Isiyaasi 45 - Kafa Linguistics Project

Yeeri Qiroosi Taatemmoyich Kaaco

¹ Aageteenaꞌo biich hajjeyemmoyich, taateenaꞌochi giidoon bi giishiyemmoyich, kello bi aafooch hicheyaanoon, qechoo bi tunemmoyich, bi qannoona bi yechiti, bi huuttiti Qiroosich, Doono Yeeri ishichiye:

² “Ne aafooch hammemmo taane; guudinaꞌon yittiiree tachemmo taane; gooshoochee shuuneeti shaaqqeenaꞌon tiichemmo taane; xuuree tuggeenaꞌonoo kuxxemmo taane.

³ Manderooch, aashe xaaꞌooch kiceeti, meeti gaannoon neech immemmo taane; ebina, ne shigoona neen ceeggeto, Israꞌeelee Nuggishoo Doono Yeeri ta tunoon, ariyemmo neene.

⁴ Taan ariyoo ne qajjetaanona, ta guuno Yaaqobicha iyaꞌa, ta kaacceti Israꞌeelicha iyaꞌa, ne shigoona neen ceeggeto taane; oogee shigoon neech immeto taane.

⁵ Ta, Doono Yeeri taane; tayee baroo aalloone; tayee bare nuggishoo aalloone; taan ariyoo ne qajjetaanona neen kupphiyemmo taane;

⁶ Ebiyoo aabi-keyoochee aabi-gimooch beddaahaa beeti asheenaꞌo, Doono Yeeri ta baach tunoon, tayee bare nuggishoo aallo bi tunoonoo, boonoshi ariyemmoyichiye.

⁷ Manderoonaa bekkoonon hallito taane; deꞌe yemeenoonaa gonde yemeenoonon deebaabeetoo taane; ebi bulli mooyon tuniyaabeeto Doono Yeeri taane.

⁸ “Shimaayeenaꞌote, cadiqoon dambee kindiibote; gumeenaꞌo amiyochoommon dichibeete; showoo qecheebe; wodoonaa cadiqoona collebe; Doono Yeeri ta ebin hallito taane.

⁹ “Biin shuunetona tookkii kaaree beetoyich woowo! Aroo nuuqqee qiicoommone; nuuqqoo biin hacheton, ‘Amooniye ne shuuneebeeto?’ Woyee ‘Neech kishoo aalloone?’ gettehe?

¹⁰ Bi nihoon ‘Amoyichiye taan ne shiyeto?’ bi indeenoo ‘Amoyichiye taach maaxoo ne manjeto?’ ii beetoyich woowo!” iye.

¹¹ Israꞌeelee Yaafoo tuneti, biinoo halliti Doono Yeeri ishichiye: “Ta bushiisheenaꞌochon taan echehote? Ta kishee shuuneechon ciinnii beetona echoon hakkehote?

¹² Showoon shuuneto, ashoon aree toommooch hallito, taane; shimaayeenaꞌon yaggito ta kishoone; shimaajji halleenaꞌon qociito taane.

¹³ Cadiqittinee shuunoyich Qiroosin shuurikkito taane; bi gommo bullin tachemmo taane; biyoo ta katemoon shuunemmone; ta asheenaꞌon kecoochee kichemmone; ebin bi tuniyemmo, gatiyoo qochemmoyich, woyee gaaco bi danemmoyich toonoone” iye Beshe Mawe Doono Yeeri.

¹⁴ Doono Yeeri ishichiye: “Gibitsee gaanno, Topphiyee giixee qiicoo ittoshicho tunemmone; neexi genje Saabee asheenaꞌo ne waan waaree, neech hajjeyemminaꞌone; sansalatoona cuyaa waaree neen dabbemminaꞌone; neen qollebee neech goyinneree: ‘Yeeri beeto neenna tookkiiniye; biyee bare nuggishoo aalloone’ gettemminaꞌone” iye.

¹⁵ Wodiyechi Israꞌeelee Nuggishoocho, ne, ne qelloon aachaabeeti Nuggishoo neene.

¹⁶ Shahalloon shuunee beetinaꞌo bulli, yeellemminaꞌone; giishemminaꞌone.

¹⁷ Tunebaani Doono Yeeri, bulli yemeenee wodoon, Israꞌeeleenaꞌon wodiyemmone; ittoshiyoo bulli yemeenoon yeelleyaachemmo ittoshine; giisheyaachemmo ittoshine.

¹⁸ Shimaayeenaꞌon halliti Doono Yeeri, showoon halliti, shuuneti, manjiiti, beeyi xaaꞌoon bi tunemmoyichani, shokkoon bi tunemmoyich hallaani Yeeri ishichiye: “Ta, Doono Yeeri taane; tayee bare nuggishoo aalloone.

¹⁹ Ta, mandere showoochaa aashoona yibbaateyaano taane; Yaaqobichi yareenaꞌoyich, ‘Duuboon taan qaawibote’ getaano taane; Doono Yeeri ta, iberoon yibbaateho; tate mooyon awaajjiyo.

²⁰ “Aageteenaꞌoochee muriccitinaꞌote, wobote; ikkooch kiceeree giddebote. Mixoochee shuuneeti shahalloon shaaggii beetinaꞌoyich, wodiyoon hakkaaneenaꞌo waan corootii beetinaꞌoyich, mullo aalloone.

²¹ Getote; ittoshi taggoon yaaꞌote; ikkotteree koceebote. Ebin shiichiꞌi gettito konine? Ebin wonna awaajjito konine? Doono Yeeri ta toone? Tayee bare nuggishoo aalloone; Cadiqoonaa Wodiyechona tuneto, tayee bare nuggishoo aalloone.

²² “Nuggishoo ta baachalli baroo aallo bi tunetoyich, showee tuggo bulliich beetinaꞌote, ta waan wotteree wodibote.

²³ Cadiqe ta noonoochee qaaro kechitone; ebiyoo shaddeyaachemmone; ‘Gutenoo bulli taach goyinnemmone; heciyoo bulli taanna wogemmone’ iyaꞌa, ta qelloona wogeto taane.

²⁴ “Asheenaꞌo ‘Cadiqoonaa giidoona danemmo Doono Yeer waanaa baachiye’ getiree taachon yibbaatemminaꞌone; ta toommooch tiyitinaꞌo bulli, ta waan waaree yeellemminaꞌone.

²⁵ Israꞌeelee yareenaꞌo bulli, Doono Yeeri taanna cadiqemminaꞌone; oogoon danemminaꞌone” iye.