Isiyaasi 46 - Kafa Linguistics Project

Baabloon Beeti Koote Nuggisheenaꞌo

¹ “Beeli goyinnete; Neebi goobete; boonoshi shahalleenaꞌo gijjeenaꞌo toommooch xaaneeteete; taahiti gijjeenaꞌoyichoo maggetinaꞌone.

² Ikkittinoona goobee goyinneheete; boonoshi misileenaꞌon wodiyoon hakkaaneenaꞌone; boonoshiyolla kecaa hammiteete.

³ “Yaaqobichi yareenaꞌote, bulli Israꞌeelee cureenaꞌote, ittoshi shiijjoochee tiijjaꞌa ta tiqqetinaꞌote, ittoshi indee maacoochee tiijjaꞌa ta miꞌetinaꞌote, ta waanee waayebote.

⁴ Ittoshi geenemmi wottoon ittoshi Nuggishoo taane; ittoshi bukkemmi wottoonoo, ittoshin miꞌemmo taane. Ittoshin hallito taane; ittoshin miꞌemmo taane; ittoshin shiimemmo taane; wodiyemmo taane.

⁵ “Taan konina shaahiihote? Koninoo tachiyote? No shaaheyemmoyich konina taan toyiihote?

⁶ Asheenaꞌo aachoon boonoshi kolloochee tebbeheete; birewoonoo machoona qocciyeete; aachee ukkechon boonoshi kiraayaa, nuggishoon tuniiꞌi shuunehe; boonoshiyoo guufeꞌi biich goyinneheete.

⁷ Tiijjiꞌi boonoshi gogooch shaggiyeete. Ikke xaaꞌooch boonoshi neechigaata, arooch neexehe; bi beeti xaaꞌoochee shuuroon hakkaache. Ikke asho bi waan bi corootigaata, waayee wochaache; bi iritoochee wodiyoon hakkaache.

⁸ “Hini axaaxechinaꞌote, ebin gabibote; shalligishoo getote; ittoshi mulloochoo gedote.

⁹ Wonna besheti mooyon gabibote; Nuggishoo taane; tayee baroo aalloone; Nuggishoo taane; taanoo shaahemmo aalloone.

¹⁰ Ciirooch tunemmi mooyon shiichaꞌa awaajjito taane; meeti yemeenoyee aaf, amo tunemmo gaata getteto taane. ‘Ta ciico manjoone; ta daaggoo bullin ceechemmo taane’ ito taane.

¹¹ Aabi-keyo waanee yechiibeeti booyoommon, wohi showoochee ta daaggoon ceechemmi ashoon, ceeggemmo taane; getteto taane; ceechemmo taane; gabito taane; tuniyemmo taane.

¹² “Iberoochee wokkiti babbereenaꞌote, ta waanee waayebote.

¹³ Ta cadiqoon deebaabeeto taane; ebiyoo woho toonoone; ta wodiyoo yagaachemmone; Tsiyoonin wodiyemmo taane; ta oogoonoo Israꞌeelich immemmo taane” iye.