Isiyaasi 36 - Kafa Linguistics Project

Yerusaalemin Kocha Asooreenaꞌo Miicho

¹ Taatoo Hiziqiyaasi taateti aaraa awuddinnee natooba, Asooree taatoo Senakireebi Yihudee showee xaqqee uxerechi katemeenaꞌo bullin kochii yechiye.

² Asooree taatoo, Rabishaqin meeti ginee naayinaꞌona tookkii Lakishee Hiziqiyaas waan, Yerusaalem daachiihe; biyoo hammiꞌi dambee kote aaco kindiibeeti, woretee gaꞌeexi qoredda machechochi goyo waan daammiibeeti gommooch neexehe.

³ Aroochee, Hiliqiyichi bushoo taatee kechi iraashoo Eliyaqimi, taatoochi koorechi Shebininaa Asaafi bushoo kiinee koorechi Yoꞌaahina bi waan waaheete.

⁴ Aroochee Rabishaqi boonoshich “Hiziqiyaasich ishichi getote: Beshe taatoo tuneti Asooree taatoo ishichii beetone: ‘Ebi shaahoon ne gibenaabeeti gibeno amoone?

⁵ Noonee ceroo koyee ariyoonaa hakkoona tatemmon neech shaahii beete? Konin gibenaꞌaaniye ta toommooch ne tiyeto?

⁶ Ebiyoche, Gibitsee taatoon gibeneto ne tunegaata, tiishe shombeqee gumboon gibeneto neene; biyoo bi toommooch degeebeeti ashi kishoon shelleeꞌi kochiibeeti ebi are gumboommone. Gibitsee taatoo biin gibeneebeeto bullich ebiyoommone.

⁷ Ittoshiyoo taach “No Nuggishoo Doono Yeerin gibenemmo noone” ittoshi getaachemmoyich, Hiziqiyaasi Yihudee asheenaꞌonaa Yerusaalemi asheenaꞌonoyich, “Ittoshi goyinnemmo, hini deejjee gudee aafoochiye” getona, guudi toommeexi, Doono Yeerichi goyinnee xaaꞌeenaꞌonaa deejjee gudeenaꞌonon aalliitone.

⁸ “ ‘Andoo waaree Asooree taatoo ta doonona tookki gajjiteebe. Hareshee yoohon hakkiibeeti asheenaꞌon danoon hakkemmo ne tunegaata, gutte hume haresheenaꞌon neech immemmo taane.

⁹ Gibitseenaꞌochi gaarinaꞌonaa hareshechinaꞌonon gibenebee, ta doonochi ginee iraashoochee shotaani ikkoonolla kochii wochoon ne hakkemmo, aabichireeshiye?

¹⁰ And iberoochaa Doono Yeeri daaggaanoon hini showoon aalliiya waaton neech shaahaa beetote? Doono Yeeri taan damba keyiree ebi showoon koyi ta aalliyemmoyich gettitone’ itone” iye.

¹¹ Aroochee Eliyaqimi, Shebininaa Yoꞌaahina Rabishaqich, “No, ne guuno waayaabeeto no tunetoyich, Araamee noonoona nooch getani, xaqqee uxeree toommooch beeti asheenaꞌo waayeebeeti Ayihudee noonoona nooch ne getaachemmoyich neen qollehone” iyeete.

¹² Tunebaani Rabishaqi, “Ta doono ebin ta gettemmoyich taan bi wocheto, ittoshinaa ittoshi doononoyich baachiye? Ittoshina tookki boonoshi gondechoon maayemmi, boonoshi aachiyoonoo uchemmi, xaqqee uxeree toommooch beeti asheenaꞌoyichoo toone?” iye.

¹³ Aroochee Rabishaqi neexeechii qaaroon oogichiꞌi, Ayihudee noonoona, “Beshe taatoo tuneti Asooree taatoochi qaaroon waayebote.

¹⁴ Taatoo ishichitone: Ittoshin wodiyoon hakkaachemmo bi tunetoyich, Hiziqiyaasi ittoshin dachaaye.

¹⁵ Wottoo ‘Iberoochaa Doono Yeeri noon wodiyemmone. Hini katemeyoo Asooree taatoo kishooch beshiitaa icheyaachemmine’ iꞌi Hiziqiyaasi Doono Yeerin ittoshi gibenemmoyich bi gettii beeton waayeyaahote.

¹⁶ “Hiziqiyaasi gettii beeton waayeyaahote. Ebich Asooree taatoo ishichii beetone: ‘Taanna tookki shunebote; ta waanoo wobote; ittoshi ikkikkoona ittoshi woyinoonaa ittoshi balaasoonoochee mamote; oppeexi ittoshi aacoochee uyote.

¹⁷ Ebiyoo waaꞌa ittoshi showoon shaahiibeeti showooch, maayoonaa woyinee uyoona, koshonaa woyinee qomboona beeti showooch ittoshin ta daammemmi wottooniye.

¹⁸ Hiziqiyaasi “Doono Yeeri noon wodiyemmone” getona ittoshin bi muriciyaachemmoyich ittoshi qelloon ariibote! Iberoochaa aagetee nuggisheenaꞌoochee bi showoon Asooree taatoo kishoochee wodiito beete?

¹⁹ Hamaatinaa Arifaadinochi nuggisheenaꞌo aayeete? Sefariwayimi nuggisheenaꞌo aayeete? Shamaarin ta kishoochee wodiiteete?

²⁰ Ebi aagetee showeenaꞌochi nuggisheenaꞌo bulli daggoochee boonoshi showoon ta kishoochee wodiyoon hakkito beete? Doono Yeeri Yerusaalemin ta kishoochee bi wodiyemmo aabichireeshiye?’ itone” iye.

²¹ Tunebaani “Biich amoonolla wochiyaahote” iꞌi taatoo Hiziqiyaasi boonoshich gettitoyich, biich ikke qaaroonona wochaanoon cikkii qajjiyeete.

²² Aroochee Hiliqiyichi bushoo taatee kechi iraashoo Eliyaqimi, taatoochi koorechi Shebininaa Asaafi bushoo kiinee koorechi Yoꞌaahina boonoshi tahoon keexxii, Hiziqiyaas waan waaꞌi, Rabishaqi gettiton biich gettiyeete.