Isiyaasi 40 - Kafa Linguistics Project

Gibeno Ceenniti Qaaro

¹ “Goggiibote; ta asheenaꞌon goggiibote” iye ittoshi Nuggishoo Yeeri.

² “Bi guuchittinee yemeeno ciiroon, bi axaaxoo maareyoon, Doono Yeer waanee gutte kishoon, bi axaaxee sheeroon bi deꞌon, Yerusaalemich maanjoona getote; biich awaajjibote” iye.

³ Awaajjoon gettii beetochi qaaro ishichiye: “Barahooch, Doono Yeerich gommon qanniibote; no Nuggishoyich woretoonoo kaachi qaxxebote.

⁴ Bamboo bulli kaama ceennemmone; guudo bullinaa geppoona dugilla yittemmone; keyaa giye showoo tatemmone; boge showoo naqqo tunemmone.

⁵ Doono Yeerichi oogo bekkemmone; ebin gettito Doono Yeeri bi tunetoyich, asho bulli ikkotteree ebin beeggemmone” iye.

⁶ Ikke qaaro “Cookibe” iye; tawoo “Ama getiree cookibote?” iyo; biyoo “Meeno taheti asho bulli mocoommone; bi malleto bulliyoo gaddeexi mocee bungoommone;

⁷ Doono Yeeri aree toommooch kachimmona mocoo shoolliye; mocee bungoo oojjiye; asho iberoochaa mocoommone.

⁸ Mocoo shoolliye; mocee bungoo oojjiye; tunebaani no Nuggishoochi qaaro bulli yemeenoon manjiree beeyemmone” iye.

⁹ Mishiraachoon gettaabeeti Tsiyoone, guudi cullullooch keye; mishiraachoon gettaabeeti Yerusaaleme, ne qaaroon oogichi cookibe; shattaahine; Yihudee katemeenaꞌoyich, “Ebiyoche ittoshi Nuggishoo” gete.

¹⁰ Nuggishoo Doono Yeeri ooge bi giidoona waa beetone; kupphe bi mochoona hajjemmone. Bi waabeeto, bi gaaccemmi gaacoon, bi immemmi shuunee gatiyoon, yechiꞌiniye.

¹¹ Qiddoochoommon bi bageenaꞌon quyemmone; bagee bushiishoon ikkooch kicemmone; bi sheenooch tiqqeree daammemmone; bagee indeenaꞌonoo ariqqoona yaabemmone.

¹² Aacinaꞌon bi kishee koppoona, shimaayoonoo bi kishee ciixona, showee buttoonoo qiicooch geddiꞌi qeelleto, konine? Guudinaꞌonaa geppeenaꞌonon machoona qoccito konine?

¹³ Doono Yeerichi Ayaanoon ariito, woyee mikkirechon tuneꞌi biich dojjito konine?

¹⁴ Ariyoon danoyich konina tookkii echeete? Dayinnetee gommon, ariyoonoo biich dojjito konine? Shalligee boochoon biich bekkiito konine?

¹⁵ Ebiyoche aageteenaꞌo baaretooch beeti aachi cotoomminaꞌone; machee toommooch beeti quttoomminaꞌone; buure showeenaꞌonoo quttoochoommon tiijjiye.

¹⁶ Libanoosi shaaroo deejjoon gogoyich, bi daggooch beeti cooxinaꞌo micciibeeti deejjoyich, bedaacheete.

¹⁷ Doono Yeeri aafoochaa aageteenaꞌo bulli, mooch haddeyaaneenaꞌone; boonoshiyoo bi aafoochaa am bedaaneenaꞌonaa gaacaalleenaꞌonane.

¹⁸ Yeerin ittoshi tachiya ii beeto konina tookkiiniye? Konina tookkishoo shaahiiyehote?

¹⁹ Shahalloon shuuna ariyecho shuunehe; aachee ukkecho aachoona dikkehe; birewee sansalatoonoo shuunehe.

²⁰ Gijjaalli girecho, quno maataani mixon giddiihe; bi dihaachemmoyich, shuuna ariyecho tachiree bi shuunemmoyich tuniihe.

²¹ Ariyaachote? Waayeyaachote? Wonnee yemeenoochee tiijjiꞌi ebi ittoshich getteyaanoone? Showoo halleetoochee tiijjiꞌi shalligaachote?

²² Yeeri, showee guuyee toommooch, bi taatee qeenon geddiꞌi kotehe; showee toommeexi asheenaꞌo kundoomminaꞌone; shimaayeenaꞌon maccillaatoochoommon yaggiye; beemi duukkaanoochoommon xogiye.

²³ Biyoo ukkireenaꞌon giishiihe; showoon qeejjii beetinaꞌochi oogoon shoottiye.

²⁴ Boonoshiyoo batt colleebeeti, cammon awureyaani bechoomminaꞌone; yongoon bi deejjimmona bekkech shuuqqemminaꞌone; maaxxoochoommon yongo boonoshin hidii daammiye.

²⁵ “Ishigaata taan, konina tookkii toyiihote? Konina tookkii tachiyote?” iye Yaafoo tuneti Yeeri.

²⁶ Ittoshi aafoon kaachiree shimaayooch ciinote; ittoshi beeggiibeeti xojjeneenaꞌon hallito konine? Bi boonoshin ginee naayinaꞌochoommon kichiye; boonoshi bullinolla boonoshi shigoona ceeggiye; ooge giidecho, ooge hakkecho bi tunetoyich ikkolla aalleyaache.

²⁷ Yaaqobo, Israꞌeelo, amoyich “Ta gommo Doono Yeerich aacheetone; ta dayinnetoonoo ta Nuggishoo aaxxiyaache itone” inne?

²⁸ Ariyaano neene? Waayeyaano neene? Doono Yeeri bulli yemeenee Nuggishoone; showoo bullin hallito biine; maraateyaache; taahaache; bi gaboon maqqii shagon hakkemmo aalloone.

²⁹ Biyoo maraatetinaꞌoyich hakkoon immii beetone; giidaalloyichoo giidoon daakkiye.

³⁰ Gurimaasheenaꞌo taahiꞌi nireheete; haccellimiꞌi dihiyeete.

³¹ Tunebaani Doono Yeerin gibenoona quyee beetinaꞌo, boonoshi giidoo andiremmone; booyochoommon qoshoona yoobbemminaꞌone; woccemminaꞌone, taahachemminaꞌone; hammemminaꞌone, maraateyaachemminaꞌone.