Isiyaasi 34 - Kafa Linguistics Project

Aagetee Showeenaꞌon Yeeri Naxemmo Tuno

¹ Aageteenaꞌote, hach gidderee waayebote; asheenaꞌote, ellebote; showoonaa showee toommooch beeto bullina, alemoonaa aroochee daneto bullina waayebeete.

² Doono Yeeri aagetoo bullin kaaretone; kupphe bi kaaro boonoshi ginee naayinaꞌo bulli toommooch kinditone; ciroona boonoshin aalliyemmone; boonoshin guureyoyich beshiiree immemmone.

³ Boonoshi daggoochee guureetinaꞌo maach duppemminaꞌone; boonoshi dubenee shaaꞌo hooggemmone; guudinaꞌo boonoshi damoon tahemminaꞌone.

⁴ Shimaajji halleenaꞌo bulli muuyi aallemminaꞌone; shimaayoo macaafee qodoommon qodemmone; woyinee waamonaa balaasee waamona ooyoommon boonoshi daggeexi halleenaꞌo oojjemminaꞌone.

⁵ Ta goraado bi digaayemmi wottoon shimaayoochaa uchitone; Edoomeenaꞌo toommooch, aallebeete ta iti asheenaꞌonochi toommoochoo nalliya kindemmone.

⁶ Doono Yeeri Botsiraa deejjoon, Edoomaa oogeti meechi bashoon bi qanniitoyich, Doono Yeerichi goraado damoona muureetone; awuyonoo michitone. Deejjee bagee baaddoonaa emmishoonochi damoon, ooge bagee baaddoochi yeyitee awuyonoo michitone.

⁷ Edoomi asheenaꞌo gaahoochoommon, gubbenoonaa bariyoonochoommon dihemminaꞌone; showoo damoona wooremmone; awuyonoo michemmone.

⁸ Doono Yeeri, Tsiyooni toommooch bi tuniitoommon tuniiree, Edoomi toommooch nichoon bi gaaccemmi aabo beetone.

⁹ Edoomee showeexi aacinaꞌo reenjoon tunemminaꞌone; showoo waagera shaddeyemmone; showoo bulliichoo qaaqqoo aaxxemmone.

¹⁰ Xumoonaa areddoonon qaaqqoo tahaachemmone; bi cufoo bulli yemeenoon tuqi beeyemmone; showoo shiijjeroochee shiijjerooch beddaahaa shokkoon echemmone; bulli yemeenooch koniyoona aroona besheyaachemmone.

¹¹ Tunebaani gaceenaa caayona bullemminaꞌone; yuyeenaa kurechoona arooch beeyemminaꞌone; bi toommoochoo bi happeeyee woderoonaa aallee tumbina geecheyemmone.

¹² Showoon qeejjemmi taatoo beetaachemmone; bi iraasheenaꞌo bulli aallemminaꞌone.

¹³ Boonoshi taatee kexooch angixo, boonoshi mishigoochoo shimbirikkoonaa guccinona collemmone. Boqqelloonaa shaakkeenoyich beemi xaaꞌoo tunemmone;

¹⁴ aroochaa kubbi cooxinaꞌo qaccemmoona tookki danemminaꞌone; yinneenaꞌo boonoshinaa boonoshina ceegeyemminaꞌone; xumi yoogeenaꞌo waaree arooch kashemminaꞌone.

¹⁵ Yuye bi kexon arooch haggemmine; gabexe qofiree bi bushiishoon bi sheenooch guuppemmine; gaceenaꞌo ikkotteree arooch kiceyemminaꞌone.

¹⁶ Eboshichon Doono Yeerichi macaafoochee qaawiree shemmebote; ebi areenaꞌoochee ikkolla aalleyaachemmone; eboshiichee addaaraalli ikkolla daneyaachemmone; ebiyoo Doono Yeeri bi noonoona bi gettitoyich, wotta bi Ayaano boonoshin kicemmo bi tunetoyichiye.

¹⁷ Bi boonoshich ixoon duppiye; bi kishoonoo woderoona boonoshich qoodiye; boonoshi bulli yemeenooch hajjemminaꞌone; shiijjeroochee shiijjerooch beddaahaa arooch kotemminaꞌone.