Isiyaasi 42 - Kafa Linguistics Project

Yeerichi Guuno

¹ Doono Yeeri ishichiye: “Deggaa ta yecheti, ta kaacceti, biinna ta emiriti, ta guuno hinine; ta Ayaanoon bi toommooch kotiito taane; biyoo aageteenaꞌoyich dayinnetoon kindiyemmone.

² Bi qaaroon oogichiree cookaachemmone; bi qaaro addibaaboochaanoo waayeyaachemmone.

³ Kopheeti shombeqoon tiishaachemmone; taha bedditi ceechoonoo takkaachemmone; tunebaani gibeneeton tuneree ashi yaroo bullich dayinnetoon daniyemmone.

⁴ Dayinnetoon showee toommooch bi tuniimmi wottoon, taahaachemmone; gibenoon kuxaachemmone; baharee gashoonaa buure showoonooch beetinaꞌo bi sheeroon waayoyich qaatemminaꞌone” iye.

⁵ Shimaayoon halliꞌi yaggiti, showoonaa bi daggooch beetinaꞌo bullinon shuuneti, aree toommooch beeti asheenaꞌoyich kashee hiinnoon immiti, arooch shaꞌee beetoyich ayaanoon immiti, Doono Yeeri ishichiye:

⁶ “Doono Yeeri ta, neen cadiqoona ceeggeto taane; ne kishoonoo yechemmo taane; neen quyemmo taane; ta asheenaꞌoyich wogoon, aageteenaꞌoyichoo bekkoon, neen tuniyemmo taane.

⁷ Ebina aaf doogeenaꞌochi aafoon gaxxemmo neene; qoppeenaꞌon cuyee kexoochee, manderooch kotetinaꞌon aroochee, kichemmo neene.

⁸ “Ta, Doono Yeeri taane; ta shigo ebine; ta oogoon baroo konichona imaachemmo taane; ta galletoonoo shahalloyich imaachemmo taane.

⁹ Shiichaꞌa ta getteti mooyo ceennitone; and wotta gubb tunemmi mooyon, bi tunoyee shiichaa gettaabeeto taane” iye.

Galletee Shoddo

¹⁰ Doono Yeerich andire shoddoon shoddebote; bi galletoon showee toommo bulliichaa shoddebote. Baharee toommona shaꞌee beetinaꞌo bulli, baharee daggooch beeti halleenaꞌo bulli, galletebote. Baharee gashooch, buure showoonaa arooch beetinaꞌonote, shoddebote.

¹¹ Barahoonaa arooch beeti katemeenaꞌona, Qedaari asheenaꞌo koteti gafeenaꞌoo cookibeete; Seela kotetinaꞌoo ililibeete; guudi toommoochaanoo cookibeete.

¹² Doono Yeerinoo oogiibeete; bi galletoonoo baharee gashoonaa buure showoonoochaa awaajjibeete.

¹³ Doono Yeeri ginee anaamochoommon kechemmone; ginee anaamochoommon kaaroona shiixxii tiyitone; cookemmone; bi qaaroon oogichi bunnemmone; bi etteenaꞌo toommooch sharemmone.

Bi Asheenaꞌon Gaachoyich Yeeri Gibenikkoo

¹⁴ Doono Yeeri ishichiye: “Meeti yemeenoon cikkito taane; haaꞌiyaa cikkaa qajjeto taane; tunebaani and, maaxoo manjeti maachechoommon cookemmo taane; kaami kaama kachaabeeto taane.

¹⁵ Guudinaꞌonaa geppeenaꞌonon aalliyemmo taane; arooch colleto bullin shuuꞌiyemmo taane; aacinaꞌon shuuꞌi showoon tuniyemmo taane; kote aacinaꞌon shuuꞌiyemmo taane.

¹⁶ Aaf doogeenaꞌon boonoshi ariyaani gommona yaabemmo taane; boonoshi ariyaani kaattoonoo boonoshin yaabemmo taane. Boonoshi aafooch beeti manderoon bekkooch shaddemmo taane; giyaa keye xaaꞌoon tachemmo taane; ebi mooyinaꞌon tuniyemmo taane; boonoshin dufaachemmo taane.

¹⁷ Shahalleenaꞌon gibenee beetinaꞌo, misileenaꞌon ‘Ittoshi no nuggishoo ittoshine’ ii beetinaꞌo yeelleree, gubb wottemminaꞌone” iye.

Israꞌeeleenaꞌo Deꞌa Getaache Geto

¹⁸ Ulleenaꞌote, waayebote; wolleenaꞌote, gaawichiree ciinote.

¹⁹ Ta guunoyee besh wolloo konine? Ta daachiyemmi wocheyechoyee besh ulloo konine? Taach gibeneeti ashichoommon, wolleto, Doono Yeerichi guunochoommon wolloo konine?

²⁰ Israꞌeelo, meeti mooyon beeggeto neene; tunebaani gabaa deꞌaachine; ne waamo qechoone; tunebaani waayeyaachine.

²¹ Doono Yeeri bi cadiqittinoyicha iꞌi, bi sheeroon oogiyoonaa moogiyoonon shunniye.

²² Tunebaani hini asheenaꞌo bokkee bosheeꞌi, oppee maacooch hichetinaꞌone; cuyee kexoochoo aacheetinaꞌone; olleetinaꞌone; boonoshin wodiyemmo aalloone; kechetinaꞌone; “Wochibote” ito koniyoona aalloone.

²³ Ittoshi daggoochee ebin waayemmo, woyemmi yemeenoyicha getiree ellemmo konine?

²⁴ Yaaqobin boggoyich, Israꞌeelin bokkoyich beshii immito konine? Ebin tuniito Doono Yeeri toone? Ebiyoo, axaaxoon no shuunetoyich, bi daaggoona hamon no qajjetoyich, bi sheeroyichoo deꞌa geto no qajjetoyichiye.

²⁵ Ebich bi kaaree shiixxoonaa giidechi koyoonon, no toommooch deejjiye; no guudoona qaaqqoon yeshiihe; tunebaani no ariyaano noone; noon michiye; tunebaani ebi nooch giyaanoone.