Isiyaasi 31 - Kafa Linguistics Project

Gibitsin Gibeno Duubo Tuno

¹ Israꞌeelee Yaafoo waan ciinon, Doono Yeerin echoon qajjiichii, haresheenaꞌon gibenee beetinaꞌoyich, boonoshi gaarinaꞌo meetinaꞌo, boonoshi hareshechinaꞌoo giidechinaꞌo tunoon gibeneꞌi, gaachoon danoyich Gibits kindii beetinaꞌoyich woowo!

² Tunebaani Doono Yeeri ariyechone; naxoon deebemmone; bi qaaroon shaddaachemmone; gondeenaꞌochi kechi asheenaꞌo toommooch, axaaxoon shuunee beetinaꞌon gaachee beetinaꞌochi toommoochoo tiyemmone.

³ Gibitseenaꞌo asheenaꞌoani, nuggisheenaꞌo tooneenaꞌone; boonoshi haresheenaꞌo meenon tahetinaꞌoani, ayaaneenaꞌo tooneenaꞌone; Doono Yeeri bi mochoon bi yaggiyooba, gaacheebeeto tepheyemmone; gaachoon deqqiibeetoo dihemmone; guttiyona aallemminaꞌone.

Yeeri Yerusaalemin Gaachemmo Tuno

⁴ Doono Yeeri taach ishichiye; “Daaheroo woyee more daaheroo gijjoon yechiichii gigee bi beetaa, meeti qiddeenaꞌo ceegeeꞌi bi waan boonoshi waataanolla, boonoshi cookoo biin shattii keqqichaache; ebiyoommon Beshe Mawe Doono Yeeri ta, Tsiyooni guudonaa bi geppoonoochaa koyeya kindemmo taane.

⁵ Kafee bi kechi toommooch bi qoshoon yaggaꞌa bi bushiishoon bi quyoommon, Beshe Mawe Doono Yeeri ta, Yerusaalemin quyemmo taane; biin gaache wodiyemmo taane; biin shiwe wodiyemmo taane.

⁶ “Israꞌeeleenaꞌote, kupphiiꞌi ittoshi hukketi ta waan wottebote.

⁷ Ebiyooba aachoonaa birewoonoochee axaaxechi ittoshi kishoona ittoshi shuuneti, shahalleenaꞌo bullin duppemmo ittoshine.

⁸ Asooreenaꞌo ashicho tuneyaani goraadoona dihemminaꞌone; ashicho tuneyaani goraado boonoshin maayemmone; goraadee aafoochee woccemminaꞌone; boonoshi gurimaasheenaꞌo guunon tuneree maddemminaꞌone.

⁹ Boonoshi mishigo keqqoona dihemmone; boonoshi ginee iraasheenaꞌo baanderoon beegiichi keqqoona aallemminaꞌone” iye bi qaaqqoo Tsiyoon, bi qaaqqee sheelloo Yerusaalem beeti Doono Yeeri.