Isiyaasi 41 - Kafa Linguistics Project

Israꞌeeleenaꞌoyich Gibenikkeeti Gibeno

¹ “Buure showooch beetinaꞌote, taane cikki ellebote; asheenaꞌo boonoshi giidoon andiriibeete; ta waan gidderee yibbaatebeete; ikkittinoona nallee gabberooch giddebone.

² “Aabi-keyo waanee ikkoon tiijjito, bi hammito bulliichaa wudoon daniito konine? Aageteenaꞌon bi aafooch beshiiꞌi immiye; taateenaꞌoo biich hajjeyemmoyich tuniihe; bi goraadoona boonoshin quttoon tuniihe; bi maꞌoonoo yongo daammiibeeti maaxxoon tuniihe.

³ Bi baatoo neexxii ariyaani gommona boonoshin yookkiꞌi diggoona hammiye.

⁴ Ebin shuunetonaa tuniitona, shiijjeroonoo wonnee tiijjii ceeggito konine? Doono Yeeri taane; tawoo shiichaꞌa beehoye; ciirooch beddaahaanoo beeyecho taane.

⁵ “Buure showooch beetinaꞌo ta tuniiton beeggii shattiyeete; showee tuggooch beetinaꞌoo qeweheete; ikkooch kiceeꞌi waaheete.

⁶ Ikkoo baroon gaachehe; manoo bi manoon, kupphebe iye.

⁷ Kishee shuunee ariyecho aachee ukkechon kupphiihe; modooshoona qiccii shishiibeeto xuuroon yexxii yeshii beeton, ‘Ebi qiccaa ne yeshiito gaawetone’ iye; shahalloo dihaachemmoyich, boonoshiyoo misimaaroona xaaqqiyeete.

⁸ “Tunebaani ta guuno Israꞌeelo, ta kaacceti Yaaqobo, ta shunechi Abrahami yaroocho,

⁹ showee tuggoochee neen deeboye; wohi showee kelloochee neen ceeggoye. Neen, ‘Ta guuno neene’ iyoye; neen kaaccoani dufaano taane.

¹⁰ Ta neenna tookkaa ta tunetoyich, shattaahine; ne Nuggishoo ta tunetoyich, keqqiyaahine; ta neen kupphiyemmo taane; neen gaachemmo taane; cadiqe ta mochoona neen deggemmo taane.

¹¹ Ne toommooch tiyimmo bulli yeellemmone; cooneyemmone; neen shixxii beetinaꞌo billiiree aallemminaꞌone.

¹² Ne etteenaꞌon qaawemmo neene; tunebaani boonoshin daneyaachemmo neene; neenna koyee beetinaꞌo billiiree aallemminaꞌone.

¹³ Ne Nuggishoo Doono Yeeri ta, ‘Neen gaachemmo taane; shattaahine’ iyaꞌa, ne qanne kishoona yecheto taane.

¹⁴ Hipperoommi Yaaqobo, Israꞌeelee ashoocho, shattaahine; Doono Yeeri ta neen gaachemmo taane; neen Biishee Wodiyechi Israꞌeelee Yaafoo taane.

¹⁵ Ebiyoche, ta neen andire, aci gashechi, maayi buchi qiicoommon tuniyemmo taane; guudinaꞌon bushi yiikkemmo neene; geppeenaꞌon maayi maaxxoommon tuniyemmo neene.

¹⁶ Shimaayooch shakkemmo neene; yongo boonoshin hidi daammemmone; yuboo boonoshin shaccemmone; newoo Doono Yeerina emiremmo neene; Israꞌeelee Yaafoona yebenemmo neene.

¹⁷ “Girechinaꞌonaa iritechinaꞌona aacon mucceheete; aacon qaawii mucceꞌi, shachewoona boonoshi heciyoo shuuqqiye; Doono Yeeri ta, boonoshi qolloon waayemmo taane; Israꞌeelee Nuggishoo ta, boonoshin dufaachemmo taane.

¹⁸ Shuuqqiti geppeenaꞌoochee aaco, bambeenaꞌo daggoochee aachi xuupho, kechemmoyich tuniyemmo taane. Barahoon aachi gejjoon, baggiti showoonoo aachi tunoon, tuniyemmo taane.

¹⁹ Shuuꞌi showooch, yigee mixo, geellee mixo, hadaasee mixonaa zayitee mixona, barahooch, ciido, naddee mixonaa yahoona, ceenniti kubboon colliyemmo taane.

²⁰ Ebiyoo, ebin tuniito Doono Yeerichi mochoo bi tunoon, Israꞌeelee Yaafoo ebin bi halloon, asheenaꞌo bulli ciini ariyemmoyich, gabi boonoshi shalligemmoyichiye” iye.

Koote Nuggisheenaꞌon Yeeri Shixo

²¹ Israꞌeeleenaꞌochi Taatoo Doono Yeeri ishichiye: “Ittoshi taggoon yaaꞌote; ittoshi miixoon deebote.

²² Ittoshi shahalleenaꞌon deebote; gubb tunemmo amo gaata nooch geteete; boonoshi ciiroon no ariyemmoyich, eboshin kichi no kindiyemmoyich wonnee mooyon nooch geteete.

²³ Nuggishoo ittoshi tunoon no ariyemmoyich gubb tunemmon nooch getote; no shattemmoyich, no keqqemmoyich, deꞌoon tuneba gondoon tuniibote.

²⁴ Ittoshiyoo tunebot, ittoshi tuniibeetoo duuboone; ittoshich goyinnee beetinaꞌoo tiyaareetinaꞌone.

²⁵ “Dambi-waanee ikkoon tiijjiyoye; biyoo waatone; aabi-keyoochee woyemmo ta shigoon ceeggemmo biine; nuuqqee achecho nuuqqoon bi neexoommon, biyoo ukkireenaꞌon neexxemmone.

²⁶ No ariyemmoyich, wonnee tiijjiꞌi gettito konine? Iberoone no gettemmoyich, shiichiꞌi keemmito konine? Gettito aalloone; awaajjito aalloone; ittoshi qaaroon waayeto aalloone.

²⁷ Batti batt, ebi gaawe mooyon Tsiyoonich getteto, taane; Yerusaalemichoo mishiraachee gettechon wocheto, taane.

²⁸ Ta ciinnemmona ikkolla aallehe; boonoshi daggooch boyoon hakkito aalloone; ta echeti echoon wochito aalloone.

²⁹ Ebiyoche, ebi nuggisheenaꞌo bulli gaacaalleenaꞌone; amoonolla tuniyoon hakkaaneenaꞌone; boonoshi misileenaꞌoo shokke yongeenaꞌone” iye.