Isiyaasi 49 - Kafa Linguistics Project

Israꞌeeli Aageteenaꞌochi Ceechoo Tuno

¹ Baharee gasheexi buure showooch beetinaꞌote, ta waanee ellebote; wohi showooch beeti aageteenaꞌote, waayebote: Doono Yeeri, ta shiijjeyaan beetaa, taan ceeggiye; ta indee maacooch ta beetaa, taach shigoon shigiihe.

² Ta heciyoon aci goraadoommon tuniihe; bi kishee yiirooch taan aachiye; acheeti shangoommon taan tuniihe; bi gonenoochoo taan aachiye.

³ Biyoo taach “Israꞌeelo, ne ta guuno neene; neenna oogemmo taane” iye.

⁴ Tunebaani ta “Duuboon aajjoye; gaacaalli duuboyich ta giidoon ciichiyoye; tunetaa, ta mooyo Doono Yeer waaniye; ta aayi gatiyoo ta Nuggishoo waaniye” iyoye.

^5-6 Doono Yeeri aafoochaa oogoon daneto taane; ta Nuggishoo taach giidoon tunetone; batt ta indee maacooch ta beetaa, bi guuno tuniiꞌi taan kaacciti, Yaaqobin bi waan ta deebemmoyich, Israꞌeelin bi waan ta kicemmoyich tuniiti, Doono Yeeri ishichiye: “Yaaqobichi yoodeenaꞌon wochaa ne tiijjoo, muriccii woditi Israꞌeeleenaꞌon ne wochoo, ebi baach ta guuno neech bedaache; aageteenaꞌoyich neen ceechoo ta tuniitaa, showee toommo bulliich ta wodiyoon bechemmo neene” iye.

⁷ Israꞌeeleenaꞌochi Biishee Wodiyechonaa Yaafoona tuneti Doono Yeeri, asheenaꞌona oogichii hoxeeꞌi, ciigeeti, iraasheenaꞌochi guuno tunetoyich, ishichii beetone: “Taateenaꞌo neen beegiree neech tiyi neexemminaꞌone; taatee yareenaꞌo neech goyinnemminaꞌone; ebiyoo, gibeneeti Doono Yeeri, Israꞌeelee Yaafoo, neen bi kaaccitoyichiye” iye.

Yerusaalemi Wochinnoon Shuuneyemmi Tuno

⁸ Doono Yeeri ishichiye: “Shucheti aabooba neech wochemmo taane; wodiyee aabooba neen gaachemmo taane; neenoo quyemmo taane; showoon wochi ne shuunemmoyich, ashaalli shokkoo echeti showoon ne qoodemmoyich, wogoon neen tuniiya asheenaꞌoyich immeto taane.

⁹ Qoppeenaꞌon ‘Keyi hambote,’ manderee daggooch beetinaꞌonoo ‘Bekkooch keyote’ gettemmo neene; gommona hamibee, maayoon dane maayemminaꞌone; geppee toommeexi shokke xaaꞌoo, boonoshich mocechi gaddo tunemmone.

¹⁰ Shaacoonaa shachewoona boonoshin yeshaachemmone; gaame yongo woyee aabee michoo boonoshin yexaachemmone; boonoshich ariqqeebeeto boonoshin yaabemmone; aachi xuupho waan boonoshin daammemmone.

¹¹ Ta guudinaꞌo bullin gommo tuniyemmo taane; ta gomminaꞌoo kaama ceennemminaꞌone.

¹² Ta asheenaꞌo wohi showoochee, eboshiyoo dambi-waaninaa aabi-gimonoochee, wotta eboshiyoo Aswaanee woyemminaꞌone” iye.

¹³ Doono Yeeri bi asheenaꞌon goggiyemmo bi tunetoyich, iritechinaꞌoyichoo ariqqemmo bi tunetoyich, shimaayoocho, emiroona shoddebe; showeene, emiribe; guudinaꞌote, ililibote.

¹⁴ Tunebaani Tsiyooni asheenaꞌo, “Doono Yeeri noon duppitone; no Doono noon battetone” iyeete.

¹⁵ “Indee bi xaachaa beeti bushoon battoon hakkehane? Bi shiyeti bushoyich maaxeyaachehane? Diqqich battoon hakkiyane; tunebaani ta, ittoshin batteyaache.

¹⁶ Yerusaaleme, ne shigoon ta kishee madooch koorito taane; ne uxereenaꞌon bulli aaboon ciinnaabeeto taane.

¹⁷ Ne bushiisheenaꞌo kaateree wottemminaꞌone; neen happitinaꞌo ne waanee woce aallemminaꞌone.

¹⁸ Ne aafoon kaachiree, ne guudoona ciine; ne bushiisheenaꞌo kiceeree ne waan woyemminaꞌone. Doono Yeeri ta, beeyecho ta tunoona wogehoye; eboshi bullin shashoochoommon shashemmi neene; woꞌechoommon tahemmi neene.

¹⁹ “Iberoochaa happeyaꞌa ashaalli shokkoon ne echetaa, qoccqoccimii tiishetin ne tunetaanoona, arooch beeyemminaꞌoyich xebbemmi neene; neen qooxxitinaꞌo ne waanee wokkemminaꞌone.

²⁰ Ne muushenee yemeenooba shiijjeti ne bushiisheenaꞌo, ‘Hini showoo oogeti xebboone; no beeyemmi gamini showoon nooch qanniibe’ gettemminaꞌone.

²¹ Aroochee newoo ne mulloona ishichemmi neene: ‘Eboshin konine taach shiyito? Muusheneti, xaafee tuneti, kecceti, yookketi taane; eboshin konine dichito? Ta ikkeeti baach echeti taane; ishigaata eboshi amoochee waaheete?’ gettemmi neene” iye.

²² Nuggishoo Doono Yeeri ishichiye: “Aageteenaꞌon kappemmo taane; asheenaꞌo waanoo ta malletoon wochemmo taane; ittoshi anaami bushiisheenaꞌon boonoshi shoopphooch tiqqe, ittoshi maache bushiisheenaꞌon boonoshi gogooch shaagi, deebemminaꞌone.

²³ Taateenaꞌo neech dichinihoon, taateenaꞌochi mecheenaꞌo dichindeen, tunemminaꞌone; baroona guuferee neech goyinnemminaꞌone; ne baateexi buttoon baaxxemminaꞌone; ebina Doono Yeeri ta tunoon ariyemmi neene; boonoshin ta gaachemmoyich quyee beetinaꞌo ciroona yeelleyaacheete” iye.

²⁴ Bi boggiti qiicoon, giidecho kishoochee deꞌo, woyee kechetinaꞌon maacmanje ashi kishoochee dichiyoo, hakkeyehe?

²⁵ Doono Yeeri ishichiye: “Neenna koyee beetinaꞌona koyemmo, ne bushiisheenaꞌonoo wodiyemmo ta tunetoyich, bokketi qiico giidecho kishoochee deqqeyemmone; keccetinaꞌoo, maacmanjoo kishoochee dichaa wottemminaꞌone.

²⁶ Neen neexxii hajjitinaꞌo boonoshi hajjee meenon boonoshi maayemmoyich, boonoshi hajjee damoonoo woyinee uyoochoommon boonoshi uchemmoyich, tuniyemmo taane. Ebina Doono Yeeri ta, neen Shiwechonaa Biishee Wodiyechona, Yaaqobi goyinneebeeti Giidechi Nuggishoo ta tunoon, asho bulli ariyemmone” iye.