Isiyaasi 51 - Kafa Linguistics Project

Yerusaalemich Tunemmi Bulli Aabee Wodoo

¹ Doono Yeeri ishichiye: “Cadiqoon dabbii beetinaꞌote, Doono Yeeri taan qaawii beetinaꞌote, ta waanee waayebote: Aroochee kuxaa ittoshi kechiti xaqqoon, aroochee iiyaa ittoshi kechiti oppoon ciinote.

² Ittoshi nihoo Abrahamin, ittoshin shiyeti Saarinoo ciinote. Abrahamin ta ceeggiyooba bi ikkeetone; biin diiriyoye; bi yaroonoo meechiyoye.

³ Doono Yeeri ta, Tsiyoonin, shokkoon echeti bi xaaꞌoonoo, goggiyemmo taane; bi barahoon Edeniyoommon, Doono Yeerichi bechee mixinaꞌo beeti xaaꞌoommonoo, tuniyemmo taane; bi waan emiroonaa wucwucona danemmone; galletee shoddo bi waanaa shoddeyemmone.

⁴ “Ta asheenaꞌote, ellebote; ta aageteenaꞌote, waayebote: Sheeroo ta waanee kechii beetone; ta dayinnetoo asheenaꞌoyich bekko tunemmone.

⁵ Ta cadiqoo kaate shaggemmone; ta wodiyoo kechemmone; ta mochoona aageteenaꞌon hajjemmo taane; baharee gasheexi buure showeenaꞌo taan gibene quyemminaꞌone; ta mochoonoo gibenemminaꞌone.

⁶ Ittoshi aafoon kaachiree shimaayooch ciinote; dugilla showoochoo ciinote. Shimaayoo cufoochoommon naayi aallemmone; showoo qoreddoochoommon geenemmone; arooch beetinaꞌoo mattoochoommon qiti ciiremminaꞌone; tunebaani ta wodiyoo bulli yemeeneechone; ta wodiyoyich ciiro aalloone.

⁷ “Tate mooyon ariyaa beetinaꞌote, ta sheeroo ittoshi mullooch beeti asheenaꞌote, ta waanee waayebote: Ashi miichoon shattaahote; boonoshi naagoyichoo keqqiyaahote.

⁸ Tahoochoommon pilo boonoshin maayemmone; bagee eexochoommon hipperoo boonoshin maayemmone; tunebaani ta cadiqoo bulli yemeenooch beeyemmone; ta wodiyoo bulli shiijjerooch beeyemmone” iye.

⁹ Tibe, Doono Yeerichi mochoocho, tibe! Giidoon tahoochoommon tahebe; wonnee shiijjereenaꞌochi besheti yemeenooch ne tuniitoommon, tibe. Rahaabin muucmuucayito, dareboonoo kocheto, ne toono neene?

¹⁰ Ne biishetinaꞌo beshemmoyich, baharo, ooge aachi duchoo, shuuqqemmoyich tuniito, aachi duchoochoo gommon geddeto ne toono neene?

¹¹ Doono Yeeri biishetinaꞌo wottemminaꞌone; shoddebee Tsiyoon woyemminaꞌone; bulli aabee emiroon gubbichoo ukoommon ukemminaꞌone; emiroonaa wucwucona boonoshich tunemmone; ayinoonaa eefona boonoshiyee wokkemmone.

¹² Doono Yeeri ishichiye: “Ittoshin goggiyemmo ta qelloona taane; qitemmi ashich, mocoo shoolloommon shoollemmi ashi bushiishoyich, ittoshi shattiibeeto amoyichiye?

¹³ Shimaayoon yaggiti, showoonoo kottiti, ittoshin halliti Doono Yeeri taan batteto ittoshine; aalliiya qanniꞌi ittoshin xuqqii beetochi naboona bulli aaboon keqqoona beehote; ishigaataa, boonoshi kaaro aaye?

¹⁴ Cucheꞌi goobetinaꞌo biichemminaꞌone; qitiree maash hamaachemminaꞌone; koshonoo mucceyaachemminaꞌone.

¹⁵ Aayo buugemmoyich, baharoon shuurikkaabeeto, ne Nuggishoo Doono Yeeri taane; ta shigoo Beshe Mawe Doono Yeerine.

¹⁶ Ne noonooch ta qaaroon kotiito taane; ta kishee yiirooch neen aachemmo taane; shimaayoon yaggito showoon kotteto taane; Tsiyoonee asheenaꞌonoo ‘Ittoshi, ta asho ittoshine’ gettemmo taane” iye.

Yeerichi Kaaree Xoofoo

¹⁷ Doono Yeerichi kishoochee kaaree xoofoon ucheti, dadeddiibeeti uyoon cangeti, Yerusaaleme, qaallibe; tiyi neexebe.

¹⁸ Ne bushiishoo bulliichee, neen yaabemmo ciroona aalloone; ne dichiti bushiisheenaꞌo daggoochee ne kishoona yeshi daammemmo aalloone.

¹⁹ Ginoona happeyoo, shaacoona aallo, ebi gutte mooyo neech shaggitone; neen kupphiyemmo konine? Neen goggiyemmo konine?

²⁰ Ne bushiisheenaꞌo shaaweeꞌi dihitinaꞌone; dabbooch yecheti doollechoommon, gommo bulliich yacheetinaꞌone; boonoshi toommooch, Doono Yeeri kaaro, ne Nuggishoochi noggoo, kinditone.

²¹ Woyinee uyoona tuneyaanoon, xuuxoona mashetine, ebin waayebe.

²² Bi asheenaꞌoyich taggeebeeti Doono, ne Nuggishoo Doono Yeeri, ishichii beetone: “Dadeddiibeeti xoofoon, ta kaaree xoofoon ne kishoochee daammeto taane; ebiyee bekk uyaachemmi neene.

²³ Ebi aroon, neen xuuxii beetinaꞌo kishooch, ‘Ne toommona no beshemmoyich yite’ ii beetinaꞌo kishooch, geddemmo taane; newoo ne gubboon, neecheebeeti showoommon, hammeebeeti gommoommon, tuniiti neene” iye.