Isiyaasi 28 - Kafa Linguistics Project

Shamaari Naxeyemmi Tuno

¹ Efreemee mashechinaꞌoyich geecee gubbichoo tuneti, qeemi bambee toommooch beechaa woyinee uyoona yexxetinaꞌoyich oogee malleto tuneti, shoolle bechee bunggoommi Shamaarich woowo!

² Doono Yeeri, baderee yattoommi, aalliibeeti yuboommi, ceenniti giidechi aacoommi, hakkechonaa kupphoona tuneti ashoon qanniitone; ebi asho boonoshin showooch curulliyemmone.

³ Efreemee mashechinaꞌochi geecee gubbichoo baatoona neechemmone.

⁴ Qeemi bambee toommooch beeti Shamaari bi oogoon muccemmine; biyoo shoolliibeeti bechee bungoommon, maayi qecci goorooch shiichii gaangiti, asho bi beegigaata bekkech kuxxii bi maabeeti balaasoommon tunemmine.

⁵ Arooba Beshe Mawe Doono Yeeri, muriccii echeti bi asheenaꞌoyich oogee ukoon, malleteechi gubbichoon tunemmone.

⁶ Nallee gabberooch kotetoyich kaachii nallee ayaanoon, katemee uxeree kelloon ginoochee quyee beetinaꞌoyich hakkoon immemmone.

⁷ Qeesheenaꞌonaa keemechinaꞌona mashiibeeti uyoona dadeddeheete; woyinee uyoonoo mullo baalleeheete; mashiibeeti uyoonoo tattelleheete; yaaꞌee beegona muricciyeete; nallee nalloochaa tepheeheete.

⁸ Boonoshi maabeeti madoo bulliich cooyo ceennitone; wooreyaani xaaꞌoo ciroona aalloone.

⁹ Boonoshiyoo ishichiyeete: “Ebi uro, dojjiya bi qaawiibeeto koniniye? Wochoon biishi bi gettemmo konichiye? Xachi kuxeenaꞌo tuneti gaggereenaꞌoyichiye?

¹⁰ Nooch dojjiya bi qaawiibeeto, getee toommooch getoon, getee toommooch getoon, qociyee toommooch qociyoon, qociyee toommooch qociyoon, giishechoon hiniich, giishechoonoo okk ebiich, tuniyoonane” iyeete.

¹¹ Doono Yeeri dallaaweenaꞌochi noonoona, aricheyaani noonoon yibbaatee beetinaꞌona hini asheenaꞌoyich gettemmone.

¹² Biyoo boonoshich, “Hini tooqqii kashoone; maraateton kashiibote; hini kashee xaaꞌoone” iye; tunebaani boonoshi waayemmon qajjiyeete.

¹³ Ebich Doono Yeerichi qaaro, getee toommooch geto, getee toommooch geto, qociyee toommooch qociyoo, qociyee toommooch qociyoo, giishecho hiniich, giishecho okk ebiich, boonoshich tunemmone; ebiyoo hamiree gubb dihi boonoshi tiishemmoyich, ollooch boonoshi giyemmonaa boonoshi kecceyemmonoyichiye.

¹⁴ Ebi asheenaꞌo toommooch iraasheꞌi Yerusaalemin hajjiibeeti, hini cooqqirechinaꞌote, Doono Yeeri gettii beeton waayebote.

¹⁵ Ittoshiyoo, “Qitoona tookkaa wogoon giyeto noone; maashoona tookkaa shuneto noone; kootoon no shoobo, no aashee xaaꞌoonoo tuniito noone; kupphe naxo hidii bi daammii beegaata, no waan shagaachemmone” ito ittoshine.

¹⁶ Ebich Nuggishoo Doono Yeeri ishichiye: “Ebiyoche, kexon deggii neechiibeeti giimbee guummoommi xaqqoon, manjoo bi tuno bekketi, aaxxoo tuneti xaqqoon hecoyich Tsiyoon kotiyemmo taane; bi toommooch mulloon tooꞌiimmo yeelleyaachemmone.

¹⁷ Nalloon qeellee woderoo, cadiqoonoo tumbin tuniyemmo taane; ‘Noon shoobi wodiyemmone’ iꞌi ittoshi gibeneebeeti kootoon baderoo hidemmone; ittoshi aashee xaaꞌoon aaco qooxxemmone” iye.

¹⁸ Qitoona tookkii ittoshi giyiti wogo echemmone; maashoona tookkii ittoshi shuneti shunoo manjaachemmone; kupphe naxo bi beshehooba, ittoshin kotemmone;

¹⁹ bi waammi haddoona ittoshin daammemmone; maaddi maaddoona, areddoonaa xumoonon beshemmone; ebi wochoon ariyoo bi deebemmo oogeti keqqooniye.

²⁰ Ebiyoo, “Bi baatoon carete bi tokketeyaachemmoyich qeeno qaminniye; bi qeddoon bi qeraachemmoyich taho guutiye” getteetoommon ittoshich tunemmone.

²¹ Doono Yeeri Feratsimi guudonaa Gibeꞌooni bamboonoochaa bi tuniitoommon andoo doyeyaani shuunoon shuunoonaa dallaawe mooyon tuniyoonoyich tiyemmone.

²² Beshe Mawe Nuggishoo Doono Yeeri no showoo bullin aalliiya maaccito bi tunoon ta waayetoyich, cooqqiroon qayote; ebi tuno qayigaata ittoshi cucheti cuyo manjemmone.

²³ Ellebote; ta qaaroon waayebote; waayebote; ta yibbaatoon waayebote.

²⁴ Gochecho maayoon shoohoyich wochii wochii gochii beetone? Dugoon buricoyich bi budon wochii wochii qofii beetone?

²⁵ Budon bi tachitoyee gubb, aaꞌaafoon, kamuunoon, teepphoonaa sheqoonon bi xaaꞌi xaaꞌooch, gomberoonoo bi tagooch shoohaanoone?

²⁶ Bi Nuggishoo biin bi dojjitoyich tate mooyon arii beetone.

²⁷ Aaꞌaafo maayi buchi qiicoona bucheyaache; kamuuno gaarichi gengoona kacheyaache; tunebaani aaꞌaafo quddoona, kamuunoo gumboona buchehe.

²⁸ Koshoyich tunemmi maayo qaddo tunemmi wottoon buchee beetone? Amoommonolla gaarinaa hareshoona bi toommona bi gasheetaanona qaddoon tuneyaanoone.

²⁹ Ebi bulli mooyo bi waabeeto, Beshe Mawe Doono Yeer waaneeniye; biyoo ciicoona worganeeto, shalligoonoo beshoone.