Isiyaasi 4 - Kafa Linguistics Project

¹ Arooba shabaatte maacheenaꞌo ikke anaamon yeshiree, “No hajjee maayoon maayemmo noone; no hajjee tahoonoo tahemmo noone; ne mecheenaꞌo tuneree baach no ceekketaa, kenaalleenaꞌone getaa no cooneyoo no waanee wohe” gettemminaꞌone.

Yerusaalemi Wochinnoon Shuuneyemmi Tuno

² Arooba Doono Yeerichi michi qaakko mallet gaawoonaa oogechona tunemmone; showoochee daneebeeti aafo, muriccii woditi Israꞌeeleenaꞌoyich geecoonaa oogoonon tunemmone.

³ Tsiyoon echetinaꞌo, Yerusaalem beetinaꞌo, kashoona boonoshi beeyemmoyich kobereetinaꞌo bulli, yaafeetinaꞌo getteyemminaꞌone.

⁴ Doono Yeeri Tsiyooni maache bushiisheenaꞌochi kiinoon machemmone; Yerusaaleminoo bi daggooch ufeti damoona bi wooretoochee, bi nalloonaa bi ayaanee hakkoona xalliyemmone.

⁵ Aroochee Doono Yeeri Tsiyooni guudi toommonaa arooch kicee beetinaꞌo bulli toommonooch areddoon quboon, xumoonoo cufoonaa cobcobbiibeeti qaaqqee aaxxoonon deejjemmone. Yeerichi oogee yiiroo are katemee toommooch ooge duukkaanoochoommon yiiremmone.

⁶ Bi oogee yiiroo areddee aaboyich yiiroon, yongoonaa amiyonoyichoo deeboon tunemmone.