Isiyaasi 35 - Kafa Linguistics Project

Yeeri Biishetinaꞌochi Emiroo

¹ Barahoonaa shuuꞌi showoona emiremminaꞌone; barahoo emiriree, aadillee bungoommon bungemmone.

² Barahoo woddii bungemmone; emiroona, shoddoonoo wucwuccemmone; Libanoosi oogo, Qermeloosinaa Shaarooninochi oogo biich ichemmone. Doono Yeerichi oogoon, no Nuggishoochi oogee yiiroon beeggemmone.

³ Taahiti mocheenaꞌon kupphiibote; qeweti guteneenaꞌon manjiibote.

⁴ Boonoshi mullo shattii beetinaꞌon “Kupphebote; shattaahote; ittoshi Nuggishoo nichoon kichiya, boonoshi shuuneton boonoshich shuuneree, ittoshin wodiiya, woyemmone” getote.

⁵ Arooba aaf doogeenaꞌo aafo ciinnemmone; ulleenaꞌochi waamo waayemmone.

⁶ Baata tiisheenaꞌo xiixxechoommon capphemminaꞌone; dudoochi heciyoo emiroona shoddemmone; aaco barahoochee kechemmone; aachi xuupho barahoochee xuupphemmone.

⁷ Michiibeeti qacoo gamini gejjoon tunemmone; shacheweti showoochee aaco xuupphemmone; boqqelleenaꞌo kufee xaaꞌooch, mocoo, kohoonaa duukkoona collemmone.

⁸ Arooch gommo kechemmone; ebiyoo Yaafee Gommo getteyemmone; xalleyaaneenaꞌo aroona besheyaachemminaꞌone; aroona hammemminaꞌo Yeer asheenaꞌo baachiye; tuusheenaꞌo aroona hamaachemminaꞌone.

⁹ Daahereenaꞌo arooch beetaachemminaꞌone; kuxxii maabeeti cooxinaꞌo arooch waataachemminaꞌone; aroochoo daneyaachemminaꞌone; tunebaani shiweetinaꞌo aroona shaꞌemminaꞌone.

¹⁰ Doono Yeeri biishetinaꞌo aroona shaꞌemminaꞌone; shoddebeeshoo Tsiyoon woyemminaꞌone; bulli yemeenee emiroon ukoochoommon ukemminaꞌone; emiroonaa wucwuconon danemminaꞌone; ayinoonaa tuumona wokkemmone.