Isiyaasi 38 - Kafa Linguistics Project

Taatoo Hiziqiyaasi Biiyee Wodoo

¹ Ebiyooba Hiziqiyaasi biiyee mawiiꞌi qitooch beddiye. Amootsi bushoo keemechi Isiyaasi biin beegga waaꞌi, “Doono Yeeri ‘Hini biiyoochee wodaachemmo neene; qitemmo neene; ebich ne kexon tachibe’ itone” iye.

² Hiziqiyaasiyoo bi aafoon daabbo waan wochiichii, Doono Yeer waan corootiye.

³ Ishichiinoo iye: “Doono Yeero, gibeneeto ta tunoon, ceeni ta mulloona neech ta maddoon, ne aafooch gaawe mooyon ta tuniyoonoo and ne shalligemmoyich neen qollehoye” iye; girgittiinoo eeppiye.

⁴ Aroochee Doono Yeeri Isiyaasich ishichiye:

⁵ “Hamiree Hiziqiyaasich ishichibe: Ne qaabbechi Daawitichi Nuggishoo Doono Yeeri ishichiye: ‘Ne corootoon waayeto taane; ne acimoon beeggeto taane; ne eeni toommooch aaraa uuche naton daakkito taane.

⁶ Neennaa hini katemoonon Asooree taatoo kishoochee gaache wodiyemmo taane’ gete” iye.

⁷ “Doono Yeeri gibenikkiti gibeno ceennemmo bi tunoyich, malletoo ebine:

⁸ Doono Yeeri Akaazichi daqqee toommooch beeti yiiritto aashire daqqoon gubb bi wottemmoyich tuniyemmone” iye. Ebina yiiritto aashire daqqoon gubb wottehe.

⁹ Yihudee taatoo Hiziqiyaasi biiyeꞌi bi woditoyee gubb ebin kooriye:

¹⁰ Ta yemeenee dagg tatoochaa aallaa beeton, eche ta yemeenooch maash hammaa beeton taach shaahiye.

¹¹ Tawoo, “Kashechinaꞌo beeti hini showoochaa Doono Yeerin beegaachemmo taane; showee toommooch beetinaꞌona tookki ebiyee bekk ashoon beegaachemmo taane.

¹² Ta beeyi xaaꞌoo qiddeenaꞌochi duukkaanoochoommon, ta waanee waaxaa aallehe; ta kasheen qoreddee shippechochoommon qoddehoye; mahenoochee taan kuxxaa bajjehine; areddoon, xumoonoo taan aalliihine.

¹³ Showoo harimmi wottoon haaꞌiyaa quyoye; ta quumo bullin daaheroo tiishoommon tiichehine; areddoon, xumoonoo taan aalliihine.

¹⁴ Gaashikafeechoommon, yageccechoommonoo cookiyoye; uggechoommon qaaddoye; damba wottee ciinoochee tiyitona ta aafeenaꞌo taahiyeete; ta Doonocho, duꞌeto taane, taan wodiibe” iyo.

¹⁵ Illa amoon gettehote? Bi taach gettitone; bi qelloona bi, ebin tuniitone. Ta kashe caammetoyich, ta yemeeno bullin, xephibee shaꞌemmo taane.

¹⁶ Doonocho, asheenaꞌo ebina kashoona beeheete; ta kasho ebi bullina kashoona beehe; taan wochi wodiiree kashoona ta beeyemmoyich tuniibe.

¹⁷ Ebiyoche oogichaa ta caammo taach gaacoon tunehe; newoo ta kasheen aallee oppoochee wochihine; ta axaaxoo bullin ne gubb duppehine.

¹⁸ Maash hammito neen galleteyaache; qitito neen galleteyaache; oppooch kinditinaꞌo, gibeneeto ne tunoon, gibenoona quyeyaacheete.

¹⁹ Hanaach ta tuniyaa beetoommon, neen galletemminaꞌo kashechinaꞌone; niheenaꞌo boonoshi bushiisheenaꞌoyich, gibeneeto ne tunoon arichiiheete.

²⁰ Doono Yeeri taan wodiyemmone; no kashee yemeeno bullin, maqqechi shoddee qiicoona Doono Yeerichi yaafee kexoochaa shoddemmo noone.

²¹ Isiyaasiyoo, “Balaasee aafee nuuphon deebiree bi gaabee toommooch gedote; biyoo wodemmone” itone.

²² Hiziqiyaasiyoo, “Doono Yeerichi yaafee kexooch hammemmo ta tunee malletoo amoone?” itone.