Isiyaasi 29 - Kafa Linguistics Project

Yerusaalemi Naxeyemmi Tuno

¹ Areli getaa ceekketi, Daawiti koteti Yerusaalemi katemeyich woowo! Nati toommooch naton daakkaa, baareenaꞌo wochi wochaa baaree beebeete.

² Tunebaani Arelin xuuxiyemmo taane; aroochoo ayinoonaa tuumona tunemmone; ebi katemee damoona wooreti deejjee gudoommon tunemmine.

³ Bi guudoona kaamboon gedi giichemmo taane; daqqoonoo gedi giishiree biin xuuxiyemmo taane.

⁴ Yerusaalemi showee maac kepheechii yibbaateya qiicceebeeti kash guutoon shaahemmine; buttee maac duukkoochaa waayeebeeti qaaroon shaahemmine.

⁵ Tunebaani meeti ne etteenaꞌo qacini buttoommon tunemminaꞌone; meeti mulli manjeenaꞌoo beshee hammiibeeti maayi maaxxoochoommon diqqoona aallemminaꞌone.

⁶ Beshe Mawe Doono Yeeri, gigoon, showee qewoon, ooge qaaroon, yubee yongoon, showee shuuroonaa ciroona aalliibeeti qaaqqoonon deejjiree neen wodiyemmone.

⁷ Arelin kochiibeeti meeti aageteenaꞌo bulli, gumo aalloommon aallemminaꞌone; biin kochii duꞌii beetinaꞌo, manje bi mishigeenaꞌonoo kochii beetinaꞌo, xum bekkeebeeti yaaꞌoommon aallemminaꞌone.

⁸ Tsiyooni guudon kochiibeeti aageteenaꞌo bulli, shaaceti asho gumona maabee qeyiꞌi, maaddoona bi tiyimmona bi shaacoo qayaani woyee shacheweꞌi gumona uchiibee qeyii, maaddoona bi tiyimmona bi killoo shachewoona shuuqqiti ashoommon tunemminaꞌone.

Yeerichi Getoon Hoxo Bi Deebemmi Sheeroo

⁹ Worganebote; keqqibote; ulle wolleree echebote; woyinee uyoon uyaanoon mashebote; mashiibeeti uyoon uyaanoon dadeddebote.

¹⁰ Doono Yeeri tokketee ayaanoon ittoshi toommooch minjitone; keemechinaꞌo aafoon kaappitone; yaaꞌoon beeggii beetinaꞌochi qelloon oppetone.

¹¹ Ebi yaaꞌoo bulli ittoshich nasheeti macaafoommon tunetone; shemmoon hakkii beetoyich, “Ebin shemmebe” iꞌi boonoshi imigaata, biyoo wochiree “Nashee bi itoyich hakkaache” gettemmone.

¹² Shemmo hakkaanoyich, “Ebin shemmebe” iꞌi boonoshi imigaatoo, “Ta shemmoon hakkaache” gettemmone.

¹³ Doono ishichii beetone: “Hini asheenaꞌo ‘Neecho noone’ iibee boonoshi noonoona taan oogii beetinaꞌone; tunebaani boonoshi mullo ta waanee oogeton wohone; taach boonoshi shattiibeeto asho dojjiti duube doyoommonane.

¹⁴ Ebich hini asheenaꞌo daggooch worganikkiti gaakkechi mooyon wochinnoon tuniyemmo taane; ariyechinaꞌo ariyoo aallemmone; shalligechinaꞌochi shalligoo dooggemmone” iye.

Gubbich Tunemmi Gibeno

¹⁵ Boonoshi yameti yamoon Doono Yeer waanee aachiya qaawii beetinaꞌoyich, “Noon beeggesho konine? No shuunaa beeton ariyesho konine?” getona manderoon deebeꞌi aashoona shuunee beetinaꞌoyich, woowo!

¹⁶ Ittoshiyoo bulli mooyon shinnaawunniyote; iberoochaa nuuqqee hachechonaa nuuqqoonoochee aabine besho? Shuuneeti mooyo shuuneton, “Ne taan shuuneyaano neene” gettehe? Woyee “Ne tunii beeton ariyaachine” gettehe?

¹⁷ Giisheche aaboyee gubb Libanoosi kubbo goyee budon tunemmone; goyee budoo kubboommon tunemmone.

¹⁸ Ebi arooba, ulleenaꞌo boonoshich shemmeebeeti macaafoon waayemminaꞌone; manderooch beebee echeti aaf doogeenaꞌoo boonoshi aafo qecheetaa ciinnemminaꞌone.

¹⁹ Girechinaꞌonaa boonoshi qelloon giishii beetinaꞌona, Israꞌeelee Yaafoo tuneti Doono Yeeri immiibeeti emiroon wochinnoon danemminaꞌone.

²⁰ Maacmanjeenaꞌonaa cooqqirechinaꞌona aallemminaꞌone; gonde shuunechinaꞌo bulli hidaa aallemminaꞌone.

²¹ Ashoon gondii beetinaꞌo, taggee xaaꞌoochaa ashich olloon ollee beetinaꞌo, koote miixoona xalle ashi dayinnetoon dabii beetinaꞌo aallemminaꞌone.

²² Ebich Abrahamin biishee wodiiti Doono Yeeri Yaaqobichi yareenaꞌochon ishichii beetone: “Yaaqobi ebiyee bekk yeelleyaachemmone; yeelleree ceelleyaachemmone.

²³ Ta kishee shuunoo tuneti boonoshi bushiishoon boonoshi daggooch boonoshi beegiyooba, ta shigoon yaafoo tuniyemminaꞌone; Israꞌeelee Yaafoon oogiyemminaꞌone; Israꞌeelee Nuggishoon shattemminaꞌone.

²⁴ Ayaanoona muriccitinaꞌo shalligemminaꞌone; guruuxii beetinaꞌo dojjoyich deꞌa gettemminaꞌone” iye.