Isiyaasi 33 - Kafa Linguistics Project

Gaachoo Danoyich Corooteeti Corooto

¹ Koniyoona neen aalliyaanoon aalliyaa beetocho, koniyoona neen dawushaanoon dawushaa beetocho, neech woowo! Aalliyoon ne neechiyooba aallemmo neene; dawushoon ne neechiyooba dawusheyemmo neene.

² Doono Yeero, neen no gibenetoyich nooch ariqqebe; maaddi maaddoona nooch giidoon imbe; xuuxee aabooboo noon wodiibe.

³ Ne qaaro gigehee, asheenaꞌo woceheete; ne tiyemmona aageteenaꞌo shaceheete.

⁴ Gechoo kiceyoommon keco kiceyemmone; gurimaashe gechoo caphoommon asheenaꞌo aroochaa capphemminaꞌone.

⁵ Doono Yeeri bulliyee beshoone; bi beeto damba shimaayoochiye. Biyoo Yerusaalemin dayinnetoona, cadiqoonoo ceechemmone.

⁶ Arooba, ittoshi yemeenoon manjoo tuniyemmone; ittoshich wodoon, ariyoonaa shalligoonon immemmone; Doono Yeerin shato boonoshich aaxxe gaannoon tunemmone.

⁷ Ebiyoche, ginee anaaminaꞌo gommoochaa cookiyeete; diggee wocheyechinaꞌo tiittee eeppiyeete.

⁸ Gomminaꞌo shokkoon echeheete; aroona shaꞌemmi asho aallehe; wogo happeetone; katemoo hoxeetone; ashich aaxxiibeeto aallehe.

⁹ Showoo shuuqqiye; shokkoon echehe; Libanoosi yeellehe; shuuqqiinoo iye; Shaarooni barahoon shaahiye; Bashaaninaa Qermeloosinooch beeti mixinaꞌochi waamo oojjiye.

¹⁰ Doono Yeeri ishichiye: “And tiyemmo taane; ta giidoonaa ta oogoonon bekkiyemmo taane.

¹¹ Maayi maaxxoon xifeꞌi tulloon shimoommon, ittoshi gabiibeeto bulli gaacaallo tunemmone; ebich ittoshi kachiibeeti hiinno qaaqqoochoommon ittoshin michemmone.

¹² Ittoshiyoo booro tunoyich micciibeeti xaqqoommon, qaaqqoyich kucheebeeti angixoommon tunemmo ittoshine.

¹³ Wohooch beetinaꞌote, ta shuuneton waayebote; katinooch beetinaꞌote, ta hakkoon ariibote” itone.

¹⁴ Tsiyoon beeti axaaxechi asheenaꞌo shattiyeete; Yeerich qeyaaneenaꞌo qeweheete; boonoshiyoo “No daggoochee michiibeeti qaaqqee daggooch beemon hakkemmo konine? No daggoochee bulli aabooch michiibeeti qaaqqoona tookkii beemon hakkemmo konine?” iyeete.

¹⁵ Cadiqoona beeto, iberoon yibbaateebeeto, xuꞌoona daneebeeti shimon hoxeebeeto, xuccoochee bi kishoon quyeebeeto, damoon ukkiya koceyoon waayoochee bi waamon oppeebeeto, gondoon ciinoochee bi aafoon oppeebeeto,

¹⁶ aroo oogee xaaꞌooch kotemmone; xaqqee mishigo bi deebee xaaꞌoon tunemmone; kosho biich ichemmone; bi aacoo tahaachemmone.

Gubb Woyemmi Oogee Yemeeno

¹⁷ Ne aafeenaꞌo taatoon bi oogoona beeggemminaꞌone; wohooch yaggeeti showoon beeggemminaꞌone.

¹⁸ Wonna ittoshi keqqiti keqqoon gabibee “Ukkiroo aaye? Machoona qocciꞌi gibiroon deqqecho aaye? Dilaalee ukkiroo aaye?” gettemmo ittoshine.

¹⁹ Boonoshi yibbaatoo giyaani, shalligoon ittoshi hakkaani, ittoshich giyaani noonoona ittoshin daaciibee echeti maacmanje asheenaꞌon ebiyee bekk beegaachemmo ittoshine.

²⁰ No baareenaꞌon no baaraabeeti Tsiyooni katemoon beegote; diggoona ittoshi beeyemmoyich gaaweti tuneti Yerusaalemin ciinote. Bi xogoo ciroona waaxeyaani bi wodereenaꞌo kuxeyaani, bi xaaꞌoocheenoo shuuraani duukkaanoommin tunemmine.

²¹ Ebi aroochaa, Doono Yeeri ogooge aacinaꞌonaa aachi xuupheenaꞌonoommon tuneree, bi oogee yiiroona noonna tookki beeyemmone; no etteenaꞌochi markabeenaꞌo aree toommona tegaachemminaꞌone.

²² Doono Yeeri nooch nallecho, Doono Yeeri nooch sheeroon kichecho, Doono Yeeri no taatoone. Noon wodiyemmoo biine.

²³ No etteenaꞌochi markabee wodereenaꞌo muriccitinaꞌone; giimbeenaꞌoo manjaaneenaꞌone; toommooch beeti sharo yaggeyaanoone. Boonoshi gaanno bullin boggemmo noone; baata sheqqooch beddaahaa hohi daammemmone.

²⁴ Tsiyoon beechi “Biiyeto taane” gettemmi ikke asholla beetaachemmone; axaaxecho bullich maaroo danemmone.