Isiyaasi 32 - Kafa Linguistics Project

Tatoona Qeejjemmi Taatoo

¹ Taatoo cadiqoona iraasheenaꞌoo tatoona qeejjemminaꞌone.

² Eboshiyoo boonoshi ikkikkoona yongoonaa yuboonoochee aashee xaaꞌoommon, baraheexi aachi xuuphoommon, shuuꞌi showoochaa xaqqee guudee yiiroommon tunemminaꞌone.

³ Ebiyee bekk, ciinniibeeti asheenaꞌo aafo oppeyaachemmone; waayeebeeti asheenaꞌochi waamo gaawichiree ellemmone.

⁴ Afaafinechinaꞌochi mullo gaawichi mooyon goommemmone; heciya tippeenaꞌochi heciyoo gaawichi yibbaatemmone.

⁵ Ebiyee bekk, yeexeroo ooge asho getteyaachemmone; xummoo moogeyaachemmone.

⁶ Yeexeroo yeexeree yibbaatoon yibbaatehe; bi mullo gondoon gabiye; Yeeri aalli mooyon tuniihe; Doono Yeerichon koote mooyon yibbaatehe; shaacetoyich maanjaache; shachewetoyichoo uchaache.

⁷ Xumme ashi gaboo gondoone; girechochi cookoo tato bi tunetaanoona koote yibbaatoona girechon aalliyoyich gondoon gabiye.

⁸ Tunebaani deꞌe asho deꞌe mooyon gabiye; deꞌe mooyonoo manjiꞌi beehe.

Yerusaalemi Maacheenaꞌo Naxeyemminaꞌo Tuno

⁹ Hini mashaamiti beemon beeti maacheenaꞌote, tibote; ta qaaroon waayebote; hini keqqaalloon koteti maacheenaꞌote, ta yibbaatoon ellebote.

¹⁰ Hini keqqaalloon koteti maacheenaꞌote, woyino aafeyaachemmo, maayi aafo maceyemmi gooroo waataachemmo bi tunetoyich, nato beshemmona, qewemmo ittoshine.

¹¹ Hini mashaamiti beemon beeti maacheenaꞌote, qewebote; hini keqqaalloon kotetinaꞌote, qewebote; ittoshi tahoon shooti shokkaachoon tunebote; ittoshi shimetooch dookoon eddebote.

¹² Emirikkiibeeti qeemi showoonaa woyinee budo bullinoyich, ittoshi getoon qici eefote.

¹³ Angixonaa guccinona ta asheenaꞌo showooch colletone; asheenaꞌo emiroona beebee echeti kexinaꞌonaa emiroona beebee echeti ebi katemoonoyich eefote.

¹⁴ Taatee kexo onoo tunemmone; asho ceenniti katemoo aqqemmone; geppoonaa dilaaloona happaa bulli yemeenooch aallemmone; kubbi kureenaꞌonaa gijjeenaꞌona bahemmi gaddoon tunemmone.

¹⁵ Ebi tunemmo, dambee no toommooch Ayaano ufemmi wottoon, barahoo qeemi showoon tunemmi wottoon, qeemi showoo shaaroon shaahimmi wottooniye.

¹⁶ Ebiyooba qeemi showooch, barahoochoo dayinnetoonaa cadiqoona tunemmone.

¹⁷ Ebi cadiqee aafo diggoon deebemmone; tooqqii kashoonaa gibenoona bulli yemeenoon showee toommooch tunemmone.

¹⁸ Ta asheenaꞌo diggoo ceenniti beeyi xaaꞌooch, diggee xaaꞌooch, tooqqii kashee xaaꞌooch beeyemminaꞌone.

¹⁹ Baderoo kubboon bi yexxitaanona, katemoo bi giishetaanona,

²⁰ aachi gashooch yaroon shookkiibeeti ittoshi, gatteenaꞌonaa kureenaꞌonon mocechi gaddooch gashee maanjiibeeti ittoshi, diireeto ittoshine.