Isiyaasi 50 - Kafa Linguistics Project

¹ Doono Yeeri ishichiye: “Ittoshi indeen ta yookketi gawukkee koorichoo aaye? Erettiyechinaꞌo daggoochee ittoshin ta kemmeto konichiye? Ebiyoche, ittoshi axaaxoona kecheto ittoshine; ittoshi xuꞌoona ittoshi indee yookketine.

² Ta waahooba asho amoyich arooch aallehe? Ta ceeggiyooba amoyich eekkemmo koniyoona aallehe? Shiwoyich ta kishoo qaminone? Woyee wodiyoyich hakkoo taach aalletenane? Ta noggegaata baharo shuuqqiye; aacinaꞌonoo barahoo tuniihoye; haasheenaꞌo aacon mucceree shaaqqemminaꞌone; shachewoonoo qitemminaꞌone.

³ Shimaayoyich manderoon tajjemmo taane; bi qeroo dooko tunemmone” iye.

Yeerichi Maddecho Xuuxemmo Tuno

⁴ Taahitinaꞌon, qaaroona kupphiyoon ta ariyemmoyich, Nuggishoo Doono Yeeri ariyechi heciyoon taach immitone. Maaddoona taan tokketoochee tiijjiye; doyechochoommon ta ellemmoyich ta waamon qechiye.

⁵ Nuggishoo Doono Yeeri ta waamon qechitone; tawoo hukkecho toono taane; gubboo wotteyaano taane.

⁶ Xoobbii beetinaꞌoyich ta gubboon, ishaanoon shettee beetinaꞌoyich ta gaakkoon, immehoye; taan coonee, ta aafooch cuddii beetinaꞌo waanee, ta aafoon bara wochaano taane.

⁷ Nuggishoo Doono Yeeri taan gaachee bi beetoyich, cooneyaachemmo taane; ebich, ta aafoon xaqqo kupphoommon kupphiyemmo taane; yeelleyaachemmo ta tunoon ariyaabeeto taane.

⁸ Cadiqo ta tunoon arichiyemmo ta gaꞌooch beetone; taanna taggemmo konine? Eke tookki neexebone; ta taggecho konine? Eke ta waan giddebe.

⁹ Nuggishoo Doono Yeeri taan gaachemmone; ta toommooch nallemmo konine? Taan taggee beetinaꞌo bulli tahoochoommon geenemminaꞌone; pilo boonoshin maayemmone.

¹⁰ Ittoshi daggoochee, Doono Yeerin shattii beetonaa bi guunochi qaaroyich deꞌa ii beetona, konine? Manderoona shaꞌeebeeto, bekko biich bekkeyaano, Doono Yeerin gibenebe; bi gibenoonoo bi Nuggishoo toommooch gede.

¹¹ Qaaqqoon shookkiꞌi conjiibeeti ceechoon yechitinaꞌote, ebi ittoshi shookkiti qaaqqee bekkoona ittoshi ceechiti qaaqqee conjoona, shaꞌebote. Ta kishoochee ittoshi deqqemmi mooyo beetone; qaakkeree yangeyemmo ittoshine.