Isiyaasi 47 - Kafa Linguistics Project

Baablooni Toommooch Kindemmi Nalloo

¹ Doono Yeeri ishichiye: “Baabloonee gidiideene, kindiree buttooch kotebe. Kalideenaꞌochi busheene, taatee qeenoochee kindiree showooch kotebe. Ebiyee bekk qeddi nire korootee, getaa ceekkeyaachemmi neene.

² Xaqqee maano tiijji maayoon yiikkebe; ne aafee kaafoonoo gaxxibe; kittee ne tahoonoo shoote; ne doshoon bekkiibee, aacon kimbe.

³ Ne achoo xalla bekkemmone; ne ashittino gaxxeyemmone; nichoon kichemmo taane; koninolla echiyaachemmo taane” iye.

⁴ Noon Biishee Wodiyechi Israꞌeelee Yaafoo, bi shigo Beshe Mawe Doono Yeerine.

⁵ “Kalideenaꞌochi busheene, illa ‘Taatee showeenaꞌochi taatee’ getteyaachemmi neene; cikkiree kotebe; manderoochoo hambe.

⁶ Ta asheenaꞌon kaarehoye; boonoshin ne kishooch beshiyaa imona, ta hajjee asheenaꞌo giishemmoyich tuniihoye; newoo boonoshich ariqqeyaane neene; geeneenaꞌo toommooch waanjoon maggiihine.

⁷ ‘Bulli yemeenoon taatee tuneree beeyemmi taane’ itine; ebi mooyon ne mullooch kotiyaane neene; bi ciiroonoo shalligaane neene.

⁸ “Hini cunnenniti, carahaanoo koteti, ne mulloonoo ‘Taane; tayee baroo ikkolla aalloone; xuumechoommon koteyaachemmi taane; bushoon wuxii ciichitin tuneyaachemmi taane’ itine; and ebin waayebe:

⁹ Ikke areddoon qillifee yexx bedaan beetaa, ebi gutte mooyinaꞌo ne toommooch shaggemminaꞌone. Bushiishee qitii ciiroonaa xuumee tunoona, diqqoona ne toommooch shaggemmone; meeti iicechinaa meeti qaaxechina ne tunetaanoona, ebi mooyo ceenoona ne toommooch shaggemmone.

¹⁰ Ne gonde shuunoon gibeneti neene; ‘Koniyoona taan beegaanoone’ iti neene; ne aconaa ne ariyoona neen muriciitone; ne mulloonoo ‘Tayee besho koniyoona aalloone’ iti neene.

¹¹ Ne qaaxoona wokkiyoon ne hakkaani gonde mooyo, ne toommooch woyemmone; bayon ne hakkaani aallo ne toommooch shaggemmone; amoonolla ne ariyaan beetaa, diqqoona aallo neech shaggemmone.

¹² “Ne bushittinoochee tiijjaꞌa shuunaabee ne echeti, iicoonaa meeti qaaxoonon shuunoona kupphebe; diqqich neech kaamoon qayaachemmone; diqqich ne etteenaꞌon shatiyoo qayaachemmi neene.

¹³ Meeti ciicoon waayoona nireti neene; agenee keyi baarooba xojjenoon ciinnii beetinaꞌo, xojjenee hiddechinaꞌo, ne toommooch tunemmon geteete; eke tiyiree neen wodiibeete.

¹⁴ Boonoshi galloomminaꞌone; qaaqqoo boonoshin michemmone; qaaqqee aaxxoochee boonoshin wodiyoon hakkaacheete; ebiyoo asho kachiibeeti gachoommo woyee asho bi aafooch koteebeeti qaaqqoommo toonoone.

¹⁵ Ne bushittinoochee tiijjaa tookkaa ne aajjetinaꞌo, tookkaa ne giixetinaꞌo, neech boonoshi tuniyemmo ebiniye. Boonoshi gommon yechemminaꞌone; neen wodiyemmo aalloone” iye.