Isiyaasi 44 - Kafa Linguistics Project

Nuggishoo, Doono Yeeri Baach Tuno

¹ Doono Yeeri ishichiye: “Ta guuno Yaaqobo, ta kaacceti Israꞌeelo, eke waayebe.

² Neen halliti, maacooch neen shuuneti, neen gaachaabeeti Doono Yeeri ta, ishichaabeeto taane: Ta guuno Yaaqobo, ta kaacceti Israꞌeelo, shattaahine.

³ Shacheweti showooch aacon, woniyemmo taane; shuuqqiti showoochoo aachi xuuphoon kichemmo taane; ta Ayaanoon ne shiijjereenaꞌo toommooch, ta diiroonoo ne yareenaꞌo toommooch, ukkemmo taane.

⁴ Aacon gaawichii uchiti mocoochoommon, aachi gashooch beeti mixochoommon, uummemminaꞌone.

⁵ Ikkoo ‘Ta, Doono Yeericho taane’ gettemmone; baroo Yaaqobichi shigoona ceekkemmone; baroo wotta ‘Doono Yeericho’ geti bi kishooch kooremmone; Israꞌeeli shigoona shigemmone” iye.

⁶ Israꞌeelee Taatoonaa Biishee Wodiyechona tuneti Doono Yeeri, Beshe Mawe Doono Yeeri, ishichiye: “Ta, shiichoo taane; ta taco taane; tayee bare nuggishoo aalloone.

⁷ Taan shaahemmo konine? Bi beegaata, eke gete; ta aafooch ebin giddiibe; wonna, ta asheenaꞌon ta manjiitoochee tiijjiꞌi beeton gete; gubb tunemmi mooyon gete; gubb amo tunemmo gaata, eke gete.

⁸ Shattaahote; keqqiyaahote; wonnee tiijjaꞌa ittoshich getaano taane? Ittoshi ta miixoo ittoshine; tayee bare nuggishoo beete? Tayee bare Xaqqee Inderoo aalloone; koninolla ariyaache” iye.

Shahalleenaꞌo Cooqireyoo

⁹ Shahalleenaꞌon shuunee beetinaꞌo bulli duubeenaꞌone; boonoshi aaxxiibeeti mooyinaꞌoo gaacaalleenaꞌone; boonoshi miixeenaꞌo ciinaacheete; amoonolla ariyaacheete; ebich yeellemminaꞌone.

¹⁰ Amoyichona gaacaani nuggishoon shuuneebeeto woyee misiloon qiiciibeeto konine?

¹¹ Ebiyoommi misiloyich goyinneebeeto bulli yeelle ceellemmone; shahalloon shuunee beetinaꞌo asheenaꞌone; eke boonoshi bulli ikkooch kiceeree neexebeete; bulliyona keqqemminaꞌone; ikkittinoona yeelleminaꞌone.

¹² Gooshukkoo xuuroon daammii qaaqqoona wociihe; modooshoonoo gaawichiye; mochoo kupphiiꞌinoo shuunehe; ebinoo bi shuunee beehooba shaacee shachewehe; bi giidoo niree maraatehe.

¹³ Anaaxoo mixon woderoona qeellehe; koppoona kooriꞌi boꞌoon kichiye; tachee qiicoona tachiye; ashi shaahoonaa ashi malletoommona tuniiꞌi kexooch kotiihe.

¹⁴ Yigee mixinaꞌon kuxxiye; geelloon woyee diꞌoon kaacciꞌi kubbi daggooch bi dici kupphemmoyich qajjiye; woyee ciidee mixon bi bechee amiyona dicciye.

¹⁵ Ebiyoo asho qaaqqooch shookkemmi mixon tunehe; ashoo qaton daammii shookkiꞌi kachiye; koshonoo kachiihe; wottoo shahalloon shuuneꞌi arooch goyinnehe; qiiceeti shahalloon shuuneꞌi bi aafooch gutenehe.

¹⁶ Aree qaton qaaqqooch shookkii, meenon michiꞌi bi qettee wottoon maahe; shookkii bi kachitoyee gubb, “Usha! Qeecceto taane; qaaqqoon kacheto taane” iye.

¹⁷ Aroochee echetona shahalloon shuunehe; bi aafoochoo guufee goyinnehe; bi waan corootiibee, “Ne, ta nuggishoo ne tunetoyich taan wodiibe” iye.

¹⁸ Ebiyoommi asheenaꞌo shalligaalli mullaalleenaꞌone; boonoshi aafo kaappetone; ebich beegon hakkaacheete; boonoshi mulloo kaappetone; ebich gaboon hakkaacheete.

¹⁹ Ebi shahalloon shuunee beetinaꞌo daggooch “Ebi michi qaton qaaqqooch shookkehoye; bi gachoona koshon kachiihoye; meenonoo michaꞌa maahoye; illa aabichiree, echetona ciigiiti mooyon tuniyehote? Ebi michi aafooch dihi goyinnehote?” iꞌi yexiiti, ariyecho woyee shalligecho ikkolla aalloone.

²⁰ Tulloon baaxxiye; muricechi bi mullo biin muriciitone; bi qelloon wodiyoon woyee “Ebi ta qanne kishooch beeto koote mooyo toone?” geton hakkaache.

Doono Yeeri Bi Asheenaꞌon Batteyaano Tuno

²¹ Doono Yeeri ishichiye: “Yaaqobo, Israꞌeelo, ebi mooyon shalligibe; ta guuno neene; ta neen hallito taane; ne ta guuno neene; ta neen batteyaachemmo taane.

²² Ne axaaxoon quboochoommon, ne xuꞌoon quboochoommon, shoterekkayiree aalliyemmo taane; neen ta biishetoyich ta waan wottebe” iye.

²³ Doono Yeeri ebin bi tuniitoyich, Doono Yeeri Yaaqobin bi wodiitoyich, Israꞌeeleenaꞌo daggooch bi oogoon bi bekkiitoyich, shimaayeenaꞌote, biich shoddebote; showee ducheenaꞌote, oogii cookibote. Guudinaꞌote, kubbeenaꞌonaa bi daggooch beeti mixinaꞌonote, ililibote.

²⁴ Ne indee maacoochoo neen halliti, neen Biishechi Doono Yeeri ishichiye: “Bullin hallito, shimaayeenaꞌon ta ikkeeto yaggito, showoon hecceto Doono Yeeri taane; ebiyooba taanna tookkii koniyoona aalloone.

²⁵ Koote keemechinaꞌochi keemoon, qaaxechinaꞌochi qaaxoonoo, duubo tuniyemmo taane; yiiteenaꞌochi ariyoon guuppemmo taane; boonoshi ariyoon tuushittino tuniyemmo taane;

²⁶ tunebaani ta maddechinaꞌochi qaaroon kachiyemmo taane; ta wocheyechinaꞌochi ciicoon ceechemmo taane; Yerusaalemin ‘Ashi beemi xaaꞌoon tunemmine,’ Yihudee katemeenaꞌonoo ‘Wochinnoon shuuneyemminaꞌone,’ boonoshi buriceenaꞌonoo ‘Tiyemmo ittoshine,’ gettemmo taane.

²⁷ Aachi gejjeenaꞌon ‘Shuuꞌote; ittoshi aacinaꞌon takkemmo taane’ gettemmo taane.

²⁸ Qiroosin ‘Ta asheenaꞌon qiddemmone; aroo ta daaggoo bullin ceechemmone’ gettemmo taane; Yerusaaleminoo ‘Wochinnoon shuuneyemmine’ gettemmo taane. Yaafee kexonoo ‘Ne heco hecceyemmone’ gettemmo taane” iye.