Isiyaasi 43 - Kafa Linguistics Project

Bi Asheenaꞌon Biishoyich Yeeri Gibenikkoo

¹ Yaaqobo, Israꞌeelo, neen halliti, Doono Yeeri and ishichii beetone: “Neen biisheto taane; shattaahine; ne shigoona neen ceeggeto taane; ne taacho neene.

² Aachi daggoona ne beshaa beegaata, ta neenna tookki tunemmo taane; ooge aachi daggoona ne beshaa beegaata, aacinaꞌo neen qooxaachemminaꞌone; qaaqqee daggoona ne beshaa beegaata, neen michaachemmone; qaaqqee aaxxo neen michaachemmone.

³ Israꞌeelee Yaafoo ne Nuggishoo Doono Yeeri ta, neen Wodiyecho taane; neen biishoyich Gibitsin immemmo taane; ne qoodoyich Topphiyoonaa Seebinon immemmo taane.

⁴ Ne, taach aaxxoo, moogeetonaa shuchetona ne tunetoyich, asheenaꞌon ne qoodoyich, aageteenaꞌonoo ne keroyich, beshiiree immemmo taane.

⁵ Ta neenna tookkaa ta tunetoyich shattaahine; aabi-keyo waanee, aabi-gimo waaneenoo, ne shiijjereenaꞌon kici deebemmo taane.

⁶ Ta anaami bushiishoonaa ta maache bushiishoona wohi showoochee, showee toommo bulliichee boonoshi woyemmoyich, dambi-waani showee asheenaꞌon, gawukkibote, deshi-waani showee asheenaꞌonoo bajjaahote, gettemmo taane.

⁷ Boonoshi ta shigoona ceekketi, ta oogoyichoo ta halliti, ta asheenaꞌone” iye.

Israꞌeeli Yeerichi Miixoo Tuno

⁸ Yeeri ishichiye; “Aafo boonoshich beetaa wolleti, waamo boonoshich beetaa ulleti, asheenaꞌon deebote.

⁹ Aageteenaꞌo bulli ikkooch kiceebeete; asheenaꞌo kiceebeete; boonoshi daggoochee and tunee beeton gettito, wonnee mooyonoo shiichiꞌi nooch bekkiito, konine? Boonoshi miixeenaꞌon boonoshi deebaa, iberoo boonoshi tunoon kachiibeete; asheenaꞌoo waayeree, ‘Ebi iberoone’ geteete.

¹⁰ “Nuggishoo ta tunoon shalligiree, taan ittoshi ariyemmonaa ittoshi gibenemmonoyich, ta kaacceti ta guuno, ta miixoo ittoshine” iye Doono Yeeri. “Tayee aaf nuggishoo aalloone; tayee gubboo beetaachemmone.

¹¹ Ta, Doono Yeeri taane; tayee besh wodiyecho aalloone.

¹² Gubb tunemmi mooyon shiichaꞌa getteto taane; awaajjito taane; ittoshinoo wodiito taane; ittoshi daggooch ebin tuniito dallaawe nuggishoo toonoone; ebich ittoshi ta miixoo ittoshine; ta, Nuggishoo taane” iye Doono Yeeri.

¹³ “Wonna beddaahaa, ta Nuggishoo taane; koniyoona ta kishoochee wodiyoon hakkaache; shuunemmo taane; bajjemmo konine?” iye.

Baabloonee Showoochee Murico

¹⁴ Ittoshin Biishee Wodiyechi Israꞌeelee Yaafoo Doono Yeeri ishichiye: “Ittoshi naboyich ginee naayon Baablooni toommooch daachiyemmo taane; katemee uxeree kelleenaꞌon tiichemmo taane; are katemeexi asheenaꞌochi emiroo eeppi shaddeyemmone.

¹⁵ Ta, ittoshi Yaafe Nuggishoo, Doono Yeeri taane; Israꞌeelin halliti, ittoshi Taatoo taane” iye.

¹⁶ Baharee daggooch gommon halliti, giidechi aachi daggooch boochoon kichii,

¹⁷ gaarinaꞌonaa haresheenaꞌona, ginee naayinaꞌonaa ginee anaaminaꞌona woyemmoyich tuniiti, dech boonoshin qeejjiti, wochi boonoshi tiyaachemmoyich tuniiti, gippee ciitoochoommon boonoshin ooyiiti, Doono Yeeri ishichiye:

¹⁸ “Aafi mooyon shalligiyaahote; wonnee mooyonoo gabiyaahote.

¹⁹ Ebiyoche, andire mooyon tuniyemmo taane; ebiyoo and bekkemmone; ebi ittoshich aricheyaache? Barahee daggoona gommon kichemmo taane; aroochoo aaco xuupphemmoyich tuniyemmo taane.

²⁰ Kaacheti ta asheenaꞌo uchemmoyich aacon barahoochaa, woce aacon shuuꞌi showoochaa ta immetoyich kubbi cooxinaꞌo taan oogiyemminaꞌone; boqqelleenaꞌonaa shaakkeenaꞌonoo taan galletemminaꞌone.

²¹ Ta qellich ta halliti asheenaꞌo, taan gallete shoddemminaꞌone” iye.

Israꞌeeleenaꞌochi Axaaxoo

²² Doono Yeeri ishichiye: “Yaaqobo, ne ta shigoon ceegaano neene; Israꞌeelo, ta mooyochon taahito neene.

²³ Micciibeeti deejjoyich tunemmi bagoon taach deebaano neene; woyee ne deejjoona taan oogiyaano neene; ‘Maayi buuroon deebe’ getona neen iritiyaano taane; ‘Ixaanee deejjoon giddiibe’ getonoo neen yulliyaano taane.

²⁴ Gaawe cinnechi ixaanoon gijjoona taach kemeyaano neene; ne deejjee awuyona taan michiyaano neene; tunebaani ne axaaxoona taach shaagoon tunehine; ne xuꞌoonoo taan taahiihine.

²⁵ “Ta shigoyicha geti ne axaaxoon maaremmo, ta qelloona Yeeri taane; ne axaaxoon gabaachemmo taane.

²⁶ Taach shalligichibe; eke taggebone; ne mooyon gidiidee, ne xallittinoon bekkiibe.

²⁷ Qaabbechi ne nihoo axaaxoon shuunehe; ne ukkireenaꞌoo ta sheeroon shaaddeheete.

²⁸ Ebich yaafee kechi ukkireenaꞌon cooniihoye; Yaaqobi aallemmoyich, Israꞌeeliyoo naakkeyemmoyich tuniihoye” iye.