Isiyaasi 27 - Kafa Linguistics Project

Israꞌeeleenaꞌo Hajjeyoochee Keyo

¹ Arooba Doono Yeeri qingireebee awureebeeti Lewataanin, caaceebeeti dingeroon, manje ooge kupphe bi goraadoona kuxxemmone; baharee daggooch beeti dareboon wuxemmone.

² Arooba ishichaa shoddeyemmone: “Gaawe aafoon aafeebeeti woyinee goyoyich ishichi shoddebote.

³ Doono Yeeri ta, quyecho taane; bulli aaboon aacon uchiyoye; koniyoona biin bi duubiyaachemmoyich, areddoonaa xumoonon quyehoye.

⁴ Ebiyee bekk kaareyaachemmo taane; abo angixonaa guccinonoo ta toommooch tibeeta! Boonoshi toommona shaꞌeree ikkooch boonoshin michesho taane.

⁵ Ebi tuno qayigaata, taan deebo yesheete; taanna tookki diggoo hallibeete; taanna tookki diggoo hallibeete” iye.

⁶ Woyemmi yemeenooch, Yaaqobi mixochoommon cammon awuremmone; Israꞌeeli bungiree aafemmone; bi aafoo showoo bulliich ceennemmone.

⁷ Israꞌeeleenaꞌon bi yexxito, boonoshin yexxitinaꞌon bi yexoommoniye? Boonoshin guuritinaꞌo guureyoommon guureeteete?

⁸ Yeeri bi asheenaꞌon kecaa boonoshi hammemmoyich tuniyoona naxehe; aabi-keyo waanee giidechi yubee yongoochoommon boonoshin yookkiye.

⁹ Illa Israꞌeeleenaꞌo boonoshi axaaxoyich maaroon dano boonoshi hakkemmo, aageteenaꞌochi deejjee gudee xaqqeenaꞌon tiichii boonoshi aalliigaata, ixaanee deejjee gudoonaa Asheeri misileenaꞌonon boonoshi aallii gaatane.

¹⁰ Mishigechi katemoo onoo tunee echehe; amolla aalli barahoommon tunetone; maamo arooch gaaxiye; aroochoo miqqehe; bi atoonoo hoqqii maahe.

¹¹ Michi ateenaꞌo boonoshi shuuꞌiyooba tiisheheete; maacheenaꞌo qaaqqooch shookka maciyeete; shalligaalli asheenaꞌo boonoshi tunetoyich, boonoshin Hallito boonoshich ariqqeyaachemmone; boonoshin Hallito boonoshin gaawe aafoona ciinaachemmone.

¹² Arooba, goyecho teepphoon kalloochee bi bariiyoommon, Doono Yeeri Efiraaxisi aacoochee tiijjii Gibitsee showee danooch beddaahaa beeti bi asheenaꞌo tuneti Israꞌeeleenaꞌon boonoshi ikkikkoona kicemmone.

¹³ Arooba, ooge shameto hukkemmone; Asooree showooch aallee hammitinaꞌo, Gibitsee showooch kecaa hammitinaꞌoo wottemminaꞌone; yaafeeti guudo Yerusaalemaa Doono Yeerich goyinnemminaꞌone.