Isiyaasi 5 - Kafa Linguistics Project

Woyinee Goyoochon Shoddeeti Shoddo

¹ Ta shunachochon, bi woyinee goyoochonoo shoddebona; ta shunechoyich woyinee goyo, qeemi geppee toommooch beehe.

² Showoon gochiye; xaqqoonoo macii kichiye; gaaweti woyinee qomboon arooch bechiye; bi gutte daggooch dilaaloon shuunehe; woyinee aafo hiichemmi oppoon iijjiye; aroochee gaawe aafoon aafemmone ii quyehe; tunebaani kiikkeroon aafehe.

³ Illa and Yerusaalem beetinaꞌote, Yihudee asheenaꞌote, taannaa ta woyinee goyoonochi mooyon nallibote.

⁴ Ta woyinee goyoyich ta tuniyaani, ta tuniiya bede mooyo amoone? Gaawe woyinee aafoon aafemmone iyaꞌa ta quyaa beetaa, amoyich kiikkeroon aafehe?

⁵ Ta woyinee goyee toommooch ta tuniyemmi mooyon ittoshich getona; uxeroon waaxxemmo taane; xaqqee uxeroonoo happemmo taane; kubbi cooxo aalliyemmonaa kuppemmonoyich tuniyemmo taane.

⁶ Shokkoon echiyemmo taane; qepheyaachemmone; showoo ucheyaachemmone; guccinonaa angixona collemmone; amiyo dihaachemmoyich qubeenaꞌoyich gettemmo taane.

⁷ Beshe Mawe Doono Yeerichi woyinee goyo, Israꞌeelee asheenaꞌone; Yihudee asheenaꞌo, bi emiriibeeti becheenaꞌone. Dayinnetoon boonoshi waanee qaawiye; tunebaani damee ukkoo tunehe. Cadiqee shuunoon qaawiye; tunebaani xuꞌee naboona cookoo tunehe.

Asheenaꞌo Shuuneebeeti Gonde Mooyo

⁸ Bareenaꞌoyich beeyi xaaꞌoo aallemmi wottoon, ittoshi baach showee toommooch kotemmi wottoon, kechi toommooch kexon, showee toommoochoo showoon daakkii beetinaꞌote, ittoshich woowo!

⁹ Beshe Mawe Doono Yeeri, ta waamo waayee beetaa ishichiꞌi wogetone: “Iberoochaa meeti kexinaꞌo onoo tunemminaꞌone; macecikkiti ogooge kexinaꞌo ashaalleenaꞌo tunemminaꞌone.

¹⁰ Aashire aangee woyinee goyoochee hiyaa gutte neetiree woyinee uyo baach danemmone; ikke xaanee yaroon shoohaa keejje qunnee maayo baach maceyemmone” itone.

¹¹ Mashiibeeti uyoon uyoyich haree yaaꞌooch tiyii beetinaꞌoyich woowo! Boonoshi kashooch bi qeeccimmi wottoon, uchiibee harii beetinaꞌoyich woowo!

¹² Boonoshi gifiree xaaꞌooch ooge ximboonaa giishi ximboona, kamboonaa shumburoona, woyinee uyoo beetone; tunebaani Doono Yeeri tuniiton, bi shuuneti shuunoonoo gabaaneenaꞌone.

¹³ Ebich ta asheenaꞌo ariyoon boonoshi muccetoyich kecaa hammemminaꞌone; boonoshi ukkireenaꞌo shaacoona qitemminaꞌone; asheenaꞌochi heciyoo shachewoona shuuqqemmone.

¹⁴ Ebich maasho bi maacoon gamichii, haawutteꞌi boonoshin quyee beetone; Yerusaalemi ogoogeenaꞌonaa sharaareenaꞌonon aroochaa dullii cangechee beetinaꞌona tookki qooxxemmone.

¹⁵ Asho cooneyemmone; asheenaꞌo giishemminaꞌone; geecechochi qillifoo niremmone.

¹⁶ Tunebaani Beshe Mawe Doono Yeeri, dayinnetoona nalloona bi oogoon bekkiyemmone; Yaafe Nuggishoo cadiqoona nalloona bi yaafittinoon bekkiyemmone.

¹⁷ Ebi arooba, bagee bushiisheenaꞌo kexo happeeti xaaꞌoochaa mocoon maayemminaꞌone; bagee baaddeenaꞌonaa emmishee bushiisheenaꞌona ebi aroochaa mocoon maayemminaꞌone.

¹⁸ Axaaxoon dachee woderoona, xuꞌoonoo gaari woderoona geechii beetinaꞌoyich woowo!

¹⁹ “No beeggemmoyich Doono Yeeri tuniiya bi gabiton kaate tuniibe; no ariyemmoyich Israꞌeelee Yaafoo yameti yamo kaate wobe” ii beetinaꞌoyich woowo!

²⁰ Gondoon gaaweto, gaaweton gondo ii beetinaꞌoyich, manderoon bekko, bekkoonoo manderoo tunii beetinaꞌoyich, caamoon nooco, noocoonoo caamo tunii beetinaꞌoyich woowo!

²¹ Boonoshi qelloona boonoshin ariyechonaa yiitoonon tuniiꞌi ciinnii beetinaꞌoyich woowo!

²² Woyinee uyoon uyoyich beelleenaꞌo, mashiibeeti uyoon baccoyichoo kuppho tunetinaꞌoyich woowo!

²³ Xuccoyicha iꞌi xuꞌecho nalleyemmoyich, xuꞌaalloo xoobbemmoyich tunii beetinaꞌoyich woowo!

²⁴ Beshe Mawe Doono Yeerichi sheeroon boonoshi hoxetoyich, Israꞌeelee yaafoo gettitonoo boonoshi qallayitoyich, guudoon qaaqqoo mamoommon, galloon qaaqqee aaxxo michii aalliyoommon, boonoshi xeppho oqqemmone; boonoshi bungoo shuuꞌiree quttoochoommon kaama quttemmone.

²⁵ Doono Yeeri kaaro bi asheenaꞌo toommooch cufiye; bi mochoon tiijjiꞌi boonoshin yexxiye; guudinaꞌo qeweheete; asheenaꞌochi dubenoo guudoochoommon gommooch dihitone; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.

²⁶ Doono Yeeri wohooch beeti aageteenaꞌon bi ceeggemmi malletoon neechemmone; showee tuggoochee shennoona ceeggemmone; boonoshiyoo daappibee afaafinoona woyemminaꞌone;

²⁷ boonoshi daggooch hakka guutoonaa sheqqoona aalloone; geepphillii beetonaa tokketee beetona aalloone; boonoshi eddo biisheyaachemmone; boonoshi caammee cuyoo kuxeyaachemmone.

²⁸ Boonoshi shango acone; boonoshi maꞌoo qannitone; boonoshi haresheenaꞌochi baatoo shaammoommone; boonoshi gaarichi gengoo yongee yuboommone.

²⁹ Boonoshi qaaro daaheroochoommone; more daaheroochoommon ciddiyeete; boonoshi yechiton guruuxiibee daammiyeete; boonoshi kishoochee dihiyemmo aalloone.

³⁰ Arooba baharee buugoommon ebi aree toommooch buugemminaꞌone; koniyoona showooch bi ciinigaata, manderoonaa xuuxoonon beeggemmone; qubee naboona bekko manderemmone.