Isiyaasi 30 - Kafa Linguistics Project

Gibitsina Tookkii Wogoon Gimo Duubo Tuno

¹ Doono Yeeri ishichiye: “Hukkechi bushiisheenaꞌoyich woowo! Ta waanee tuneyaani gaboona hammiyeete; axaaxee toommooch axaaxoon daakkoyich, ta ayaanoochee tuneyaani wogoon giyiyeete.

² Taan echeyaanoon Gibits kindiyeete; Faroonichi shoobooch gimon, Gibitsichi yiiroon beeyi xaaꞌoon tuniyoon qaawiyeete.

³ Ebich Faroonichi shoobo ittoshich yeelloon, Gibitsichi yiirooch beemo ittoshich cooneyoon tunemmone.

⁴ Amoommonolla boonoshi ukkireenaꞌo Tsoꞌaani katemooch boonoshi beetaa, boonoshi wocheyechinaꞌo Haneesi katemooch boonoshi shaggitaa,

⁵ boonoshin yeellii, cooniyemminaꞌone; boonoshich gaaconaa boonoshin gaachoonon hakkaani asheenaꞌo waan hamo boonoshi bullichona yeelloone” iye.

⁶ Negeeb beeti cooxinaꞌochon Doono Yeer waanee getteeti wocho ebine: “Daahereenaa daaheroona, xekereenaa awureebeeti dingeroona beeti iritee showoonaa xuuxee showoonon besheree, boonoshi gaannoon kuree toommooch, boonoshi yaaphoon gaalee toommooch xaaniree boonoshich gaacaani asheenaꞌo waan hammemminaꞌone.

⁷ Gibitsichi gaacho gaacaalloonaa duuboonane; ebich Gibitsin Xuppattaalli Dingero iyaꞌa shigiito taane” iye.

Deꞌa Getaani Asheenaꞌo

⁸ And hambe; bulli yemeenooch miixoo bi tunemmoyich boonoshi aafoochaa ebin madee toommooch qiici kooribe; macaafoochoo kooribe.

⁹ Ebiyoo hukkechi asheenaꞌo, koote bushiisheenaꞌo, Doono Yeerichi qociyoon waayo qaawaaneenaꞌo boonoshi tunetoyichiye.

¹⁰ Boonoshiyoo yaaꞌee beeggechinaꞌon “Yaaꞌoon beeggaahote” iyeete; keemechinaꞌonoo “Ibere mooyon nooch keemmaahote; kootolla bi tunetaa, noon emirikkiibeeti mooyon baach nooch getote.

¹¹ No hammaabeeti gommoochee badd ikibote; no shaaddoyich xugoon tuneyaahote; no, Israꞌeelee Yaafoochon waayoon ciroona qaawaachone” iyeete.

¹² Ebich Israꞌeelee Yaafoo ishichiye: “Ebi qaaroon ittoshi hoxetoyich, xuꞌoonaa xummittinoonon ittoshi gibenetoyich, aroona ittoshi degeetoyich,

¹³ ebi xuꞌo ittoshich, gaaheꞌi diha bedditi, diqqoona kaateꞌi dihiibeeti genje xaqqee uxeroommon tunemmone.

¹⁴ Bi tiishetoyee gubb, qaaqqee boodoyich woyee aachi ooboyich tunemmi gamini gocholla aroochee daneyaani, kewuceti nuuqqee qiicoommon tunemmo ittoshine” iye.

¹⁵ Israꞌeelee Yaafoo tuneti Nuggishoo Doono Yeeri ishichiye: “ ‘Ta waan wottoonaa tooqqii kashoona wodemmo ittoshine; tooqqii kotoonaa taan gibenoona hakkoon danemmo ittoshine’ iyoye; tunebaani ittoshi qajje iyote.

¹⁶ Ittoshiyoo ‘Hareshoon yebberee wocishalli no gettemmo ebin tuniyaachone’ iyote; ebich woccemmo ittoshine. ‘Afaafinechi hareshoona muriccemmo noone’ iyote; ebich ittoshin yookkii beetinaꞌo afaafinechinaꞌo tunemminaꞌone.

¹⁷ Ikke ashi miicho ittoshi daggoochee humeenaꞌon yoohi aalliyemmone; uucheenaꞌochi miicho ittoshi bullin yoohi aalliyemmone; ittoshi bulli woccii aallemmona, echeti giishecheenaꞌo guudi toommeexi baanderee mixochoommon, geppee toommeexi malletoochoommon tuneree echemminaꞌone” itone.

¹⁸ Tunebaani Doono Yeeri ittoshin ariqqeya haaꞌiihe; Doono Yeeri dayinnetee Nuggishoo bi tunetoyich, ittoshich ariqqoon shunniye; Doono Yeerin gibenee beetinaꞌo bulli diireetinaꞌone.

Yeeri Bi Asheenaꞌon Diiremmo Tuno

¹⁹ Yerusaalem beeti Tsiyooni asheenaꞌote, ebiyee bekk eefaachemmo ittoshine; Doono Yeeri ittoshin bi gaachemmoyich ittoshi qollegaata, ittoshich ariqqemmone; ittoshi cookee qaaroonoo waayeree ittoshi qolloon wochemmone.

²⁰ Doono, xuuxee koshonaa duꞌee aaconon ittoshich bi immitaanona ittoshi dojjecho ebiyee bekk ittoshiyee baraachemmone; ittoshi dojjechon ittoshi aafoona beeggemmo ittoshine.

²¹ Gommon muricciꞌi yoocha, qanna ittoshi getigaata, ittoshi gubbaa, “Gommo hinine; ebina hambote” ii beeti qaaroon waayemmo ittoshine.

²² Qiicaa shuuneeꞌi birewoona dikkeeti, wociitaa shuuneeꞌi aachoona dikkeeti ittoshi shahalleenaꞌon eeꞌe mooyochoommon “Okk wohote” getiree wokkii duppemmo ittoshine.

²³ Showooch ittoshi shookkiti yaroyich amiyon dichemmone; showoochee daneebeeti aafo gaawetonaa beshaa beshoona tunemmone; ebiyooba ittoshi gijjeenaꞌo gamini gaddooch maayemminaꞌone.

²⁴ Ittoshi gochiibeeti gatteenaꞌonaa kureenaꞌona hugaa xalleti, kiihona yoppheeti maayi aafoon maayemminaꞌone.

²⁵ Oogeti aallee aabooba, xaqqee uxereenaꞌo dihiyooba, genje guudinaꞌonaa geppeenaꞌonooch aaco woccemmone.

²⁶ Doono Yeeri bi asheenaꞌochi tiishoon sheppheꞌi bi wodiihooba, bi naxo mayiiton bi wodiihooba, agene aabeechoommon aaxxemmine; aabee aaxxo aafichoyee shabaatte kishoon besho tunemmone; shabaatte qemi aabo ikkochee kechiton shaahiree bekkemmone.

Doono Yeeri Asoorin Sheeremmo Tuno

²⁷ Ebiyoche, Doono Yeeri qaaqqoo aaxxoommon aaxxeebeeti kaaroona, kaama tuqiibeeti cufoona, wohoochee waa beetone; bi kookkooch kaaro ceennitone; bi heciyoo michiibeeti qaaqqoommone.

²⁸ Bi hiinno qettooch bedditi, hidii daammiibeeti aacoommone; taatittineenaꞌon gemoona woqqoommon woqqi, boonoshi gammooch lugaamoon qapphiiree aallooch daammemmone.

²⁹ Tunebaani yaafeeti baaroobee xum ittoshi shoddee beetoommon shoddemmo ittoshine; Israꞌeeleenaꞌochi Xaqqee Inderoo tuneti Doono Yeerichi guudooch, shumburoon huggiibee hammiibeeti ashichoommon ittoshi mullo emiremmone.

³⁰ Doono Yeeri ooge bi qaaroon waayiyemmone; aaxxeebeeti bi kaaroona, michiibeeti qaaqqee aaxxoona, yuboona, yattoona, muume baderoonoo kindiibeeti bi mochoo bekkemmone.

³¹ Doono Yeerichi qaaro Asooreenaꞌon keqqichemmone; biyoo boonoshin gumboona yexxemmone.

³² Doono Yeeri Asooreenaꞌon bi yexximmi haddoona Doono Yeer asheenaꞌo kamboonaa ximboonochi qaaroon waayiiheete; biyoo koyechi bi mochoon tiijjiree boonoshin kochemmone.

³³ Wodde yemeenoyee aaf Asooree taatoo miccemmi qaaqqee xaaꞌoon qannitone; ebi xaaꞌoo gaminoonaa hoonoona tunemmona aroochoo qaaqqoonaa wodde mixona beetone; waageroo ufoommon ufeebeeti Doono Yeerichi hiinno qaaqqoon yeshiyemmone.