Isiyaasi 48 - Kafa Linguistics Project

Hallitonaa Wodiyechona Yeeri Tuno

¹ “Yaaqobichi yareenaꞌote, Israꞌeelichi shigoona ceekketinaꞌote, Yihudi yaroochee shiijjetinaꞌote, Doono Yeerichi shigoona wogee beetinaꞌote, iberoona woyee cadiqoona tuneyaanoon Israꞌeelee Nuggishoon ceeggii beetinaꞌote, waayebote.

² ‘Yaafe katemee asho noone; bi shigo, Beshe Mawe Doono Yeeri tuneti, Israꞌeelee Nuggishoon gibeneebeeto noone’ ii beetinaꞌote, waayebote:

³ Gubb tunemmi mooyon wonna shiichaꞌa gettoye; ta noonoochee kechiye; bi arichemmoyichoo tuniihoye; diqqoona tuniihoye; ebiyoo ceennitone.

⁴ Getaa giyaani, xuuroommi gajjechonaa gooshoommi barechona, ittoshi tunoon ariyaabeeto taane.

⁵ Ebich, ebi mooyon wonna ittoshich getteto taane; boonoshi tunoyee shiichaa ittoshich awaajjito taane; ebiyoo ‘Shahalleenaꞌo ebin tuniiteete; qiicaa shuuneeti misiloonaa wociitaa shuuneeti misiloona daaggii maacciteete’ ittoshi getaachemmoyichiye.

⁶ Ta getteton waayeto ittoshine; bi ceenon beeggito ittoshine. And ebin iberiyaachote? “Illa and, ittoshi ariyaani aacheeti mooyon, ittoshi waayemmoyich tuniyemmo taane.

⁷ Eboshi halleeto andalli wonna toonoone; ‘Boonoshin ariyaabeeto taane’ ittoshi getaachemmoyich, boonoshichon ebiyee aaf waayeyaano ittoshine.

⁸ Ta gettaa beeton waayoon, ariyoonoo qaawaano ittoshine; wonnee tiijjiꞌi ittoshi waamo qecheyaanoone; ittoshi shiijjoochee tiijjiꞌi dawushecho ittoshi tunoon, hukkecho getaa ittoshi ceekkoonoo, ariyaabeeto taane.

⁹ Ta shigoyicha geti ta kaaroon yagiyemmo taane; ta galletoyicha geti ittoshin aalliyoon qayiree, tooqqemmo taane.

¹⁰ Birewoon ukkoommon tuneyaanoon, iritee qaaqqoona ittoshin haattito taane; xuuxee sheelloona ittoshin haattito taane.

¹¹ Ta qellicha getiree, eeha, ta qellicha getiree, ebin tuniyemmo taane; taan boonoshi giishiyemmoyich, aabichiree tuniyehote? Ta oogoon konichona imaachemmo taane.

Yeeri Kaacciti Maddecho

¹² “Yaaqobo, ta ceeggeti Israꞌeelo, waayebe: Ta, Nuggishoo taane, ta shiichoo taane; ta taco taane.

¹³ Ta kishoo showee hecoon heccitone; ta qanne kishoo shimaayoon yaggitone; boonoshin ta ceeggemmona, ikkittinoona neexeheete.

¹⁴ “Ittoshi bulliyoo kiceeree ellebote: Boonoshi daggoochee ebi mooyinaꞌon gettito konine? Doono Yeerichi shunecho, bi daaggoon Baablooni toommooch tuniyemmone; bi mochoo Kalideenaꞌo toommooch tunemmone.

¹⁵ Ebin getteto taane; biin ceeggetoo halla taane; biin deebeto taane; bi gommoo kaamemmone.

¹⁶ “Ta waan katiniree ebin waayebote: Wonnee tiijjaꞌa aashoona yibbaateyaano taane; bi tuneti aaboochee tiijjaꞌa ta arooch beeto taane” iye. Andoo Nuggishoo Doono Yeerinaa bi Ayaanoona taan wochee deejjitone.

Bi Asheenaꞌoyich Yeeri Gabiibeeti Gaboo

¹⁷ Ittoshin Biishee Wodiyechi Israꞌeelee Yaafoo, Doono Yeeri ishichiye: “Neech gaaccemmon neech dojjaabeeti, ne hammaabeeti gommooch neen yaabaabeeti, ne Nuggishoo Doono Yeeri taane.

¹⁸ Ta geteenaꞌon ne waayeto gaata, ne diggoo tahaani aacoommon, ne cadiqittinoo baharee aachi aayoommon tuneshone.

¹⁹ Ne shiijjeroo haddaa ciireyaani, baharee gasheexi qacoommon tuneshone; boonoshi shigo ciroona ta aafoochee, kuxeree aalleyaacheshone” iye.

²⁰ Baabloonee keyote; Kalidee showoochee gooyote; “Doono Yeeri bi guuno Yaaqobin biishetone” geti, ililoona showee toommo bulliich awaajjibote.

²¹ Barahoona boonoshin bi yaabiyooba shacheweyaaneenaꞌone; xaqqoochee aaco boonoshich bi xuupphemmoyich tuniihe; xaqqoon bi gaahaa aaco bubiye.

²² “Gondeenaꞌoyich diggoo aalloone” iye Doono Yeeri.