Isiyaasi 26 - Kafa Linguistics Project

Doono Yeerin Shoddoona Galleto

¹ Arooba ebi shoddo Yihudee showoochaa ishichaa shoddeyemmone: “Mishigechi katemoo nooch beetone; Yeerichi wodiyoo, xaqqee uxeroonaa mishigoonon nooch tunetone.

² Gibeneeti, cadiqe aageteenaꞌo giyemmoyich, katemee kelleenaꞌon qechibote.

³ Neen bi gibenetoyich, neenna degeyaabeeti kasheen, diggoona quyemmo neene.

⁴ Bulli yemeenooch Doono Yeerin gibenebote. Nuggishoo Doono Yeeri, nooch bulli yemeenee deebe xaqqoone.

⁵ Geecechinaꞌon giishiyemmone; coonniti katemoon cooniyemmone; happiree, buttoon tuniyemmone;

⁶ girechinaꞌo baatoona neexxemminaꞌone; gichechinaꞌoo kotemminaꞌone” getteyemmone.

⁷ Cadiqeenaꞌochi gommo naqqoone. Kaamoocho, cadiqeenaꞌochi boochoon tachihine.

⁸ Doono Yeero, ne sheeroon quyoona neen gibenehone; no mullee qaatoo, ne shigoon aricheto tuniyoone.

⁹ Ta kashe xumo bullin neen sharaatehane; ta ayaano neen qaawiye; ne dayinneto showee toommooch bi tunehooba, showee toommooch beetinaꞌo cadiqo tunoon doyemminaꞌone.

¹⁰ Gonde asho gaawe aafoona bi ciichetaanona, cadiqoon doyaache; kaameenaꞌo showoochaanolla, gonde mooyon tuniihe; Doono Yeerichi oogoon shalligaache.

¹¹ Doono Yeero, ne mochoo kaama tiyitone; tunebaani ne etteenaꞌo beegaaneenaꞌone. Ne asheenaꞌoyich am shaahoon ne qanaataabeeto gaata, ciiniree yeellebeete; boonoshich ne qanniiti qaaqqoo, ne etteenaꞌon mame.

¹² Doono Yeero, diggoon nooch immeto neene; no shuunoo bullin nooch kaachito neene.

¹³ No Nuggishoo Doono Yeero, neyee bare dooninaꞌo noon hajjitinaꞌone; tunebaani no, ne shigoon baach oogiihone.

¹⁴ Areenaꞌo qititinaꞌone; wotteree kashoona beetaachemminaꞌone; aalletinaꞌone; guttinnoon tiyaachemminaꞌone; boonoshin naxaꞌa aalliito neene; boonoshi shalligichoon hidaa aalliito neene.

¹⁵ Doono Yeero, ne aagetee asho meettemmoyich tuniihine; ne aagetee ashoon meechihine; ebina newoo oogoon danehine; showee daaroonoo gamichito neene.

¹⁶ Doono Yeero, ne asheenaꞌo boonoshi xuuxehooba neen qaawiyeete; boonoshin ne sheeriyooboo shaashikkoona ne waan corootiyeete.

¹⁷ Doono Yeero, yeqqefechi shiy beddaꞌa, maaxoo manjaa bi cookoommon, nowoo ne aafooch ebiyoommon tuneto noone.

¹⁸ Yeqqefechi maachechoommon maaxoo manjeto noone; yongoon shiyeto noone; showee toommooch wodoon deebaano noone; showee toommooch shiijjaa shiijjereyaanoo noone.

¹⁹ Qititi ne asheenaꞌo kashechinaꞌon tunemminaꞌone; boonoshi dubeno qitoochee tiyemmone; showee daggooch beetinaꞌote, tibote; emiroonoo shoddebote. Wacciibeeti keetoo showoon bi shuxiyoommon, qitii yagitinaꞌo tiyiree, kashoona beeyemmoyich Doono Yeeri tuniyemmone.

²⁰ Ta asheenaꞌote, wobote; ittoshi kexi kexooch giyiichi ittoshi toommooch shaaqqoon hicote; Yeeri kaaro beshemmi wottoon, giisheche aaboon ittoshi qelloon aachibote.

²¹ Showee toommooch beeti asheenaꞌon, boonoshi axaaxoyich naxeya, Doono Yeeri bi xaaꞌoochee woyemmone; showoo bi toommooch ufeti damoon kichemmone; bi toommoochaa wuxeetinaꞌon aachaachemmone.