Isiyaasi 52 - Kafa Linguistics Project

Yeeri Yerusaalemin Shiwemmo Tuno

¹ Tsiyoone, tibe, tibe! Giidoon tahoochoommon tahebe. Yaafeeti katemee Yerusaaleme, kitte ne tahoon tahebe. Ebiyee bekk dokireyaanoonaa eeꞌoona, ne waan giyaachemmone.

² Kecceti Yerusaaleme, tibe; ne quttoon tebbebe; kecceti Tsiyooni maache busheene, ne cucheti sansalatoon ne qettoochee biishe.

³ Doono Yeeri ishichiye: “Duuboon kecheto ittoshine; gatiyoo qocaanoon biisheyemmo ittoshine” iye.

⁴ Nuggishoo Doono Yeeri ishichiye: “Ebiyee aaf, ta asheenaꞌo iibboo tuneree beeya, Gibitsee showooch kindiyeete; Asooreenaꞌo naboo aalloon boonoshin neexxii hajjiyeete” iye.

⁵ Doono Yeeri ishichiye: “And hiniich taach amo beete? Ta asheenaꞌo naboo aalloon yeshaa hammitinaꞌone; boonoshi ukkireenaꞌo cookiyeete; bulli aaboon ta shigo naakkehe” iye Doono Yeeri.

⁶ “Ebiyooba ta asheenaꞌo ta shigoon, ebin gettaabeeto ta tunoonoo ariyemminaꞌone; ebin gettaabeeto taane” iye.

⁷ Diggee mishiraachoon deebiibeeti, wodeechon awaajjiibeeti, “Ne Nuggishoo taatemmone” iꞌi Tsiyoonich gettiibeeti, wocheyechinaꞌochi baateenaꞌo guudi toommoochaa am shaahoon gaaweheete!

⁸ Doono Yeeri Tsiyoon wottoon aafoona boonoshi beeggitoyich, ne kellechinaꞌo qaaroon oogichiꞌi ikkittinoona boonoshi shoddeebeeti emiree shoddoon waayebe.

⁹ Yerusaalemi buriceenaꞌote, Doono Yeeri bi asheenaꞌon bi goggiitoyich, Yerusaalemin bi biishetoyich, ikkittinoona emiroona shoddebote.

¹⁰ Doono Yeeri yaafe bi mochoon, aageteenaꞌo bullich bekkiyemmone; showee tuggeenaꞌo no Nuggishoochi wodiyoon beeggemminaꞌone.

¹¹ Doono Yeerichi yaafee kechi qiiceenaꞌon shaaggii beetinaꞌote, Baabloonee keyote; bi waanee baribote! Eeꞌe mooyon yechaahote. Aroochee keyiree ittoshi qelloon xalliibote.

¹² Doono Yeeri ittoshi aafooch shiichemmo bi tunetoyich, Israꞌeelee Nuggishoo ittoshi gubbaa quyemmo bi tunetoyich, afaafinoona hamaachemmo ittoshine; gooyiree hamaachemmo ittoshine.

Iritoo Bi Toommooch Shaggemmi Maddecho

¹³ Doono Yeeri ishichiye: “Ebiyoche, ta guunoyich mooyo kaamemmone; damba oogichiree oogemmone.

¹⁴ Ashichoyee beshoon bi malleto bachitoyich, ashichoyee beshoon bi gaawoo xummetoyich, meetinaꞌo bi naboona worganemminaꞌone.

¹⁵ Boonoshich getteyaanoon beeggemminaꞌo boonoshi tunetoyich, boonoshi waayeyaanoon shalligemminaꞌo boonoshi tunetoyich, bi naboona meeti aageteenaꞌo worganemminaꞌone; taateenaꞌo bi naboona worganemminaꞌone” iye.