Isiyaasi 3 - Kafa Linguistics Project

Yerusaaleminaa Yihudee Showoonooch Kindemmi Nalloo

¹ Ebiyoche, Doono, Beshe Mawe Doono Yeeri, asheenaꞌochi degoonaa gaachoonon, maayi dego bullinaa aachi dego bullinon Yerusaaleminaa Yihudinoochee aalliyemmone.

² Boonoshi ginee anaaminaꞌonaa ginee naayinaꞌonon, nallechinaꞌonaa keemechinaꞌonon, qaaxechinaꞌonaa geeneenaꞌonon,

³ aache ginee iraasheenaꞌonaa moogeetinaꞌonon, mikkirechinaꞌonaa kishee shuunee ariyechinaꞌonon, iicechinaꞌonoo aalliyemmone.

⁴ Bushiisheenaꞌon boonoshi toommooch ukkiriyemmone; nallefeenaꞌo boonoshin hajjemminaꞌone.

⁵ Asho biinnaa biinna ikkoo baroon neexi hajjemmone; asho bulli bi nuuchoo toommooch, asho bulli biinoommi bi manoo toommooch tiyemmone; bushoo oogoon hoxemmone; gaacaalli asho moogeeti ashi toommooch tiyemmone.

⁶ Asho bi nihoo kexoochee, ikke bi manoon yeshiree, “Neech taho beetone; noon, hini happeeti xaqqee gutoonoo qeejjibe” gettemmone.

⁷ Tunebaani arooba aroo bi qaaroon oogichiree, “Ta, guuccii wodiyechon tunoon hakkaache; ta kexooch maayoonaa tahoona aalloone; taan ashi toommooch ukkiriyaahote” gettemmone.

⁸ Yerusaalemi tattellaa beetine; Yihudee showoo tiishee beetone; ebiyoo asheenaꞌochi yibbaatoo tuneba boonoshi shuunoo Doono Yeerin ippiibeeto bi tunetoyichiye; bi oogoonoo qallayitinaꞌone.

⁹ Boonoshi aafoochee bekkeebeeti mooyo boonoshi toommooch miixee beetone; boonoshi axaaxoon aachaanoon, Sodoomee asheenaꞌochoommon axaaxoon xalla shuunee beetinaꞌone; boonoshi toommooch gonde mooyon boonoshi deebii beetoyich boonoshich woowo!

¹⁰ Cadiqeenaꞌoyich, “Mooyo ittoshich kaamemmo bi tunetoyich, ittoshi shuunee aafoon maayemmo ittoshine” gete.

¹¹ Boonoshi shuunetoommo boonoshich shuuneyemmo bi tunetoyich xuꞌechinaꞌoyich woowo! Aallo boonoshich woyemmone.

¹² Ta asheenaꞌon, bushiisheenaꞌo neexxii hajjiyeete; maacheenaꞌoo boonoshi toommooch ukkireheete. Ta asheenaꞌote, ittoshi ukkireenaꞌo ittoshin muriciitinaꞌone; gommoochee ittoshin badd wochitinaꞌone.

¹³ Doono Yeeri bi nallee gabberooch kotetone; bi asheenaꞌo toommoochoo nalliya tiyitone.

¹⁴ Doono Yeeri ogoogeenaꞌonaa asheenaꞌochi iraasheenaꞌona tookki ishichi taggemmone; “Woyinee goyoon aalliito ittoshine; girechinaꞌo waanee ittoshi boggito ittoshi kexooch ceennitone.

¹⁵ Ta asheenaꞌon ittoshi yiikkeebeeto, girechinaꞌo aafoon ittoshi tulliibeeto amoyichiye?” iye Beshe Mawe Nuggishoo Doono Yeeri.

¹⁶ Doono Yeeri ishichiye: “Tsiyooni maache bushiisheenaꞌo geecitinaꞌone; boonoshi qettimixon ciixxiibee, boonoshi aafoona xayishiibee shaꞌee beetinaꞌone; xeeqqeshee shaꞌeebee, boonoshi baateexi allubboon qaadii beetinaꞌone.

¹⁷ Ebich Doono Yeeri Tsiyooni maache bushiisheenaꞌochi qello xoremmoyich tuniyemmone; Doono Yeeri boonoshi maache achoon shokko echiyemmone” iye.

¹⁸ Arooba Doono Yeeri boonoshi baatooch geddeebeeti shashoon, qelli kaafoon, batti keyi ageneen shaahiibeeti boonoshi qetteexi shashoon,

¹⁹ waajji gudichoon, kishee shagaamoon, aafee oppoon,

²⁰ qelli shashoon, zaaboon, buroon, shittee firqaadoon, xifetoon,

²¹ kishee axxaammitoonaa muddee axxaammitoonon,

²² nati baarooba taheebeeti tahoon, maac taheebeeti tahoon, toommooch taheebeeti tahoon, kishooch yecheebeeti boorsoon,

²³ heeraawoon, muttee tuppoochee shippeti tahoon, qelli caacoon, aafee qeroonoo tiijji daammemmone.

²⁴ Shittee qoodoon shaaꞌo, buree qoodoon woderoo, gaawichaa shippeti qelli qoodoon xoroo, macecikkiti tahee qoodoon dooko, malletee qoodoon bano tunemmone.

²⁵ Ittoshi asheenaꞌo goraadoona, ittoshi ginee anaaminaꞌoo koyoochaa dihemminaꞌone.

²⁶ Yerusaalemi kelleenaꞌo muushenemminaꞌone; eeppemminaꞌone; katemeyoo shokko echaꞌa showooch koteti ureen shaahemmine.