶ No bulli bagoochoommon yallyallimaa aallehone; no ikkikkoona no kaatti kaattoon yechehone. Tunebaani Doono Yeeri no bullichi xuꞌoon, bi toommooch tuniihe.

⁷ Xuuxehe; qaakkehe; ebi tunetaanoona bi noonoon wochaanoone; guureyooch yaabaa hammiibeeti bagoochoommon, bi eexon caggii beetinaꞌo aafoochaa cikkii qajjiibeeti bagoochoommon, bi noonoon wochaanoone.

⁸ Dayinnetaalloon bi toommooch nalliꞌi daammiyeete; ta asheenaꞌochi axaaxee qoodoyich yexxeꞌi, kashechinaꞌo beeti showoochee bi aalloon, shiijjeree daggoochee konine ariito?

⁹ Hukkoon bi shuuneyaanoon, bi noonoochee kooto keyaanoon, bi qitoon gondeenaꞌona tookkii tuniiheete; gaannechinaꞌona tookkii duukkehe.

¹⁰ Biiyoona bi yexxeyemmoyich Doono Yeeri daaggiye; bi kashoon axaaxee deejjoo bi tuniitoyee gubb, bi yaroon beeggemmone; bi eeno genjemmone; Doono Yeerichi daaggoo bi kishoona ceennemmone.

¹¹ Cadiqe ta guuno, bi kashe xuuxetoyee gubb, kasheechi bekkoon beegiree emiremmone; bi ariyoona meetinaꞌon cadiqiyemmone; boonoshi xuꞌoonoo shaaggemmone.

¹² Bi kashoon qitooch beshiiꞌi bi immitoyich, gonde shuunechinaꞌona tookkii bi haddeetoyich, ogoogeenaꞌona tookki bi qoodoon qoodeyemmone; hakkechinaꞌona tookkishoo kecoon qoodeyemmone. Biyoo meetinaꞌochi axaaxoon shaaggiye; xuꞌechinaꞌoyichoo maaggehe.